ކުރިއަށް އޮތް ލޯކަލް ކައުންސިލް އިންތިހާބުގެ ކެމްޕެއިނަށް ޕީއެންސީން މިރޭ އާޓިފިޝަލް ބީޗުގައި ބޭއްވި "ދަ ގްރޭޓާ އައްޑޫ އިވެންޓު"ގައި ވަނީ މި ސަރުކާރުން އައްޑު އަށް ގެންގުޅޭ ބޮޑު ތަސައްވުރު އިފްތިތާހުކޮށްފަ އެވެ.
އެ ތަސައްވުރު އެކުލެވިގެންވަނީ މައިގަނޑު ހަ އަސާސެއްގެ މައްޗަށެވެ. އެއީ؛
މެނިފެސްޓޯގައިވާ ގޮތުން މި ސިޔާސަތުތަކުގެ ބޭނުމަކީ އައްޑޫގެ ފަހުރުވެރި މާޒީ އިއާދަކުރުމާއި އައްޑޫ ދުނިޔޭގެ ޗާޓަށް އެނބުރި ގެނައުމާއި އައްޑު އަށް ވަޒީފާ އާއި ވަސީލަތްތައް ރުޖޫއަ ކުރުމާއި އައްޑޫ ރައްޔިތުން އަނބުރާ އައްޑު އަށް ގެނައުމާއި އައްޑޫ ބިނާކުރުވަނިވި ހިޔާލާއި ވިސްނުމަށް ހުޅުވާލުމާއި އައްޑޫގެ ދައުރު ސަރަހައްދީ ގޮތުން ފުޅާ ކުރުމުގެ ބާބެއް ފެށުމެވެ.
މެނިފެސްޓޯގައި ބުނީ އައްޑޫގެ ތާރީހު ރައްކާކުރާނެ ހާއްސަ މަރުކަޒަކާއި ދިރާސާތައް ކުރާނެ މަރުކަޒެއް ދުވަހަކު ވެސް ވުޖޫދުވެފައި ނެތް ކަމަށެވެ. "ގްރޭޓާ އައްޑޫ" ގެ އެއް އަމާޒަކީ މި އުނިކަން ފޫބައްދައި އައްޑޫގެ މާޒީ އާއި މުސްތަގްބަލު ގުޅުވައިދޭނެ ފަދަ އިލްމީ ބިނާއެއް ވުޖޫދަށް ގެނައުން ކަމަށް އޭގައިވެއެވެ.
ސުވަދީބް ދާރުލް އާސާރައި އަފީފް އީޖާދީ މަރުކަޒުގެ ބޭނުމަކީ އެއް ފުރާޅެއްގެ ދަށުން އައްޑޫގެ ތާރީހާއި ތަރިކަ ރައްކާކޮށް، އެ މަސައްކަތުން ހާސިލްކުރެވޭ އިބުރަތްތަކަށް ފިކުރުކޮށް، ނަޒަރު ހިންގައިގެން ކުރިމަގު ބައްޓަންކުރަން ޖާގަދޭނެ، އީޖާދީ ވިސްނުން އުފަންކުރުވާނެ ގައުމީ ފެންވަރުގެ މުއައްސަސާއެއް އުފެއްދުން ކަމަށް އެ މެނިފެސްޓޯގައިވެއެވެ.
ދަ ގްރޭޓަރ އައްޑޫ ވިޝަންގެ ތަފްސީލު ލޯންޗުކުރުމަށް ބޭއްވި ހަފްލާގައި ރައީސް ވިދާޅުވީ ކޮންގްރެސް ޕާޓީގެ ކެންޑިޑޭޓުންނަށް ވޯޓްދީގެން ވާނީ ފައިދާ ކަމަށެވެ.
ރައީސް ވިދާޅުވި ގޮތުގައި، ކައުންސިލް އިންތިހާބަކީ އާއިލާތަކުގެ މެދުގައި ވަރަށް ބޮޑަށް، އާއިލީ ވިސްނުމުގައި ވޯޓު ދޭ އިންތިހާބަކަށް ރާއްޖޭގައި ވެފައި އޮތް ނަމަވެސް، މުޅި ސިޓީ ނޫނީ މުޅި ރަށުގެ ތަރައްގީ އަށް އިސްކުރަން ޖެހޭ މަސްލަހަތު އިސްކުރުމަކީ ކޮންމެ މީހެއްގެ ޒިންމާއަކަށް ވާން ޖެހެ އެވެ.
ލޯކަލް ކައުންސިލް އިންތިހާބުގެ ކެމްޕެއިންގެ ފޯރިގަދަވެފައިވާ އިރު، ޕީއެންސީން އަންނަނީ ވަރުގަދަ ކެމްޕެއިނެއް ކުރަމުންނެވެ. އެގޮތުން، މާލޭގެ އެކި ދާއިރާތަކާއި ސިޓީތަކާއި ރަށްތަކަށް ހާއްސަކޮށް ކެމްޕެއިން ޖަގަހަތައް ދަނީ ހުޅުވަމުންނެވެ.
