ސަތޭކައަށް ވުރެ ގިނަ މީހުން އަތުން ފައިސާ ނަގާ އުމްރާއަށް ނުދެވޭނެކަން އުމްރާވެރިންނަށް އަންގާފައިވަނީ 'އަލް އަބްރާރު ޕްރައިވެޓް ލިމިޓެޑް' ގްރޫޕުން ނެވެ.
އެ ގްރޫޕުން އުމްރާއަށް ދާން ފައިސާ ދެއްކި މީހުން ބުނީ ދަތުރު ކެންސަލްވިކަން ގްރޫޕުން އެންގީ ރޭ ފުރަން އޮއްވާ އިއްޔެ މެންދުރު ފަހުގެ ވަގުތެއްގައިކަމަށެވެ. އެމީހާ ބުނީ މީގެ ކުރިން ގުރޫޕުން މައުލޫމާތު ދެމުން އައީ މިހާރު މެދުއިރުމަތީ ހިނގާ ހަނގާރަމައިގެ ސަބަބުން ފްލައިޓްތައް ކެންސަލްވި ނަމަވެސް އެ ގްރޫޕްގެ ދަތުރަށް އެއްވެސް ބަދަލެއް ނާންނަކަމަށެވެ. އެހެން ނަމަވެސް ކުއްލިއަކަށް ދަތުރު ކެންސަލް ކުރިކަން އެނގީ ހަނގުރާމަ އާ ގުޅުވާފައިކަމަށް ވެސް އެ މީހާ ބުނެފައިވެ އެވެ.
ސީއެމްއެމަށް އެނގިފައިވާ ގޮތުގައި އަލް އަބްރާރު ޕްރައިވެޓް ލިމިޓެޑް ގްރޫޕުން ވަނީ އުމްރާވެރިން ބައިތިއްބާ ހޮޓަލަށް ފައިސާ ދައްކާފަ އެވެ. އެހެން ނަަމަވެސް ސައުދީގެ އެޖެންޓަށް ފައިސާ ދައްކަން ތަކުރާރުކޮށް އެނގުމުން ވެސް ފައިސާ ދައްކާފައި ނެތުމުން އެ ގްރޫޕަށް ވިސާ ލިބިފައެއް ނުވެެ އެވެ. ސައުދީ އެޖެންޓަށް ގިނަ އަދަދެއްގެ ފައިސާ ދައްކަން ޖެހޭކަން ވެސް ވަނީ އެނގިފަ އެވެ. އަބްރާރު ގްރޫޕުން ވަނީ ރޯދައިގެ ފަހު 15އަށް، އުމްރާއަށް ގެންދިޔުމަށް ބޮލަކަށް 45000 ރުފިޔާ ނަގާފައިވާކަން ވެސް ވަނީ އެނގިފަ އެވެ.
އިކޮނޮމިކް މިނިސްޓްރީގެ ބިޒްނަސް ރަޖިސްޓްރޭޝަން ޕޯޓަލުގައިވާ ގޮތުން އަލް އަބްރާރް ގްރޫޕުގެ ހިއްސާދާރުންގެ ގޮތުގައި ތިން މީހަކު އެބަ ތިއްބެވެ. އެއީ ޔޫސުފް ސިދްގީ އާއި އަހުމަދު އައްފާން ޝާފީ އާއި އަދި އާދަމް ބިންޔާމިން އެވެ.
އިސްލާމިކް މިނިސްޓްރީން ބުނީ މި މައްސަލަ މިނިސްޓްރީގެ ސަމާލުކަމަށް އައިސްފައިވާކަމަށެވެ. އަދި މައްސަލަ ބަލަމުން އަންނަކަމަށާއި ފިޔަވަޅު އަޅަންޖެހޭ ފަރާތެއްވާ ނަމަ ފިޔަވަޅު އަޅާ މައްސަލަ ހައްލުކޮށްދޭނެކަަމަށް އިސްލާމިކް މިނިސްޓްރީން ވަނީ ބުނެފަ އެވެ.
މެދު އިރުމަތީ ހަނގުރާމައާއި ގުޅިގެން އަބްރާރު ގްރޫޕުން ދާ މީހުން ފިޔަވާ އެހެން ދިވެހި އުމްރާވެރިންގެ ދަތުރުތައް މިހާތަނަށް ކެންސަލްވެފައެއް ނުވެއެވެ. އެހެން ނަމަވެސް ގަލްފު އެއާގައި ދަތުރު ކުރަން ތައްތާޔާރުވެފައިވާ ބައެއް ދިވެހިންގެ ފުރުން ވަނީ ލަސްވެފައެވެ. އެ ގްރޫޮޕްތަކުން އަންނަނީ އެހެން އެއާލއިންތަކަށް ބަދަލުކޮށް މި ހަފްތާ ނިމުމުގެ ކުރިން އުމްރާއަށް ފައިސާ ދެއްކި މީހުން ސައުދީއަށް ގެންދިޔުމުގެ މަސައްކަތް ކުރަމުންނެވެ.
