ސަންދޯކުގައި ހިފުމުގެ ބަދަލުގައި އެ ލޯބި މަންމަގެ އަތުގައި ހިފާލާފައި އެންމެ ފަހަރަކު ފިރުމާލިނަމަވެސް އެ ހިތަށް އަރާމާއި ހަމަޖެހުން ލިބުނީހެވެ. މަންމަގެ ކުރިމަތީގައި ހިނިތުންމުވެއް ރައްދުކޮށްލާން އެންމެ ދުވަހަކު އައިނަމަވެސް މަންމަގެ އެ ހާލަތުން ސަލާމަތް ކުރެވުނީސް ކަންނޭގެ އެވެ. ފުރާނައަކީ ﷲތައާލާގެ އަމާނާތެކެވެ. ވަގުތު ޖެހުމުން ލަހެއް ފަހެއް ނޯވެ އެވެ. ދެ ލޯ މަރައިލަނީ ދުނިޔޭގެ މުއްދަތު ހަމަވުމުންނެވެ. ފުރިހަމަ ސިއްހަތެއްގައި ހުރި މަންމަގެ ހިތަށް މަޑުމަޑުން ލިބެމުންދިޔަ އަނިޔާ އަހަރުމެން ދަރީންނަށް އިހްސާސްނުވީ ކީއްވެ ހެއްޔެވެ؟ ލޮލުގެ ކޮއެ ފަދައިން ގެންގުޅުނު ދަރީން، މަންމަގެ ހާލު އެންމެ ފަހުން ބަލައިލީ ކޮން ދުވަހަކު ބާ އެވެ؟ ޝަކުވާއެއް ނުކުރުމަކީ ހިތްދަތި ނުވުމެއް ނޫނެވެ.
މަންމަ ދިއުމަށްފަހު ބައްޕަ އެކަނިވެރިވެދާނެކަމަށްޓަކައި މަންމަގެ ހިތުގައި އުފުލާނެ ބިރު އަންދާޒާކުރަން މިރޭ އަހަރެން ބިރުގަނެ އެވެ. ބައްޕަގެ ކަރުނައަށް ދަރީން ޒިންމާވާން ޖެހެ އެވެ.
އޭގައި އަހަރެންވެސް ޝާމިލްވަމެވެ. ބޮޑެތި ވަޒީފާތަކުގައި ތިބި ގަދަރުވެރި އަހަރެންގެ އަނެއް ބޭބެތަށްވެސް މި ލިސްޓުގައި ހިމަނާނަމެވެ. އަހަރެންގެ އަންހެނުން މި ލިސްޓުގައި ނުހިމެނިއަސް، އޭނާގެ ނުފޫޒުގައި އަހަރެން ޖެހުމުގެ ޒިންމާ ފުރިހަމައަށް ނަގަމެވެ.
ހާރުކާން ގުޅުމުން އަނބީންގެ ގާތަށް މިރޭ އެ އެންމެން ދިއުމަކީ އަހަރެން އެކަނި ލަދުވެތިވާންޖެހޭ ކަމަކަށްވިޔަސް ފަރުވާލެއް ނެތެވެ. މުޅި ރޭ ލިބުނު އޮތީ އެންމެ ހިތްހަމަޖެހުމެކެވެ. އެފަދަ އެހެން ރެއެއް ނުވަތަ އެފަދަ އެހެން ރޭތަކެއް ދެއްވުން އެދި ﷲގެ ހަޒްރަތުގައި މި ރޯދަމަހު އަހަރެން ކުރާ ކޮންމެ ނަމާދެއްގައި ދަންނަވާނަމެވެ. ބައްޕައަށްޓަކައި އެ ހިތްހަމަޖެހުން މިންވަރުކުރައްވާށި އެވެ. ބައްޕަގެ ފަސް ދަރީން ބައްޕައާއެކު ކޮންމެވެސް ވަގުތުކޮޅެއް ހޭދަކޮށްލާނެ ކޮންމެވެސް ހާލަތެއް މެދުވެރިކުރައްވާށި އެވެ.
ބޮލުގެ އިސްތަށިގަނޑުގެ ތެރެއަށް އަހަރެންގެ އިނގިލިތަށް މަހައިލާފައި އިސްތަށިތަކުގެ ބުޑު މަސާޖުކޮށްލީމެވެ. ކުޑަވެސް ލުޔެއް ލިބޭތޯ އެވެ. އިށީނދެ އިން ގޮނޑިން ތެދުވެ ދެކޮޅަށް ހިނގަން ފެށީމެވެ. ސިކުނޑިއަށް އަންނަނީ ދެ މަންޒަރެވެ.
މަންމަގެ ހިތާމަވެރި ހަބަރު ލިބުނީއްސުރެން ބައްޕަގެ ލޮލުން އެންމެ ކަރުނައެއްވެސް ނައީތީ އެވެ. މަންމަގެ މަހާނައަށް ޒިޔާރާތްކުރި ވަގުތު ބައްޕަގެ ލޮލާއި ހަމައަށް ފޯރާވަރަށް ހިނިތުންވި ހިނދުކޮޅެވެ.
