ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށް ބާއްވާ ގޮތަށް ގާނޫނުއަސާސީ ބަދަލުކުރަން ހުށަހެޅި ބިލު ދާދިފަހުން މަޖިލީހުން ވަނީ ފާސްކޮށްފަ އެވެ. މި ބަދަލު ގާނޫނުއަސާސީއަށް ގެނެވޭނީ ރައްޔިތުންގެ އާންމު ވޯޓަކުން އެކަމަށް އަޣުލަބިއްޔަތު ލިބިގެންނެވެ. އެހެންވެ، އެ ބަދަލާ ގުޅޭ ގޮތުން އަންނަ އޭޕްރީލް މަހު ބާއްވާ ލޯކަލް ކައުންސިލް އިންތިހާބާ އެކު ރައްޔިތުންގެ ހިޔާލު ހޯދުމުގެ ވޯޓެއް ނެގުމަށް ވަނީ ނިންމައިފަ އެވެ.
އެމްޑީޕީން ރޭ ބޭއްވި ހަރުގެ ޖަލްސާގައި ވާހަކަދައްކަމުން ރައީސް ސޯލިހު ވިދާޅުވީ ކައުންސިލް އިންތިހާބާއެކު ސިއްރިއްޔާތުގައި ސަރުކާރުން ގާނޫނު އަސާސީއަށް ގެންނަން އުޅެނީ ބަޣާވާތެއް ކަމަށާއި އެހެން ނޫންނަމަ ކައުންސިލް އިންތިހާބުގެ ފަހަތުގައި ސިއްރުން މި ވޯޓުގެ ކަންކަން ގެންދަން ނުޖެހޭނެ ކަމަށެވެ.
ސޯލިހް ވިދާޅުވީ ހަރަދު ކުޑަކުރަންކަމަށް ބުނެ ސަރުކާރުން ދައްކަނީ ފަސް އަހަރަށް ހޮވާފައި އޮތް ރައްޔިތުންގެ މަޖިލީހުގެ ދައުރު ކުޑަކުރާ ވާހަކަ ކަމަށެވެ. ގާނޫނުއަސާސީއަށް އިސްލާހެއް ހުށަހަޅާކަމުގައިވާނަމަ، އެ އިސްލާހަކާ ބެހޭގޮތުން ރައްޔިތުން ދެކޭގޮތް ބެލޭނެ ގޮތްތަކެއް، ހާމަކޮށް ލިޔެވިފައި އޮންނަން ވާނެ ކަމަށް ވެސް ސޯލިހް ވަނީ ވިދާޅުވެފަ އެވެ.
ސޯލިހް ވަނީ ދެ އިންތިހާބު އެއްކޮށްލުމަށް ރައްޔިތުންނާ ހަމައަށް އިސްލާހު ގެނައިއިރު، ރައްޔިތުންނަށް އެކަމުގެ ވާނުވާ ނޭނގޭ ކަމަށް ވިދާޅުވެފަ އެވެ. އަދި ސަރުކާރުން ބުނާގޮތުގައި، ދެ އިންތިޚާބު އެއްކޮށްލަނީ 50 މިލިއަަން ރުފިޔާގެ ގެއްލުމެއް ކުޑަކުރަންކަން ވެސް ސޯލިހުވަނީ ފާހަގަކުރައްވައިފަ އެވެ.
އިލެކްޝަންސް ކޮމިޝަނުން ނިންމާފައި ވަނީ އަންނަ މަހުގެ 4 ގައި ބާއްވާ ލޯކަލް ކައުންސިލު އިންތިހާބާ އެކު ރިޔާސީ އިންތިހާބާއި މަޖިލިސް އިންތިހާބު ބާއްވަން ފެނޭތޯ ފެންނަ ނުފެންނަ ވޯޓު ބާއްވާށެވެ.
އިދިކޮޅު އެމްޑީޕީއިން ދަނީ އެ އިންތިހާބަށް ނޫނެކޭބުނެ ޖަލްސާތަކާއި ކެމްޕއިން ހަރަކާތްތައް ހިންގަމުންނެވެ. ނަަމަވެސް ސަރުކާރުން ބުނަމުން އަންނަނީ ދެ އިންތިހާބު އެއް ކުރުމަކީ ޑިމޮކްރަސީގެ ސިފައެއް ކަމަށާއި އިންތިހާބު ގިނަވުމަކީ ގައުމުގެ ހަމަޖެހުން ގެއްލޭ ކަމެއްކަމަށެވެ.
