މާފުށީ ހިއްކި ސަރަހައްދުގައި ނަރުދަމާ އެޅުމުގެ މަސައްކަތް ހަވާލުކޮށްފައިވަނީ 18 މަސްދުވަހުގެ ތެރޭގައި ނިންމާގޮތަށް 128 މިލިއަނަށްވުރެ ގިނަ ރުފިޔާއަށެވެ. މިމަޝްރޫއުގެ ދަށުން 1500 ޓަނުގެ ފެން އުފެއްދޭވަރުގެ 2 އާރްއޯ ޕްލާންޓް ބަހައްޓާ، 3500 ޓަނުގެ ފެން ރައްކާކުރެވޭވަރުގެ 2 ޓޭންކް ބަހައްޓާ ފެން ގުޅައިދިނުމުގެ މަސައްކަތް ކުރަން ވަނީ ހަމަޖެހިފައެވެ.
މީގެއިތުރުން މި އެއްބަސްވުމުގެ ދަށުން މާފުށީ ހިއްކި ސަރަހައްދުގައި ނަރުދަމާ ގާއިމުކުރުމުގެ އިތުރުން މާފުށީގައި މިހާރު މީހުން ދިރިއުޅޭ ސަރަހައްދުގައިވެސް ނަރުދަމާގެ ނިޒާމު ގާއިމުރާނެކަަމަށް ހައުސިން މިނިސްޓްރީން ބުނެއެވެ. މާފުށީގައި މިހާރު ބޭނުން ކުރަމުން އަންނަނީ 2004 ގައި އެޅި ނަރުދަމާގެ ނިޒާމެކެވެ.
ކ.މާފުށީގެ ފަޅުން 25 ހެކްޓަރުގެ ބިން 2021 ވަނަ އަހަރު ވަނީ ހިއްކާފައެވެ. އަދި 1100 ހެކްޓަރުގެ ސަރަޙައްދު ވަނީ ޙިމާޔަތްކޮށްފައެވެ. މި ޕްރޮޖެކްޓް ކުރިއަށްގެންދިޔައީ، ހިއްކި ސަރަޙައްދު މާފުއްޓާ ކޯސްވޭއަކުން ގުޅާލާގޮތަށެވެ. ހިއްކި ސަރަހައްދުން 2000 އަކަފޫޓްގެ 308 ގޯތި ވަނީ ދޫކުރަން ނިންމާފައެވެ.
