ކޮތަޅުން ފީ ނަގަން ފެށުމަކީ މިދިޔަ ސަރުކާރުން ގެންގުޅުނު ޕްލާސްޓިކް މަދު ކުރުމުގެ ސިޔާސަތުގެ ދަށުން ފެށި ކަމެކެވެ. އެގޮތުން ޑިއުޓީ ފްރީއިންނާއި، ތާޒާ މަސް އަޅަން ދޭ ކޮތަޅު އަދި ޑަސްބިން ކޮތަޅު ނޫން ހުރިހާ ބާވަތެއްގެ ޕްލާސްޓިކު ކޮތަޅަކުން ވެސް ދެ ރުފިޔާއެއް ފީއެއް ނަގަ އެވެ.
މިއާއެކު މީރާގެ އާމްދަނީ ރިޕޯޓުގައި މިދިޔަ އަހަރުގެ މެއިމަހުން ފެށިގެން ޕްލާސްޓިކް ކޮތަޅު ފީއިން ލިބޭ އާމްދަނީ ވަނީ ހިމަނަން ފަށާފައެވެ.
މީރާއިން އެންމެފަހުން އާއްމުކޮށްފައިވާ މިއަހަރުގެ އޭޕްރީލްމަހުގެ އާމްދަނީ ރިޕޯޓުގައިވާގޮތުން ޕްލާސްޓިކް ކޮތަޅުން ނަގާ ފީގެ ގޮތުގައި މިހާތަނަށް 4 މިލިއަން ރުފިޔާ ލިބިފައިވާއިރު، މިއަހަރުގެ މިހާތަނަށް މި ފީގެ ގޮތުގައި އެންމެ ބޮޑު އަދަދެއް ލިބިފައިވަނީ މިދިޔަ އޭޕްރީލްމަހު އެވެ.
ޕްލާސްޓިކް ކޮތަޅު ފީގެ ގޮތުގައި ލިބިފައިވާ އާމްދަނީ
ޖެނުއަރީ : 1.4 މިލިއަން ރުފިޔާ
ފެބްރުއަރީ : 749422 މިލިއަން ރުފިޔާ
މާރޗް : 715400 މިލިއަން ރުފިޔާ
އޭޕްރީލް : 1،183،572 މިލިއަން ރުފިޔާ
ޖީއެސްޓީއަށް ރަޖިސްޓަރީކޮށްފައިވާ ވިޔަފާރި ހަރަކާތްތަކުން ޕްލާސްޓިކް ކޮތަޅުގެ ފީގެ ގޮތުގައި ނަގާ އަދަދަކީ ދައުލަތަށް ނެގޭ ޓެކުހެކެވެ. އަދި އެ ފަރާތްތަކުން ނަގާ ޕްލާސްޓިކް ކޮތަޅުގެ ފީގެ ޖުމްލަ އަދަދު ޓެކްސްގެ ގޮތުގައި މީރާއަށް ހަމައަށް ދައްކަންޖެހެ އެވެ.
