ބޮލީވުޑްގެ އެންމެ އުންމީދީ ދެ ފިލްމު ކަމަށްވާ ރަންވީރު ސިންގްގެ "ދުރަންދަރު: ދަ ރިވެންޖް" އާއި ޔާޝްގެ "ޓޮކްސިކް" އެއް ދުވަހަކާ ސިނަމާތަކަށް އަންނާނެ ކަން މިހާރު ވަނީ އިއުލާނުކޮށްފަ އެވެ. އަންނަ މާރިޗު މަހުގެ 19 ވަނަ ދުވަހު މި ދެ ފިލްމު ރިލީޒް ކުރަނީ އީދު ބަންދާއި ގުޑީ ޕަޑްވާ ފަދަ އީދުތަކާ ދިމާކޮށް ބޮޑު އާމްދަނީއެއް ހޯދުމުގެ މަގުސަދުގަ އެވެ.
އަދިތްޔާ ދާރު ޑައިރެކްޓްކުރާ "ދުރަންދަރު" އަކީ ކާމިޔާބު ސްޕައި ތުރިލާއެއްގެ ސީކުއަލްއެކެވެ. މި ފިލްމުގައި ރަންވީރު ފެނިގެންދާނީ ވަރުގަދަ އެކްޝަން ރޯލަކުންނެވެ. އަނެއްކޮޅުން، ގީތޫ މޯހަންދާސް ޑައިރެކްޓްކުރާ "ޓޮކްސިކް" އަކީ ގޯއާގެ ގޭންގްސްޓަރުންގެ ވާހަކަ ދައްކުވައިދޭ ފިލްމެކެވެ. މި ފިލްމުގައި ޔާޝް އާއެކު ކިއާރާ އަދުވާނީ އާއި ނަޔަންތާރާ ފަދަ ތަރިން ފެނިގެންދާނެއެވެ. މި ދެ ފިލްމަކީވެސް އިންޑިއާގެ އެކި ބަސްބަހުން ރިލީޒްކުރާ "ޕޭން-އިންޑިއާ" ފިލްމުތަކެކެވެ.
ސޯޝަލް މީޑިއާގައި މިހާރުވެސް މި ދެ ފިލްމުގެ ވާދަވެރިކަން ވަނީ ބޮޑުވެފައެވެ. ހާއްސަކޮށް ރަންވީރު ސިންގް އާއި ޔާޝްގެ ފޭނުންގެ މެދުގައި ބޮކްސް އޮފީހުގައި ކުރިހޯދާނީ ކޮން ފިލްމެއްތޯ ބެލުމަށް ބޮޑު ބަހުސެއް ވަނީ ފެށިފަ އެވެ. މި ބޮޑު ދެ ރިލީޒްގެ އިތުރުން މާރިޗު މަހުގެ ކުރީކޮޅު "ޖަބް ހުލީ ކިތާބް" ފަދަ ފިލްމުތައްވެސް އޯޓީޓީ ޕްލެޓްފޯމްތަކަށް އަންނާނެ ކަމަށް ރިޕޯޓުތައް ބުނެ އެވެ.
