ސުބުހާނައްﷲ އެވެ. އަމާރާއަށް މި ޖެހުނީ ކުޑަ ކަމެއް ނޫނެވެ.
ރެއިލްވޭ ސްޓޭޝަންއަށް އަމާރާ ގޮވައިގެން ދިއުމަށް ރާފީ އެހުރީ ތައްޔާރަށެވެ.
"ދޮންތާ..! ދޮންތަ ސްޓޭޝަނަށް ދާންވާނީ އަހަރެނާއިއެކު..! އެކަހަލަ ތަންތަނަކީ އަންހެންކުދިންނަށް މާ ރައްކާތެރި ތަންތަނެއް ނޫން..!" އަނގަޔަށް ކާއެތިކޮޅުލަމުން ރާފީ ބުނީ ދޮންތައަށްޓަކައި ކަންބޮޑުވެފަ އެވެ.
އަމާރާ ދިރުވާލި ކާއެތިކޮޅު ކަރުގައި އަޅައިގަތީ ފެނާއި ނުލައި ދިރުވާލީތީކީ ނޫނެވެ. ދެ ލޯ ބޮޑުވެ ކަޅި އަރާފައި އެއިނީ، ރާފީގެ އަޑުގައި ހުރި ސީރިޔަސްކަމުގެ ސަބަބުންނެވެ.
ހަގީގަތަކީ ކޮބައިކަން ބުނާނެ ހިތްވަރެއް އަމާރާގެ ނެތެވެ. ޝައްޔާންގެ ކާރުގައި އޭނާ، އަމާރާއަށް އިންތިޒާރު ކުރާނެ އެވެ.
"ނޯ..! ކީއްކުރަން ރާފީ ދާން ވީ..؟ މިއަދުވެސް ރާފީގެ ކިޔެވުން އެބައޮތް! ދޮންތައަށްވެސް އެތަންތަނުގައި އުޅޅެން އިނގޭނެ... ދޮންތަވެސް ކިޔެވީ އިންޑިއާގައި ދޯ؟" ހަމަޖެހިލާ ގޮތް ދައްކާލަމުން އަމާރާ ބުނެލި އެވެ.
މަންމަގެ އެއްބުމަ މައްޗަށް ހިއްލާލާފައި ތަފާތު ނަޒަރަކުން ބަލައިލިކަން އަމާރާއަށް އެނގުނެވެ. ނަމަވެސް ފެންނަކަމަށް ނުހެދީ އެ ބުނަންއުޅޭ އެއްޗެއް އަޑުއަހަން މިވަގުތު ބޭނުންނުވާތީ އެވެ.
"އަމޫ، ދަރިފުޅާ..! ރާފީ ދާންއޮތީ ހަވީރު! އޭގެ ކުރިން ކިތަންމެ ރަގަޅަކަށްވެސް ދަރިފުޅު ގެންގޮސް ސްޓޭޝަނަށް ލާފައި ރާފީއަށް ދެވޭނެ.. ރާފީގެ ޒިންމާ އަދާކުރަން އޭނާއަށްވެސް ފުރުސަތު ދީބަލަ!"
މަންމަގެ ލޯތްބާއި ކޮއްކޮގެ އޯގާތެރިކަން ބޮލާލައިޖަހާނެ ހިތްވަރެއް އަމާރާގެ ނެތެވެ.
ތެދު ބުނާނެ ގޮތެއްވެސް ވިސްނުމަކަށް ނައި އެވެ.
އަތުގައި އޮތް އާޓާ ރޮށިން، ގަދަކަމުން އެތިކޮޅެއް ނައްޓާލާފައި ތަރުކާރީ ރިހައިގައި ޖައްސާލާފައި އަމާރާގެ އަނގަޔަށް ލި އެވެ. އަދި ގަދަކަމުން ހިނިތުންވެލާފައި މަންމައާއި ދިމާއަށް ބަލައިލި އެވެ.
ރަގަޅެވެ! ވަރަށް ރަގަޅެވެ!
ހުރިހައި ދިމާއަކުން މަޅީގައި ބެދެން މިޖެހުނީ އަމާރާ އެވެ.
ދަންތުރަ ޖެހީ ޝައްޔާން އެވެ. ކުޑަމިނުން ޝައްޔާންގެ ނަންވެސް އަމާރާގެ ކުޑަކުޑަ އާއިލާގެ ކުރިމަތީގައި ބުނެލެވެން ނެތުމަކީ ދެރަވަރުގެ ކަމެކެވެ.
