ސަރުކާރުން ފެނަކައާ ހަވާލުކޮށްފައި ވަނީ ބ. ހިތާދޫ ސިއްހީ މަރުކަޒުގެ އާ އިމާރާތުގެ މަސައްކަތާއި މާޅޮހާއި ދޮންފަނު ސިއްޙީ މަރުކަޒު އަޕްގްރޭޑް ކުރުމުގެ މަސައްކަތެވެ.
އެގޮތުން ބ. ހިތާދޫ ސިއްހީ މަރުކަޒުގެ އާ އިމާރާތްކުރުމަށް ފެނަކައާ ހަވާލުކުރީ 33.7 މިލިޔަން ރުފިޔާއަށެވެ. މި މަސައްކަތް 730 ދުވަހުގެ ތެރޭގައި ނިންމަންޖެހެ އެވެ. އަދި ބ.މާޅޮހާއި ދޮންފަނުގެ ސިއްހީ މަރުކަޒު އަޕްގްރޭޑް ކުރުމުގެ މަސައްކަތް ފެނަކާ ހަވާލުކޮށްފައިވަނީ 12.1 މިލިޔަން ރުފިޔާއަށެވެ. އެ ދެ ތަނުގެ މަސައްކަތްވެސް 545 ދުވަހުގެ ތެރޭގައި ނިންމަންޖެހެ އެވެ.
މާޅޮހާއި ދޮންފަނުގެ ސިއްހީ މަރުކަޒު އަޕްގްރޭޑް ކުރުމުގެ މަސައްކަތުގެ ދަށުން ވޯޑަކާއި ޕްރައިވެޓް ރޫމް، ލެބޯޓްރީ، ނާސް ސްޓޭޝަން ތަރައްގީ ކުރާނެ އެވެ. އަދި ޕްރޮސީޖަ ރޫމް، ގަރާޖް އަދި ސްޓޯ ރޫމް އިތުރުކުރުމުގެ އިތުރުން ޕޯޓިކޯ އާއި ވަށާފާރު އިތުރުކުރުންވެސް މި މަސައްކަތުގެ ތެރެއިން ކުރިއަށްގެންދާނެ ކަމަށް ސަރުކާރުން ބުނެއެވެ.
މީގެއިތުރުން ހިތާދޫ ސިއްހީމަރުކަޒުގެ އާ އިމާރާތުގެ ޕްރޮޖެކްޓުގެ ދަށުން ވޯޑަކާއި، ލެބޯޓްރީ، ނާސް ސްޓޭޝަން، ޕްރޮސީޒާ ރޫމް، ލޯންޑްރީ އަދި ސްޓޯ ރޫމް އިތުރުކުރުމަށް ވަނީ ހަމަޖެހިފަ އެވެ.