އެ ދެ މަންޒަރު އަހަރެންގެ ލޮލަކުން ފަނޑެއް ނުވި އެވެ.
އިށީންދެ އިން ގޮނޑިން ތެދުވެގެން ގޮސް، ބައްޕައާއި މަންމަގެ ހާއްސަ އުނދޯލީގައި އިށީނީމެވެ. ކަންފަތުގައި ގުގުމާލީ އެދުވަހު ބައްޕަގެ ކޯލުއައި ރިންގުގެ އަޑެވެ. ރޯދަ ކުރުކޮށްލުމަށް އަހަރެން އިނީ ދެ ދަރިންނާއެކު ޕީއެސް ކުޅޭށެވެ. ފޯނުގެ ރިންގުއަޑު ގަދަކަމުން އުނދަގޫވެގެން ސައިލެންޓްކުރަން ފޯނުކައިރިއަށް އައީ ޒިމާލް އެވެ.
'ކިތަންމެ ވަރަށް އިމްދާދްގެ ބައްޕަ ގުޅިޔަސް، ރޯދަ ވީއްލަން މިއަދު އެގެއަށް ނުދެވޭނެ އިނގޭ.. ދަންޏާއި އެކަނި ދޭ.. ކުދިން ނުގެންދެވޭނެ.. ރޯދަ ވީއްލަން މިއަދު ބޮޑުދައިތަ ދުރުވާނެ'
ޒިމާލްގެ އާއިލާ އޭނާއަށް ވަރަށް މުހިއްމުވާނެ އެވެ. އެކަމަކު އަހަރެންގެ މައިންބަފައިނާމެދު ޒިމާލްގެ ހިތުގައި ކުޑަވެސް ރަހްމަތް ނުހުންނަކަން އޭނާގެ ދުލުން ނުބުނިއްޔާ ވަރަށް ރަގަޅުވާނެ އެވެ. އަހަރެންގެ ބައްޕަގެ އުސޫލުތަށް ޒިމާލްއަށް ނޭގުނީތީ އަހަރެން ހައިރާންވި އެވެ. ވަގުތު ޖެހުނީމައި އެ ގެއަށް އައުމަށް ދުވަހަކުވެސް އަހަރެންގެ މައިންބަފައިން އެދެފައި ނުވެ އެވެ. ރޯދަ ވީއްލަން ގުޅިނަމަ މަދުވެގެން އެއްދުވަސްކުރީން ބުނާނެ އެވެ.
ހުކުރު ފިޔަވައި އެހެން ދުވަހެއްގައި ކެއުމަށް ދައުވަތު ދޭނަމަ އެކަންވެސް ކުރިއާއިލައި ބުނާނެ އެވެ. އެގަޑީގައި ބައްޕަގެ ކޯލެއް އައުމަކީ އަހަރެން ވިސްނާލަން ޖެހުނު ކަމެކެވެ. އެ ކޯލް އެ އައީ ދެވަނަ ފަހަރު އެވެ. ފުރަތަމަ ރިންގަށް ފޯނާއި ހިސާބަށް ނުދެވުނީ ގޭމްގެ ފޯރި ގަދަވުމުންނެވެ.
ޒިމާލްގެ ޖުމުލައާއެކު ކުޅެމުންދިޔަ ގޭމުން އަހަރެންގެ ފޯކަސް ގެއްލި، ފޯނާއި ދިމާއަށް ދުއްވައިގަނެވުނީ ކީއްވެކަމެއްވެސް ނޭގުނެވެ. ނޭގެ ނުތަނަވަސްކަމެއް ހިތުގައި އެނބުރިގަތެވެ.
ފޯނުން ސަލާމް ގޮވައިނުލެވެނީސް ކަންފަތުގައި ޖެހުނީ ބައްޕަގެ ގިސްލުމުގެ އަޑެވެ. އަހަރެންގެ ފައިދަށުން ބިންގަނޑު ދެމިގަތަސް އެވަރުގެ ބިރެއް ނުގަންނާނެ އެވެ. އެވަރުގެ ހިތްދަތި އަޑެއް ދުވަހަކުވެސް ނާހަމެވެ.
ބައްޕަގެ ދުލުން ނިކުތީ އެންމެ ދެ އަލްފާޒެވެ.
'މަންމަ... އައި ޖީ އެމް އެޗް'
އެ އަށްވުރެން އިތުރު އެއްޗެއް އަޑު އަހާކަށްވެސް އެވަގުތު އަހަރެން ބޭނުމެއް ނޫނެވެ. ފޯނު ޖީބަށް ލައިގެން ސައިކަލު ތަޅުދަނޑި ހިފައިގެން ދުވެފައި އަހަރެން ނިކުތްއިރު ބިމުގައި ފައި ހަރުލާކަމެއްވެސް ނޭގެ އެވެ.
