އެގްރިކަލްޗާ މިނިސްޓްރީން މިއަދު ބޭއްވި ނިއުސް ކޮންފަރެންސްގައި، ނޫސްވެރިއެއްގެ ސުވާލަކާ ގުޅިގެން މިނިސްޓަރު މަރިޔަމް މާރިޔާ ވިދާޅުވީ އެމްއެފްޑީއޭއިން ޓެސްޓުކޮށް، އެކަން ދިމާވާ ސަބަބުތައް ބަލަމުން އަންނަ ކަމަށެވެ.
ފުޅާދާއިރާއެއްގައި ދަނޑުވެރިކަން ކުރާ ގޮއިދޫގައި ކެންސަރު ގިނަވާ ކަމުގެ ކަންބޮޑުވުންތައް ފުރަތަމަ ހިއްސާކުރީ، މިދިޔަ އަހަރުގެ ޑިސެމްބަރު މަހުގެ ތެރޭގައި ޝަހުލާ ވަޖީހު ނަމަކަށް ކިޔާ މީހެކެވެ.
ޝަހުލާ ބުނީ މިދިޔަ ފަސް އަހަރު ތެރޭގައި ގޮއިދޫއިން ނުވަ މީހަކަށް ކެންސަރު ޖެހި އަދި ތިން މީހަކު މަރުވެފައިވާ ކަމަށެވެ.
ރާއްޖޭގެ ބައެއް ރަށްރަށުގައި ކެންސަރު ބަލި ޖެހިފައިވާ މީހުން އިތުރުވުމުގެ ކަންބޮޑުވުން މިދިޔަ އަހަރުގެ ތެރޭ ވަނީ ފާޅުކޮށްފަ އެވެ. އެގޮތުން، ދަނޑުވެރި ރަށެއްކަމަށްވާ ގޮއިދޫގައި ކެންސަރު ބަލި އާންމުވުމުގެ ކަންބޮޑުވުމާއެކު އެކަމުގެ ސަބަބު ދިރާސާކޮށްދިނުމަށާއި، އެ ރަށުގެ ދަނޑުތަކުގައި ޕެސްޓިސައިޑް ބޭނުންކުރާ ގޮތް ބެލުމަށް އިންސްޕެކްޝަނެއް ހިންގައި ދިނުމަށް މިދިޔަ ޑިސެންބަރު މަހު އާންމު ރައްޔިތަކު އެދިފައިވެ އެވެ.
އެޗްޕީއޭއިން މިދިޔަ އަހަރު ހިއްސާކުރި މައުލޫމާތުތައް ދައްކާގޮތުން، ކެންސަރުގެ ދަފްތަރުގައި ރަޖިސްޓްރީވެފައިވަނީ 1،617 މީހުންނެވެ. ނަމަވެސް، މި އަހަރުގެ މިހާތަނަށް ޖުމްލަ 1،964 މީހުން އެ ލިސްޓުގައި އެބަތިއްބެވެ. މިއީ އަހަރެއްގެ ތެރޭގައި 347 މީހުންގެ އިތުރުވުމެކެވެ.
އެ އިދާރާއިން ބުނީ ކެންސަރު ދަފްތަރުގެ 57 ޕަސެންޓަކީ އަންހެނުން ކަމަށެވެ.
އެ ދަފްތަރަށް ބަލާއިރު، ފިރިހެނުންގެ ތެރޭގައި އެންމެ ގިނައީ ފުއްޕާމޭ، ޕްރޮސްޓޭޓް، ކޮލޮރެކްޓަލް އަދި ބަނޑާއި ފުރަމޭގެ ކެންސަރެވެ. އަންހެނުންގެ ތެރޭގައި އެންމެ ގިނައީ އުރަމަތި، ކޮލޮރެކްޓަލް، ފުއްޕާމޭ، ރަހިމުގެ ދޮރަށްޖެހޭ އަދި ތައިރޮއިޑް ކެންސަރެވެ.
އެޗްޕީއޭއިން ސޯޝަލް މީޑިއާގައި މިފަހުން ކުރި ޕޯސްޓެއްގައި ބުނީ 2020 ވަނަ އަހަރުން ފެށިގެން މިދިޔަ އަހަރުގެ ނިޔަލަށް 1،106 މީހުން ކެންސަރުގެ ދަފްތަރުގައި ހިމެނިފައިވާ ކަމަށެވެ.
އެންމެ މަދުން މީހުން ރަޖިސްޓްރީވީ މިދިޔަ އަހަރު ކަމަށް ވާއިރު އެއީ 111 އެވެ.
