މި މުބާރާތުގައި ބައިވެރިވާ ފަރާތްތަކަށް ޖުމްލަ 26،000 ރުފިޔާގެ ފައިސާގެ އިނާމު ދިނުމަށް ވަނީ ހަމަޖެހިފައެވެ.
އެޗްޑީސީން ބުނީ މި މުބާރާތުގައި ބައިވެރިވުމަށް ހުޅުމާލޭގެ ރީތިކަމާއި ރަށުތެރޭގެ އާންމު ދިރިއުޅުން ދައްކުވައިދޭ ފޮޓޯއެއް ނުވަތަ އެއް މިނެޓަށްވުރެ ދިގުނޫން ވީޑިއޯއެއް ހުށަހަޅަންޖެހޭނެ ކަމަށެވެ. އަދި މި ތަކެތި ސޯޝަލް މީޑިއާއަށް އަޕްލޯޑްކުރާއިރު އެޗްޑީސީ މޯލްޑިވްސް އަދި މައި ހުޅުމާލެ ޓެގްކުރުމާއެކު LifeinHML# ހޭޝްޓެގް ބޭނުންކުރަންޖެހޭނެއެވެ. މި މުބާރާތަށް ފޮޓޯއާއި ވީޑިއޯ ހުށަހެޅުމުގެ ސުންގަޑިއަކީ އަންނަ ހަފުތާގެ ބުރާސްފަތި ދުވަސް ކަމަށް އެޗްޑީސީން ބުނެފައިވެއެވެ.
މި މުބާރާތުގައި ފޮޓޯއާއި ވީޑިއޯތައް ވަކިން ވަނަ ހޮވުމަށް ހަމަޖެހިފައިވާއިރު، އެންމެ މޮޅު ވީޑިއޯއަށް 8،000 ރުފިޔާ، ދެވަނައަށް 5،000 ރުފިޔާ އަދި ތިންވަނައަށް 3،000 ރުފިޔާގެ އިނާމު ދެވޭނެއެވެ. އަދި އެންމެ މޮޅު ފޮޓޯއަށް 5،000 ރުފިޔާ، ދެވަނައަށް 3،000 ރުފިޔާ އަދި ތިންވަނައަށް 2،000 ރުފިޔާގެ އިނާމު ދިނުމަށް ވަނީ ހަމަޖެހިފައެވެ. އެޗްޑީސީން އިތުރަށް ބުނީ މެއި މަހުގެ 12 ވަނަ ދުވަހު ފާހަގަކުރާ ހުޅުމާލޭގެ 21 ވަނަ އަހަރީ ދުވަހާ ގުޅިގެން ހަފުތާއަކަށް ދިގުދެމިގެންދާ ކުލަގަދަ ފެސްޓިވަލެއް ހުޅުމާލޭގެ އެކި ސަރަހައްދުތަކުގައި ބޭއްވުމަށް ނިންމާފައިވާ ކަމަށެވެ.
