އޭނާ މިހެން ވިދާޅުވީ، ހެއްކާބެހޭ ގާނޫނަށް ސަރުކާރުން ހުށަހަޅާފައިވާ އިސްލާހުތަކުގެ ބަހުސްގައި ވާހަކަ ދައްކަވަމުންނެވެ. ޒިޔާދު ވިދާޅުވީ ގާނޫނުތަކަށް ޒަމާނީ ބަދަލުތައް ގެންނަން ޖެހުނު ނަމަވެސް، ޝަރުއީ ދާއިރާއަށް ބޭނުންވާ އަސާސީ އިސްލާހުތައް ނުގެނެވި ލަސްވަމުންދާ ކަމަށެވެ.
މެމްބަރު ޒިޔާދު ވަނީ ސަރުކާރަށްވެސް ފާޑުވިދާޅުވެފައެވެ. އޭނާ ވިދާޅުވީ، މި ސަރުކާރުން ޝަރުއީ ދާއިރާ މިނިވަން ކުރާނެ ކަމަށް ވައުދުވި ނަމަވެސް، ކަން ހިނގައިދިޔަ ގޮތް ރައްޔިތުންނަށް ސާފުވާނެ ކަމަށެވެ. އެކަމުގެ މިސާލެއްގެ ގޮތުން ސުޕްރީމް ކޯޓުގެ ފަނޑިޔާރުން ވަކިކުރުމުގެ މަރުހަލާ ކުރިއަށްދިޔަ ގޮތް އޭނާ ފާހަގަކުރެއްވިއެވެ.
.
ސަރުކާރުގެ ފަރާތުން ހެއްކާބެހޭ ގާނޫނަށް އިސްލާހު ހުށަހެޅީ ޖިނާއީ އަދި މަދަނީ މައްސަލަތަކުގައި ދިމާވާ ދަތިތައް ހައްލުކުރުމަށާއި ނޫސްވެރިންގެ މަސްދަރު ހިމާޔަތްކުރުން ފަދަ ކަންކަމަށް ހައްލެއް ގެނައުމަށެވެ. މި ބިލުގައި އިލެކްޓްރޯނިކް ހެކި ފަދަ އާ ބާވަތުގެ ހެކިތަކާ ގުޅޭ އުސޫލުތައް ހިމަނާފައިވެއެވެ. ނަމަވެސް ޒިޔާދު ދެކެވަޑައިގަންނަވާ ގޮތުގައި، މިފަދަ ގާނޫނީ ބަދަލުތަކަކީ މުހިންމު ކަމެއް ނަމަވެސް، ޝަރުއީ ނިޒާމުގެ ބިންގަލުގައިވާ މައްސަލަތައް ހައްލުކުރެވޭނީ މަޖިލީހުގެ ތެރެއިން ހުރިހާ މެމްބަރުންވެސް ހެޔޮ ނިޔަތުގައި މަސައްކަތްކޮށްގެންނެވެ.
