މި ހާދިސާ ހިނގާފައިވަނީ 18 އަހަރު ނުވާ ދެ ފިރިހެން ކުދިން ވަރަށް ބާރަށް ސައިކަލު ދުއްވަމުން ދަނިކޮށް، ކަސްރަތަށް ހިނގަން ގޮސް އުޅުނު ބައެއްގެ ގައިގައި ޖެހިގެންނެވެ. އެކްސިޑެންޓްގައި އަނިޔާވި ފަރާތްތަކަށް ފުރަތަމަ ފަރުވާ ދިނީ އުނގޫފާރު އަތޮޅު ހޮސްޕިޓަލުގަ އެވެ. އޭގެފަހުން އިތުރު ފަރުވާއަށް މާލެ ގެނެވުނު ދެ ކުދިންނާއި ޓީޗަރަށް ފުރަތަމަ ފަރުވާ ދެވުނީ ވެންޓިލޭޓަރުގަ އެވެ.
ހޮސްޕިޓަލްގެ މީޑިއާ އޮފިޝަލް "ސީއެންއެމް" އަށް މިއަދު ވިދާޅުވީ، ދެކުދިންނާއި ޓީޗަރު ވެސް މިހާރު ވޯޑަށް ބަދަލުކޮށްފައިވާ ކަމަށެވެ. އެ މީހުންގެ ހާލު އަންނަނީ ރަނގަޅު ވަމުންނެވެ.
މި ހާދިސާއާ ގުޅިގެން އެކްސިޑެންޓްވި ސައިކަލު ޓޯކޮށް، މައްސަލަ ތަހްގީގު ކުރަމުންދާ ކަމަށް ފުލުހުން ވަނީ ހާމަކޮށްފަ އެވެ. މި މައްސަލައިގެ އިތުރު ތަފްސީލު ލިބުމުން އާންމުކުރާނެ ކަމަށް ފުލުހުން ބުނެފައި ވެއެވެ.
