ހުމުގެ އެއްވެސް އަސަރެއް މިހާރު ނެތްކަން ޝައްޔާންގެ ލޮލާއި އޭނާގެ ހަރަކާތުން އަމާރާ ދެނެގަތެވެ. އެހެނެއްކަމަކު، ވަރުބަލިކަމާއި ލޮޑުކަން ސާފުކޮށް ފެނެ އެވެ.
"ވައި އާރ ޔޫ ހިއަރ، ޑޮކްޓަރ ފުށްގުޑި..؟" ލޮޑުކަމާއި ހިމޭންކަމާއެކު ޝައްޔާން މޯޅިއަށް ދެމިލި އެވެ.
"މިސްޑް މީ އޯލްރެޑީ..؟" ދިމާކޮށްލުމަށް ފާޅުގައި ޝައްޔާން އެއް ލޯ މަރައިލި އެވެ.
އަތުގައި ހުރި ބޭސްކޮތަޅު މޭޒުމަތީގައި ބަހައްޓަމުން، އަމާރާގެ ލޮލުގެ ކަޅި އަނބުރާލާފައި ޝައްޔާންއާއި ދިމާއަށް ބަލައިލި އެވެ.
"ދިރިހުރިތޯ ނޫންތޯ ބަލައިލާން މިއައީ..؟" އަމާރާގެ ބަލައިލުން ކިތަންމެހާވެސް ތާޒާ އެވެ. ހެނދުނުގެ ތާޒާ ފިނިކަމަށް ފަރިވެފޮޅިފައިވާ ފިނިފެންމަލެކޭ އަމާރާގެ ހިނިތުންވެފައިވާ މޫނެކޭ ތަފާތެއް ނެތެވެ.
"ކަމަނާގެ އޯގާތެރިކަމާއި ތިޔަ އަޅައިލުމާއި ކުލުނު، މިހިތުގެ އެންމެ ފުންމިނުން ބަލައިގަންފިން..!" މެއަށް އިޝާރާތްކޮށް ޝައްޔާން ބުނެލީ ޑްރާމާގޮތަކަށެވެ.
ޝައްޔާންގެ ވާހަކައާއި ދައްކަމުންދިޔަ ލާނެއްކަމަށް އަމާރާ އަޅާވެސް ނުލި އެވެ. ކޮންމެވެސް އެއްޗެއް ބުނުމަށް އަނގަހުޅުވާލި ވަގުތު، އަމާރާގެ އަތުގައި އޮތް ތަރމޯމީޓާރ ޝައްޔާންގެ އަނގައަށް ކޮށްޕާލާފައި އަތުން އިޝާރާތްކުރީ ހިމޭނުން އޮތުމަށެވެ. އިތުރު އެހެން ގޮތެއް ނެތުމުން ބަސްއަހާކުއްޖަކު ފަދައިން ޝައްޔާން ހިމޭންކަމާއެކު އަމުރަށް ތަބާވާކަން ދައްކާލި އެވެ.
"އުމްމްމްމްމމ.." ކޮންމެވެސް އެއްޗެއް ބުނުމަށް ޝައްޔާން އަނެއްކާވެސް އުޅެންފަށައިފި އެވެ. ހަމައެވަގުތު އަމާރާގެ ދެލޮލާއި މޫނާއި ދެއަތުން އިޝާރާތްކޮށް ޝައްޔާން މައިތިރިވުމަށް އަމުރުކުރި އެވެ
"ޝަޓް އަޕް ފޯ ވަންސް!"
ޑްރާމާގެ ކުޅިގަނޑަކަށްފަހު ޝައްޔާން މައިތިރިވެ، އަމާރާގެ ޑޮކްޓަރ ޑިއުޓީ އަދާކުރުމަށް އޭނާއަށް ފުރުސަތު ދީފި އެވެ. އަނގައިން ތަރމޯމީޓާރ ދަމައިގަތުމަށްފަހު، ޗެކްކުރަމުން އަމާރާ ބޯ ޖަހައިލި އެވެ.
"އަލްހަމްދު ލިއްލާހި..! ހުމުގެ އަސަރެއް އެއްގޮތަކަށްވެސް މިވަގުތު ނެތް..! އެކަމަކު އަރާމުކުރުން ވަރަށް މުހިއްމު! ޑޫ ރެސްޓް- ޕްލީޒް!" އަމާރާ ބުނެލީ އޯގާތެރިކަމާއެކު އެވެ.
"އަރާމްކުރަންޖެހޭނީ ބަލި މީހުން!" ޝައްޔާން ބުނެލި އެވެ.