އޭރު ގަޑިން ފަސްގަޑި ފަންސާސްހާއިރެވެ. މަގުތަކުގައި އެއްޗެހި ގިނަޔަސް، ދުއްވާލެވޭނެ ޖާގަ ލިބުނީތީވެ އެކްސިނޑެންޓެއް ނުވެ ﷲގެ މިންވަރުފުޅާއެކު އައިޖީއެމް އެޗަށް ހެޔޮ ހާލުގައި އާދެވުނެވެ. ދުވެފައި ދިޔައީ އެމަރޖެންސީއަށެވެ. ލިބުނު މައުލޫމާތުން އެނގުނީ އަދި ހޮސްޕިޓަލަށް ނުގެނެވޭކަމެވެ.
ކަންފަތުގައި ސައިރަންގެ އަޑު ޖެހުނީ ބައްޕައަށް ގުޅަން އަހަރެންގެ ފޯނު ނެގި ވަގުތު އެވެ. އޭރު އެންބިއުލަންސް ހޮސްޕިޓަލުގެ ތެރެއަށް ހުއްޓަނީ އެވެ.
އެންބިއުލެންސްގެ ތެރެއިން މަންމަ ނެރުމާއެކު ބާރު ސްޕީޑްގައި ގެންގޮސް އީއާރަށް ވެއްދުމާއި ދެމެދު ސިކުންތެއް ފާއިތުވިކަންވެސް އަހަންނަށް އިހްސާސެއް ނުވި އެވެ. ބައްޕަގެ މޫނަށް އެވަގުތު ބަލައިލުމަށް އަހަރެންގެ ހިތަކަށް ކުޅަދާނައެއް ނުވި އެވެ.
ބަންގި ގޮވިއިރު އަހަރެންގެ ނޭވާ ހިނގާކަމުގެ އިހްސާސްވެސް ނެތެވެ. ބައްޕަގެ ކަރުތެރެއިން ފެން ފޮދެއްވެސް ނުދިރޭނެކަން އަހަންނަށް ޔަގީނެވެ. އެކަމަކު މަންމައަށްޓަކައި އަހަރުމެން ދެމީހުންވެސް ކޮޅަށް ތިބުން މިވަގުތު މުހިއްމެވެ. ދުވެފައި ގޮސް ކެންޓީނުން ދެ ކަދުރު ހިފައިގެން އައިސް ބައްޕަގެ އަންގައަށް އެއް ކަދުރު ލަވާދީފައި އަނެއް ކަދުރުން އަހަރެން ރޯދަ ވީއްލީމެވެ. ދުއާއަށް އަތް ނަގަން ބައްޕަ ގޮވައިގެން މިސްކިތަށް ވަންނަން ބޭނުމެވެ. ނަމަވެސް ލިބިދާނެ ހަބަރަކަށް އީއާރް ކުރިމަތީގައި މިވަގުތު މަޑުކުރަން ހާލަތު މަޖުބޫރެވެ.
ފާއިތުވި ކޮންމެ މިނެޓެއްގެ ދިގުމިން އަންދާޒާކުރުމަށްވެސް އަހަރެންގެ ސިކުނޑި މަސައްކަތެއް ނުކުރި އެވެ. ބައްޕަގެ ލޮލުން ކަރުނައެއް ނުވެއްޓެ އެވެ. ދުލުން އެންމެ އަލްފާޒެއްވެސް ބޭރު ނުކުރި އެވެ. އެކަމަކު ބައްޕަ ލައްވައި ވާހަކަދެއްކުވުން މިވަގުތު މުހިއްމެވެ. ވިސްނާން ނުހުރެ އަހަރެންގެ ދެއަތުގެ ތެރޭގައި ބައްޕަ ބޮނޑިކޮށްލީމެވެ. އަހަރެންގެ އެސްފިޔަތަށް ނުހިފެހެއްޓުނެވެ. ކަރުނައިން އެ ލޯބި ކޮނޑު ތެއްމަމުން، ބައްޕަގެ ބުރަކަށީގައި ފިރުމާލީމެވެ. ހިތްވަރު ދިނުމަށްވެސް އެންމެ ލަފްޒެއްވެސް އަހަރެން ނުބުނަމެވެ. އަހަރެންނަށް ވުރެން އިސްކޮޅުން ބައްޕަ ދިގުވާނެ އެވެ. ކުޑަކުއްޖަކު ފަދައިން އަހަރެންގެ ކޮނޑުގައި ބައްޕަ ބޯއަޅައިލި ސަބަބަކީ އެއީ އެވެ.
ހިމޭންކަމާއި ނުތަނަވަސްކަމުގެ ހިނދުކޮޅެކެވެ.
ބައްޕަގެ އަޑު ކަންފަތުގައި ބީހިލާނެ ވަގުތެއްގެ އިންތިޒާރުގައި އަހަރެން ކަރުނަ އެޅީމެވެ. (ނުނިމޭ)