ދެން ހަދާނީ ކިހިނެއް ހެއްޔެވެ؟ ފިލަން ވަންނާނީ ކޮންތާކަށް ހެއްޔެވެ؟
ނާސްތާ ނިންމާލާފައި ތަށިތައްވެސް ދޮވެލުމަށްފަހު އެކަހެރިވެލާނެ ގޮތެއް އަމާރާ ވިސްނި އެވެ. ފޯނު ހިފައިގެނން ބެލްކަންޏަށް ނިކުތީ މަންމަ ނުވަތަ ކޮއްކޮގެ އިޝަރާތެއް ވޭތޯ ބަލަމުންނެވެ. ދެކޮޅު ބަލާލާފައި އަވަސްއަވަހަށް، ޝައްޔާންއަށް ޑައިލްކޮށްލި އެވެ.
"މިސް މީ އޯލްރެޑީ، ފުށްގުޑީ؟" ފުރަތަމަ ރިންގުން ޝައްޔާން ފޯނު ނަގައިފި އެވެ.
"ޝައްޔާން، އައި އެމް ޑެޑް!" ރެއޮގެންފައި ކަހަލަ ގޮތަކަށް ސިއްރު ސިއްރުން އަމާރާ ބުނެލި އެވެ.
"ހޫމްހޫމްމްމް.. ޑްރާމާ ކުއީން!! ޓެލް މީ..! ކިހިނެއްވީ؟" ސީރިއަސްކަމާއެކު ޝައްޔާން ސުވާލުކުރި އެވެ.
"އަހަރެން ސްޓޭޝަނަށް ލާންދާން، ރާފީ ހުރީ ވިއްދާލާފައި..! މަންމަ ހުރީ ރާފީއާއި އެއްކޮޅަށް.. އަހަރެން ނޫނެކޭ ބުނެ، ދެކޮޅު ހަދައިފިއްޔާ ދެމީހުންނަށްވެސް ޝައްކުވާނެ!" ހާސްކަމާއެކު އަމާރާގެ ހާލަތު ބުނެދިނެވެ.
"ސްމާޓް ކިޑް!" ޗޮކެއް ކަންޑާލާފާއި ޝައްޔާން ބުނެލި އެވެ.
"ޝަޓް އަޕް- ވަޓް ޑޫ އައި ޑޫ؟"
"ސިމްޕަލް!"
ހާސްކަމެއް ނެތި ޝައްޔާންގެ ނިންމުން ބުނެލީ އޭނާގެ އާދައިގެމަތިންނެވެ.
"ރާފީއާއެކު ސްޓޭޝަންއަށް ދޭ..! އަ'އިލް ހެނޑްލް ދި ރެސްޓް!" ޝައްޔާންގެ އަޑާއި ރާގުގައި ހާސްކަމެއް ނެތެވެ.
"ހުވާކޮށްފާ ބުނަން- - - މިފަހަރު މިކަންތަކުގައި ގަޑުބަޑެއް ހިންގައިފިއްޔާ..
"ރިލެކްސް، ޑޮކްޓަރ ފުށްގުޑީ!" އަމާރާގެ ޖުމުލަ ނިންމަން ޝައްޔާން ފުރުސަތެއް ނުދިނެވެ.
"އެތަނަށް ދިޔާމައި، އޭގެ ފަހުން ހުރިހައި ކަމެއް އަހަރެން ހަމަޔަކަށް އަޅުވާނަން.. އިތުބާރުކުރޭ..!! މިއަދުގެ ފަހުން މިކަހަލަ ކަންކަމަށް އަމާރާ ވަރަށް ފައްކާވާނެ..!"
ޝައްޔާންގެ ބުނެލުމުގައި ފޮރުވިފައިވާ ސިއްރެއް އަމާރާގެ ސިކުނޑިއާއި އޭނާގެ ފިކުރާއި ވިސްނުމާއި ހަމައަށް އައުމަށް ހިތަށްވެސް ނޭރި އެވެ. އަމާރާގެ ހަޔާތަށް ކުރިމަތިވަމުން އަންނަ ބާރުގަދަ ރޯޅީގެ ހިލަމެއްވެސް އޭނާއަށް ނުވަނީ އެވެ.
...............