ހަމަވަގުތުން އަމާރާ މޭ ދަށުގައި ދެއަތް ހުރަސްކޮށްލި އެވެ.
"އެހެންވީމާ ވަރަށް ބޮޑަށް މަރުހަބާ! މިވަގުތު އަޅުގަނޑު ދަންނަ އެންމެ ބަލި މީހަކީ ޝައްޔާން ޔޫސުފް ރައިޒާދް!" އެއްބުމަ ހިއްލާލަމުން އަމާރާ ބުނެލި އެވެ.
"އައުޗް..! ދެޓް ހަރޓް މޯ ދެން ދި ފީވަރ!"
ކޮލު ދަތްތައް ފެންނަވަރަށް ޝައްޔާން ހީނލާފައި ބުނެލި އެވެ.
ހަމަ ވަގުތުން ޝައްޔާންގެ އަތުގެ މުލައްދަނޑީގައި އަމާރާ 'ބޮނޑިއެއް އަޅުވާލި' އެވެ.
"ބޭސް ކާންވީގޮތް ހުންނާނީ ލިޔެފައި.. ގަޑިން ގަޑިއަށް ބޭސްކާންވާނެ! އެންޑް ޑޯންޓް ސްކިޕް މީލްސް! އިން ޝާ ﷲ ޑިއުޓީ ނިންމާފައި އަންނާނަން..!" އަމާރާގެ ޖުމުލަ ނިމުނު އިރު، ދޮރާއި ދިމާއަށް ހިނގައިގަތުމަށް އޭނާ އެނބުރިލައިފި އެވެ. ހަމަ އެވަގުތު އަމާރާގެ އަތުގައި ޝައްޔާން ހިފެހެއްޓީ ހުށިޔާރުކަމާއެކު އެވެ.
"ވެއިޓް! ޕްލީޒް!"
އެއްބުމަ ހިއްލާލާފައި ޝައްޔާންއާއި ދިމާއަށް އަމާރާ ބަލައިލި އެވެ.
"ޔޫ'އަރ ރިއަލީ ވޮރިޑް އެބައުޓް މީ، އަހއ..؟" ހިމޭންކަމާއި މަޑުމައިތިރިކަމާއެކު ޝައްޔާން ސުވާލުކުރި އެވެ. ހަގީގަތުގައިވެސް އޭނާގެ ހާލާއި މެދުގައި އަމާރާ ކަންބޮޑުވެފައިވޭތޯ އޮޅުންފިލުވުމަށް ބޭނުންވެގެންނެވެ.
އަމާރާގެ މޭގައި ދަތުރުކޮށްލީ ހޫނު އޮއެވަރެއްގެ އިހްސާސްތަކެވެ. ނަމަވެސް ޖަޒްބާތުތަކުގައި މަތިއަޅައި ފޮރުވާފައި 'ޗޮކެއް ކަނޑައިލި' އެވެ.
"މާބޮޑަށް ފްލަރޓްކުރުމަކީ، ސިއްހަތަށް ފައިދާހުރިކަމެއް ނޫން، ސްޕަރސްޓަރ..! އިފް ޔޫ ޑައި، ހޫ ވިލް އެނޮއި މީ..؟" އަމާރާގެ ނިންމުމާއި އޭނާގެ ދުލުން ބޭރުވި ހުސް ބަސްތަކުގައި ހުރީ ކިހައި ބަރުމިނެއްކަން ޝައްޔާންގެ ވިސްނުން ތޫނު ސިކުނޑިން ދެނެގަންނާނެކަން، އަމާރާއަށް އަންދާޒާވެސް ނުކުރެވުނެވެ.
އެއްމިޔަކަނުން ހިނިއައިސްފައި ޝައްޔާން ބަލަން އިނީ ލާނެއް ގޮތަކަށެވެ. އޭރުވެސް އަމާރާގެ އަތުން އޭނާ ދުލެއް ނުކުރެ އެވެ.
"ސޯ، އައި އެމް އިމްޕޯޓަންޓް ޓު ޔޫ..؟" އަމާރާގެ ދުލުން ހާމަކުރަން ފަސްޖެހުނު ޖުމުލަ، ސުވާލެއްގެ ގޮތުގައި ޝައްޔާން ހުށަހަޅައިލީ ޖެހިލުމެއް ނެތި އެވެ.
