މިދިޔަ މާޗު މަހު ހުޅުވާލި މި ފުރުސަތުގެ އެޕްލިކޭޝަން މުއްދަތު ހަމަވެފައިވަނީ އޭޕްރިލް 30 ގައެވެ.
މިނިސްޓްރީން ދައުލަތުގެ މީޑިއާ މެދުވެރިކޮށް ހާމަކުރިގޮތުގައި ޖުމްލަ 1338 އެޕްލިކޭޝަން ލިބިފައިވާއިރު، އޭގެތެރޭގައި ހިމެނެނީ 913 އާ އެޕްލިކޭޝަނާއި، މިހާރުވެސް ކިޔަވަމުންދާ ދަރިވަރުންގެ ތެރެއިން ޓޮޕް-އަޕްގެ ގޮތުގައި ހުށަހެޅި 259 އެޕްލިކޭޝަނެވެ. މިހާތަނަށް 646 އެޕްލިކޭޝަން ރިވިއުކޮށްފައިވާކަމަށްވެސް މިނިސްޓްރީން ބުނެފައިވެއެވެ.
މި އަހަރުގެ ލޯނު ސްކީމުގައި ހައިލީ ޓެކްނިކަލް ދާއިރާތަކަށް އިސްކަންދޭކަމަށާއި، ލޯނުގެ ދެބައިކުޅަ އެއްބައި މި ދާއިރާތަކަށް ޚާއްސަކޮށްފައިވާކަމަށް މަތީ ތަޢުލީމާ ބެހޭ މިނިސްޓަރު ޑރ. އަލީ ހައިދަރު ވިދާޅުވިއެވެ. މީގެއިތުރުން، ނުކުޅެދުންތެރިކަން ހުންނަ ދަރިވަރުންނަށް ޚާއްސަ ސަމާލުކަމެއް ދީފައިވާއިރު، ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ނިންމެވުމާ އެއްގޮތަށް މި ލޯނުތަކުން އިންޓްރެސްޓާއި އެޑްމިނިސްޓްރޭޓިވް ފީ ނުނަގާގޮތަށް ހަމަޖައްސާފައިވާކަމަށްވެސް މިނިސްޓަރު ވިދާޅުވިއެވެ.