(ރެއިލްވޭ ސްޓޭޝަން)
ބައިބޯވެ ތޮއްޖެހިފައިވާ، މީހުންގެ ތެރޭގައި ހަމަޖެހިލައިގެން މަޑުކޮށްލެވޭނެ ޖާގައެއްވެސް އަމާރާއަށް ނުފެނުނެވެ. ހޫނުގަދަކަމާއިއެކު ލިބިފައިވާ ނުތަނަވަސްކަމުގެ ތެރެއިން ނޯއްދަމާލަން ނުކެރޭވަރުގެ 'ވަސް' އޭނާގެ ހިއްސުތަކުގައި ލޮނުމިރުސް އަޅަމުންދިޔަ އެވެ. ހުރި ފިޔަވަޅުމަތީން ކޮންމެ ދިމާއަކަށް ޖެހިލިޔަސް، ލައިގަންނަނީ، ދަހިއްލާ ފޯވެފައިވާ ކޮންމެވެސް މީހެއްގެ ގައިގަ އެވެ. ކޮނޑުގައި އޮތް ދަބަހުގައި ބާރަށް ހިފަހަށްޓަމުން އަތުގައި އަޅާފައިވާ ގަޑިއަށް، ކޮންމެ ތިރީސް ސިކުންތަކުން ބަލައިލެވެމުންދިޔައީ އޭނާއަށް އެނގިގެން ނޫނެވެ.
ދުވަހެއްގައިވެސް ނިއްކުރިން ނުހިއްލާވަރަށް ދާބޮކިތައް ހިއްލާލާފައިވާކަމެއްވެސް އަމާރާއަކަށް ނޭގެ އެވެ. ނުތަވަސްކަމުގެ އިހްސާސަކީ މިވަރުގެ ވޭން އަޅާކަމެއްކަން އަމާރާއަށް މީގެކުރިން އެނގިފައި ނުވާކަމަށް އޭނާގެ ޑައިރީގައިވެސް މިއަދު ލިޔާނެ އެވެ.
މޭދަށުގައި ދެއަތް ހުރަސްކޮށްލައިގެން ރާފީހުރީ އަމާރާގެ ބޮޑީގާޑެއް ފަދައިން ދާދި ގާތުގަ އެވެ.
އެމީހުން ހުރަސްކޮށް، ދަތުރަށް އަރަމުންދިޔަ އެތަށް ބައެއްގެ ހަރަކާތްތަކާއި، ދިގުދަތުރަށް ފުރަމުންދިޔަ ރެއިލްތައް ރާފީ ފާހަގަކުރަމުން ދިޔަ އެވެ.
"ދޮންތާ.. ދޮންތަގެ ރެއިލް ނައްޓާލަނީ ކޮން ޕްލެޓްފޯމަކުން..؟" ވިސްނާލާފައި ރާފީ ސުވާލުކުރި އެވެ.
"ހައ..! އުމް..!" ބުނާނެ އެއްޗެއް ދޫމަތީގައި ނެތުމުން، އަމާރާގެ ބަސް ހުސްވެއްޖެ އެވެ.
"އިޓްސް... ލޭޓް... ޔޫ ޑޯންޓް ހޭވް ޓު ވެއިޓް!" ވަށައިގެން ފެންނަ ހަލަބޮލިކަމަށް ބަލަމުން އަމާރާ ބުނެލި އެވެ.
"އޯފް ކޯޒްޒޒޒ، އަ،އިލް ވެއިޓް!" ގޮތްދޫނުކުރާނެކަން ދައްކާލަމުން ރާފީ ބުނެލި އެވެ.
"ކުޑަމިނުން، ދޮންތަގެ ޓްރެއިން ނާންނީސް، މިތަނުން ގުޑާވެސް ނުލާނަން..!" ހުރިފިޔަވަޅުމަތިން ދުރަށް ނުދާނެކަން އަންގާލުމަށް ރާފި ދައްކާލީ އޭނާގެ ބޫޓެވެ.
ލިބުނު ޖަވާބާއެކު އަމާރާ ދަތްކުނޑިވިކާލި އެވެ. ހިތާއި ދުލާއި ސިކުނޑިން އަޑެއްބަޑެއް ލައްވާނުލިޔަސް، އަމާރާ އެތިވަރު ކިޔަމުންދިޔައީ ޝައްޔާންއަށެވެ.
ހަމަ އެވަގުތެވެ.
