މި މައްސަލައިގައި ފުލުހުން ހައްޔަރުކޮށްފައި ވަނީ އުމުރުން 30 އަހަރުގެ ދިވެހި ފިރިހެނެކެވެ. އޭނާގެ ބަންދާ މެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން، ކޯޓުން ވަނީ ކަސްޓޯޑިއަލް ޖަލެއްގައި ފަސް ދުވަހުގެ މުއްދަތަށް އޭނާ ބެހެއްޓުމަށް އަމުރުކޮށްފައެވެ.
މި މީހާގެ މައްޗަށް ކުށުގެ ތުހުމަތު ކުރެވޭ މިންވަރަށް ފުލުހުން ކޯޓަށް ހެކި ހުށަހަޅާފައިވާ ކަމަށް ކޯޓު އަމުރުގައި ބަޔާންކޮށްފައިވެއެވެ. ހެކީގެ ގޮތުގައި ހުށަހަޅާފައިވާ ލިޔެކިޔުންތަކުގެ ތެރޭގައި މައްސަލަ ހުށަހެޅި ފަރާތުގެ ބަޔާނާއި، ސްކްރީން ޝޮޓްތައް ހިމެނެއެވެ. މީގެ އިތުރުން ފުލުހުން ބޭންކް އޮފް މޯލްޑިވްސް އާއި މޯލްޑިވްސް އިސްލާމިކް ބޭންކަށް ފޮނުވާފައިވާ އީމެއިލްތަކާއި އެ އީމެއިލްތަކުގެ ޖަވާބުތައް ވެސް ހެކީގެ ގޮތުގައި ވަނީ ހިމަނާފައެވެ.
މި މައްސަލައިގައި ހައްޔަރުކުރި މީހާއަކީ މީގެ ކުރިން ބަންދު ރެކޯޑެއް އޮތް މީހެއް ނޫން ކަން ކޯޓު އަމުރުން އެނގެން އޮތް ކަމަށް ވެސް މައުލޫމާތު ލިބެއެވެ. ފަހަކަށް އައިސް ރާއްޖޭގައި ސްކޭމްގެ މައްސަލަތައް އިތުރުވެފައިވާއިރު، މިފަދަ ކަންކަން ހުއްޓުވުމަށް ކަމާބެހޭ އިދާރާތަކުން އަންނަނީ މަސައްކަތްކުރަމުންނެވެ.
