މީކާއިލް މަޖިލީހަށް ހުށަހެޅުއްވީ ގާނޫނު ނަންބަރު 1/2007 (ދިވެހިރާއްޖޭގެ އިމިގްރޭޝަންގެ ގާނޫނު) ގެ އަށް ވަނަ މާއްދާގެ ހ. ގެ ހަތް ވަނަ ނަންބަރުގެ ފަހަތަށް ނަންބަރެއް އިތުރު ކުރުމަށެވެ.
އިސްލާހުގައި ބުނެފައި ވަނީ ރާއްޖެ އެތެރެ ނުވެވޭނެ މީހުންގެ ތެރޭގައި "އިޒްރޭލު ޕާސްޕޯޓު ގެންގުޅޭ މީހުން (މީގެ ތެރޭގައި އިޒްރޭލުގެ ޕާސްޕޯޓުގެ އިތުރުން، އެހެން ގައުމެއްގެ ޕާސްޕޯޓު ގެންގުޅޭ މީހުން ވެސް ހިމެނޭ) ކަމަށެވެ.
ސަރުކާރުގެ ލެޖިސްލޭޓިވް އެޖެންޑާ ހިއްސާކުރަމުން ބަންޑާރަ ނައިބު އުޝާމް ވިދާޅުވީ ސަރުކާރުގެ ވިސްނުންވެސް ހުރީ މީކާއިލް އިސްލާހު ކުރަން ހުށައެޅި އިމިގްރޭޝަންގެ ގާނޫނުގެ އެ މާއްދާއަށް ބަދަލުތައް ގެންނަން ކަމަށެވެ. އެހެންނަމަވެސް މަޖިލީހަށް މެމްބަރަކު ބިލެއް ހުށައަޅާފައިވަނިކޮށް އެކަމާއި ގުޅޭ އިތުރު ބިލެއް ހުށަނޭޅޭނެތީ ސަރުކާރުގެ ވިސްނުމަކީ ކޮމެޓީ މަރުހަލާއަށް އިސްލާހުތަކެއް ހުށައެޅުން ކަމަށެވެ.
އޭޖީ ވިދާޅުވީ މިހާރު ބިލް އޮތް ގޮތުން މައިގަނޑު ކަންބޮޑުވުމަކީ އިޒްރާއީލްގައި ދިރިއުޅޭ ފަލަސްތީނު މީހުނަށްވެސް ރާއްޖެ ނާދެވޭނެތީ އެ މައްސަލަކަމަށެވެ.
އިޒްރާއީލް ޕާސްޕޯޓް މަނާކުރަން މީކާއިލް ހުށައެޅި މައްސަލަ މަޖިލީހުން ބަލައިގަނެ ދިރާސާކުރަން ހާރިޖީ ގުޅުންތަކުގެ ކޮމެޓީއަށް ވަނީ ފޮނުވާފައެވެ.