އިވުނީ، ވަރަށް ފަރިތަ އަޑެކެވެ.
"އޯހ.... ރާފީ އާރިޒް ފަހުމީ، މިތާގައި ކީއްތިކުރަނީ..؟"
އިވުނު އަޑާއެކު ކުއްލިޔަކަށް ރާފީ އެނބުރުނީ އެ އަޑު އައި ދިމާއަށެވެ.
ލިބުނީ ޝޮކެކެވެ! ނުވަތަ އެ ޖެހުނީ ހާޓް އެޓޭކް އެކެވެ!
ކުރިމަތީގައި އެހުރީ ޝައްޔާން ޔޫސުފް ރައިޒާދް އެވެ.
ރާފީގެ އެންމެ މަގްބޫލް ތަރި އެވެ.
ހޫޑީއާއި ތޮފި އަދި ލޮލުގައި އަޅާފައިވާ ކަޅުއައިނުގެ ބޭނުމެއް ނެތެވެ.
އެއަޑާއި އެ ހަށިގަނޑާއި އެ ސޫރަ ރާފީއަކަށް ނޯޅޭނެ އެވެ.
އެއީ ޝައްޔާން އެވެ.
ކޮންމެ ޒުވާނެއްގެ އެންމެ މަގުބޫލު ތަރި އެވެ.
ނަމަވެސް ލިބުނު ޝޮކްގައި އަނެއްކާވެސް ހުއްޓުންއެރީ، ރާފީގެ ފުރިހަމަ ނަމާއި އޭނާ ޝައްޔާންއަށް އެގުނު ގޮތެއްގެ ބަހުސާއި އެކު އެވެ.
"ޝައްޔާން ޔޫސުފް ރައިޒާދް..؟ ވަޓް އަ ސަޕްރައިޒް..؟" ރާފީގެ ވަށައިގެން ހިނގަމުންދިޔަ އެއްވެސް ކަމެއްގެ އިޝަރާތެއްވެސް ނެތެވެ.
އުފާވެރި ހިނިތުންވުމަކާއެކު ފުންމައިގެން ގޮސް ޝައްޔާންގެ ގައިގައި ބައްދައިގަނެވުނީ އިހްތިޔާރަކު ނޫނެވެ.
ދެމީހުންގެ ބައްދާލުން، އެހެން މީހެއްގެ ދަތްދޮޅި ބިމުގައި ޖެހިފައިވާކަމެއް އެ ދެ މީހުންނަށް ރެއަކާވެސް ނުލަ އެވެ.
ނިއްކުރިއަށް ރޫ އަރުވާލެވުނީ ރާފީގެ ހިތަށް އެރި އެއްޗަކުންނެވެ.
"މިތާގައި... ކީއްތޯ ތިކުރައްވަނީ..؟" ހައިރާންވެފައި ރާފީ ސުވާލުކުރި އެވެ.
ޖެހިލުންވުމުގެ ބަދަލުގައި ޝައްޔާން، އެއްމިޔަކަނުން ހީނލާފައި އަމާރާއާއި ދިމާއަށް ބަލައިލިގޮތުން، އަމާރާގެ ލޭ ކެކިގެންފި އެވެ.
"އޯހހ.. މި އައީ.. ވަރަށް ހާއްސަ ޕެސެންޖަރަކު ބަލައި!" ލޮލުގެ ހިމަކޮޅުން އަމާރާއަށް ބަލައިލަމުން ޝައްޔާނން ބުނެލި އެވެ.
ހަމައެވަގުތު ރާފީ އެނބުރުނީ އަމާރާއާއި ދިމާއަށެވެ. އެއްބުމަ މައްޗަށް ހިއްލާލަމުން އަމާރާއާއި ގާތަށް ދެފިޔަވަޅެއް ރާފީ ގާތްވެލި އެވެ.
"ދޮންތާ..! ދޮންތަގެ ޓްރެއިން، މިއަދު ވަރަށް ހާއްސަ ދޯ؟"
'އޯހ.. ނޯ...' އަމާރާގެ ހިތާއި ސިކުނޑި އަރާރުންވެއްޖެ އެވެ. ހުރިފިޔަވަޅު މަތީގައި ހަރު ހިލައަށް ވެއްޖެކަމެއް އަމާރާއަށް ނުވެސް އެނގުނެވެ. (ނުނިމޭ)
