މިއަދު އޮތް ނޫސްވެރިންގެ ބައްދަވުލުވުމުގައި މިނިސްޓަރު އަމީން ވިދާޅުވީ މިއަދު އެކަނިވެސް 53 ފްލައިޓް ޝެޑިއުލްކޮށްފައި އޮތްއިރު، އޭގެ ތެރެއިން 18 ފްލައިޓެއް ކެންސަލްވެފައިވާކަމަށެވެ. އަދި އެއީ މުޅިން ވެސް މެދުއިރުމަތީގެ ގައުމުތަކުން އަންނަ ފްލައިޓްތައްކަންވެސް މިނިސްޓަރު އަމީން ފާހަގަކުރެއްވިއެވެ. 

ހަނގުރާމައިގެ ސަބަބުން މެދުއިރުމަތީގެ ދަތުރުތައް ހުއްޓުމާ ގުޅިގެން 370 އަށްވުރެ ގިނަ ފަތުރުވެރިން އެމީހުންގެ ގައުމަށް ނުފުރިގެން ރާއްޖޭގައި ތާށިވިވެފައި އެބަތިބި ކަމަށް މިނިސްޓަރު އަމީން ވިދާޅުވިއެވެ. އޭގެ ތެރެއިން ސަރުކާރުން ހުރުމުގެ ކަންކަން ހަމަޖައްސައިދީގެން 110 ވަރަކަށް ފަތުރުވެރިން ވެލާނާ އިންޓަރނޭޝަނަލް އެއާޕޯޓްގައި ތިބިކަމަށްވެސް މިނިސްޓަރު ފާހަގަކުރެއްވިއެވެ.

ފަތުރުވެރިން އަނބުރާ ގައުމުތަކަށް ފޮނުވުމަށް މިދިޔަ ތިން ދުވަހުގެ ތެރޭގައި ސީދާ ޔޫރަޕުން ފަސް ފްލައިޓެއް އޮޕަރޭޓް ކޮށްފައިވާކަމަށް މިނިސްޓަރު އަމީން ވިދާޅުވިއެވެ. އަދި އެއީ ކުރިން ދަތުރު ނުކުރާ ފަސް މަންޒިލްކަމާއި މިއީ ލިބުނު ކުރިއެރުމެއްކަމަށްވެސް އަމީން ވިދާޅުވިއެވެ. ނަމަވެސް، އަލަށް ފްލައިޓްތައް ބޭއްވީ ކޮން ގައުމުތަކަކަށް ކަމެއް އަމީން ވިދާޅެއް ނުވެއެވެ.