ތެދެކެވެ! އަމާރާއަށް ޝައްޔާންގެ މުހިއްމުކަމާއި ހައިސިއްޔަތު، ދުލުން ހާމަކުރާކަށް ނުވެސް ޖެހެ އެވެ. އަމާރާގެ އޯގާތެރިކަމާއި އަޅާލުމާއި، އޭނާގެ ކޮންމެ އެހީތެރިކަމެއް ހެކިދެނީ، އަމާރާއަށް ޝައްޔާން މުހިއްމުވާ މިންވަރެވެ.
ދޭނެ ޖަވާބެއް ނެތި އަމާރާ ހުއްޓުންއެރީ އެބުނި ބުނުމަށް އިންކާރުކުރާނެ ހިތްވަރެއް ނެތިގެންނެވެ.
ޝައްޔާންގެ އަތުން، އަތް ދަމަގަތްފައި އަމާރާ ހިނގައިގަތީ ދިގުފިޔަވަޅު އަޅަމުންނެވެ.
"ޖަސްޓް ޓޭކް ކެއަރ އޮފް ޔޯ ސެލްފް!!" ފަސްއެނބުރި ބެލުމެއް ނެތި އަމާރާ ހިނގައްޖެ އެވެ.
އޭނާއާއި ދިމާއަށް ޝައްޔާން ބަލަހައްޓައިގެން އިން ލޯބި ގޮތާއި ތުންފަތްމަތީގައިވީ އިޝްގީ ހިނިތުންވުމުގެ ކުޑަވެސް އިޝާރާތެއް ނެތި އެވެ.
އަހަރުތަކެއްގެ ދިގު މާޒީއަށްފަހު ޝައްޔާންއަށް ކުރެވެމުންދިޔަ އިހްސާސްތައް ހިއްސާކުރާނެ މީހަކު މިވަގުތު އޭނާގެ ގާތުގައި ނެތެވެ. އެކަނިވެރިކަމާއި ހަލަބޮލިކަމުގެ ތެރެއިން އޯގާތެރިކަމާއި ލޯތްބާއި އަޅައިލުން ޝައްޔާންއަށް އިހްސާސްވި މިއީ ފުރަތަމަ ފަހަރެވެ.
............
މާޒީވަމުންދިޔައީ ދުވަސްތަކާއި މަސްތަކެވެ. ބަދަލުވަމުންދިޔައީ ދުނިޔޭގެ ހަލަބޮލިކަމުގެ ތެރެއިން އަންނަމުންދިޔަ ބަދަލުތަކެވެ. ވިސްނުމާއި ފިކުރާއި އިހްސާސާއި ޖަޒްބާތަކީ، އިންސާނުންގެ އަމިއްލަ އިހްތިޔާރީ ފިކުރުތަކެވެ. ލޯތްބާއި އޯގާތެރިކަމަކީ އިންސާނީ ތޮބީއަތުގެ ޒަރޫރީ ބިންގަލެވެ. ރީއްޗާއި ތަނަވަސްކަމަށް 'ހިތް ކިޔާ ފަދައިން' އޯގާތެރިކަމާއި އަޅާލުމާއި މިންވަރެއް ނެތި އިހްތިރާމް ލިބެމުންދާނަމަ، އިންސާނަކު އެއަށް ނުލެނބި ހިނގައިދާނެ ހެއްޔެވެ؟
ޝައްޔާންގެ ސިއްހަތާއި އޭނާގެ ކެއުމާއި ނިދުމާއި ގުޅުންހުރި ކަންކަމުގެ ފުރިހަމަ ޒިންމާ އަމާރާ ނެގިތާ ކިތަންމެ ދުވަހެކެވެ. ޝައްޔާންއަށް ލިބުނު އެންމެ ބޮޑު 'ޝޮކް އަކީ' އަމާރާގެ ކޮންމެ ހަރަކާތަކަށް، އަދި ކޮންމެ އިޝާރާތަކަށް ޝައްޔާންގެ ހިތް ލެނބެމުންދިޔަކަމުގެ ޔަގީންކަން ލިބުމެވެ.
ލިބުނު ކޮންމެ ފުރުސަތެއްގައި ޝައްޔާންގެ ހާލަތު އަމާރާ ދިޔައީ ބަލަމުންނެވެ. ނުރަގަޅު ކޮންމެ އާދައަކަށް 'އެއްޗެހިކިޔަމުން ދިޔައީ' އޯގާތެރި މަންމައެއް ފަދައިންނެވެ. ޝައްޔާންއާއި މުއާމަލާތުކުރުމާއި، ޝައްޔާންގެ ކަންކަމުގައި އަމާރާ އަމަލުކުރަމުންދިޔައީ އެއީ 'އެންމެ އާދައިގެ މީހެއް ފަދައިން'ނެވެ. ސްޕަރސްޓަރގެ ލަގަބަކީ އަމާރާއަށް މުހިއްމު އެއްޗެއް ނޫނެވެ.
