މިނިސްޓަރު މިކަން ހާމަކުރެއްވަމުން ވިދާޅުވީ ރާއްޖޭގައި ގިނަ އަދަދެއްގެ އުޅަނދުތައް ބޭނުންކުރަމުންދިޔަ ނަމަވެސް، މި އުޅަނދުތަކަށް އެކަށީގެންވާ ރައްކާތެރިކަމެއް ފޯރުކޮށްދެވިފައި ނުވާތީ މިކަމަށް ހައްލެއް ހޯދުމަށް އާރްއެފްއައިޑީ ނިޒާމު ތައާރަފްކުރުމަށް ނިންމާފައިވާކަމަށެވެ.
އާރްއެފްއައިޑީ ނިޒާމަކީ ކޮބާ؟
އާރުއެފްޑީއައި RFID (Radio Frequency Identification) ޓެކްނޮލޮޖީއަކީ ރޭޑިއޯ ފްރީކުއެންސީ މެދުވެރިކޮށް އައިޑެންޓިފިކޭޝަން ޗިޕްތަކުން މައުލޫމާތު ބަދަލުކުރެވޭ ނިޒާމެކެވެ. މި ޓެކްނޮލޮޖީގައި ހިމެނެނީ ކުދި ޗިޕްތަކާއި އެންޓެނާއެކެވެ. މި ޗިޕްތަކުގައި އެކި މައުލޫމާތު ރައްކާކުރެވޭނެއެވެ. ޚާއްސަކޮށް އުޅަނދުފަހަރުގައި ބޭނުންކުރާއިރު، ވެހިކަލްގެ ރަޖިސްޓްރޭޝަން، މިލްކުވެރިޔާގެ މައުލޫމާތު އަދި އެހެނިހެން މުހިންމު މައުލޫމާތު ހިމެނިދާނެއެވެ. އާރްއެފްއައިޑީ ރީޑަރެއް ކައިރިން މި ޗިޕް ދާއިރު، އެ ޗިޕްގައި ހުރި މައުލޫމާތު ކިޔައި، ސިސްޓަމަށް ގެނެވޭނެއެވެ. އުޅަނދުފަހަރުގައި މި ޓެކްނޮލޮޖީ ބޭނުންކުރުމުން ވަގު ނަންބަރު ޕްލޭޓްތައް ދެނެގަތުން، އުޅަނދު ވަގަށްނެގުން ހުއްޓުވުން އަދި ބާރު ސްޕީޑުގައި ދުއްވާ ވެހިކަލްތައް ދެނެގަތުން ފަދަ ކަންކަން ފަސޭހަވެގެންދާނެއެވެ.
ތަފާސް ހިސާބު:
ސަރުކާރުގެ ތަފާސްހިސާބުތަކުން ދައްކާ ގޮތުގައި މާލެ ސަރަހައްދުގައި އެކަނިވެސް 118,000 އަށްވުރެ ގިނަ އުޅަނދު ރަޖިސްޓްރީ ކުރެވިފައިވާއިރު މީގެ ތެރެއިން 70 ޕަސަންޓަކީ ދެފުރޮޅުލީ އުޅަނދުތަކެވެ.
ޓްރާންސްޕޯޓް މިނިސްޓަރު އަމީން
މި ނިޒާމަކީ ދުނިޔޭގެ އެހެން ގައުމުތަކުގައި ވެސް ކާމިޔާބުކަމާއެކު ބޭނުންކުރަމުންދާ ނިޒާމެއްކަން ފާހަގަކުރައްވަމުން، ރާއްޖޭގެ ދަތުރުފަތުރުގެ ނިޒާމު އިތުރަށް ހަރުދަނާކުރުމަށް މިފަދަ ޓެކްނޮލޮޖީތައް ބޭނުންކުރުމަކީ މުހިންމު ކަމެއްކަމުގައި މިނިސްޓަރު ވިދާޅުވިއެވެ.
މި ޓެކްނޮލޮޖީ ރާއްޖެއަށް ތައާރަފްކުރުމުގެ މަސައްކަތް ވަރަށް އަވަހަށް ފެށިގެންދާނެކަމަށާއި، މި ނިޒާމު ތައާރަފްކުރުމުން ރައްޔިތުންގެ މުދަލުގެ ރައްކާތެރިކަން އިތުރުވެ، ތަންފީޒީ އިދާރާތަކަށް މަސައްކަތްތައް ފަސޭހަވެގެންދާނެކަމަށް މިނިސްޓަރު ފާހަގަކުރެއްވިއެވެ.