ޝައްޔާންގެ ހާލަކީ ކޮބައިހެއްޔެވެ؟ އަމާރާގެ ކޮންމެ ހަރަކާތަކަށް އެދެވެން ފަށައިފި އެވެ. ކުޑަ މިންވަރަކަށް ނޫނެވެ! މާ ބޮޑަށެވެ! އިހްތިޔާރަކާނުލަ އެވެ.
.............
މިއަދަކީވެސް ތަފާތުކަމެއް ނެތި، އާދައިގެ ދުވަހެކެވެ. ވައިގަދަ ވިއްސާރަ މޫސުމަކަށްފަހު، އުޑުމަތި ސާފު ހިތްގައިމު ދުވަހެކެވެ. މަޑު ނޫ ކުލައިގެ އުޑުގައި ތަންކޮޅުކޮޅުގައި މަޑުޖެހިގެން މަންޒަރު ކުރަހަމުންދިޔަ ރިހިކުލައިގެ ސާފު ވިލާކޮޅުތައް އިންސާނުންގެ ސަމާލުކަން ހޯދަމުންދިޔަ އެވެ.
އަމާރާގެ މިސްރާބު ހުރީ ޝައްޔާންގެ ޕެންޓްހައުސްއާއި ދިމާއަށެވެ. ދިގު ޗުއްޓީއަކަށްފަހު ސްކޫލުތައް ހުޅުވުމާއެކު މަގުތަކުގެ ހަލަބޮލިކަން އިތުރުވެފައިވާ ހަވީރުގެ ވަގުތެވެ. އެތައް ލޮލެއް އެދިމާއަށް އަމާޒުވެފައި ވެދާނެކަމަށް އަމާރާ އަބަދުވެސް ފަރުވާތެރިވެ އެވެ.
ސްކޫޓީ ޕާކުކުރުމަށްފަހު، ދެފަރާތަކަށް ބަލައިލާފައި އަވަސްގޮތަކަށް އަމާރާ ގޮސް ވަނީ ޝައްޔާންގެ ގެއަށެވެ. އަތުގައި އޮތީ ކޮތަޅެކެވެ. އެތެރެ ނުފެނުނަސް އެއީ ޝައްޔާންއަށް ގެނައި 'ކޮއްތު'ކަން ޔަގީނެވެ.
އަމާރާގެ އިންތިޒާރުގައި ސިކުންތުތައް ގުނަމުންދިޔަ ޝައްޔާންއަށް، އަމާރާ ފެނުމާއެކު އާދައިގެ މަތިން އެއްމިޔަކަނުން ހިނިއައީ ލާނެއް ގޮތަކަށެވެ.
"ހާދަ އަވަހަކަށް އެނބުރި އައީ، ޑޮކްޓަރ ފުށްގުޑި..! ކިހިނެއްވީ؟ ބަލިމީހާ މަތިން މާބޮޑަށް ހަނދާންވަނީ..؟؟" އަރާމެއް ނެތި ރެއާއި ދުވާލު މަސައްކަތް ކުރުމުން ޝައްޔާންގެ ހާލު މިއަދުވެސް ރަގަޅެއް ނޫނެވެ.
ދެދުވަހު ގޭގައި މަޑުކޮށްގެން އިންނާންޖެހުމުންވެސް އެތައް ޝަކުވާއެއް ކުރި އެވެ. ނަމަވެސް އަމާރާ ހަތިޔާރު ނުބެހެއްޓުމުން، އަމާންދިނުން ނޫން ގޮތެއް ޝައްޔާންއަށް ނެތުނީ އެވެ.
ޝައްޔާންގެ ޖުމުލަ އަޑުއިވުމާއެކު ދެ ލޯ ވައްކޮށްފައި އޭނާއާއި ދިމާއަށް އަމާރާ ބަލައިލި އެވެ.
"އަނގަ މަޑުކޮށްފައި، ކެއުމަށް ސަމާލުކަންދީ..! އަހަރެން މިއައީ ޝައްޔާންއަށް ކައްކައިގެން..!" އަތުގައި ހުރި 'ކޮއްތު ޕެކް' ޝައްޔާންއަށް އަމާރާ ދިއްކޮށްލުމާއެކު ޝައްޔާން ހިމޭންވެ، ދެބުމަ އެކުގައި މައްޗަށް އުފުލާލި އެވެ. (ނުނިމޭ)
