ގިނަ ދުވަސްތަކެއްވަންދެން ކްލަބު ފުޓްބޯޅަ ނުކުޅެ ހުރުމަށް ފަހު ދެވަނަ ޑިވިޝަން ފުޓްބޯޅަ މުބާރާތުގައި މަސްއޮޑި ޓީމަށް ކުޅޭ، ދެވަނަ ޑިވިޝަން ކާމިޔާބުކޮށްދިނުމުގައި ބޮޑު ހިއްސާއެއްވި، އިއްބެ ސޯޝަލް މީޑިއާގައި ސުވާލު އުފައްދާފައިވަނީ ފުޓްބޯޅައިން އާމްދަނީ ހޯދާ ކުޅުންތެރިންގެ މިއަދުގެ ހާލާ މެދުއެވެ.
ފުޓްބޯޅައިގެ ހާލަތާ މެދު އިއްބެ ކަންބޮޑުވުން ފާޅުކުރިއިރު، ދިވެހި ފުޓްބޯޅަ މިހާރު ދެކެމުންދަނީ ވަރަށް އަނދިރި ދުވަސްތަކެކެވެ. ފުޓްބޯޅަ އެސޯސިއޭޝަން އޮފް މޯލްޑިވްސް ކޮރަޕްޝަންގެ ހާއްޔަކަށްވެ، އެ އިދާރާގެ ރައީސްގެ މައްޗަށްވަނީ ޖިނާއީ ދައުވާ އުފުލި ޝަރީއަތް ފެށިފައެވެ.
އިއްބެ މޮޅު ކުޅުމާއެކު، އަންނަ ސީޒަނަށް މަސްއޮޑި އެއްވަނަ ޑިވިޝަނަށް އަރާފައިވާއިރު، މި ދިޔަ ސީޒަނުގައި، ލޯން އެއްބަސްވުމެއްގެ ދަށުން، އިއްބެ އެންމެ ފުރަތަމަ ގުޅުނީ ވެލެންސިއާއާ އެވެ. އެ ޓީމާ އެކު، ޕްރީ ސީޒަން ޕްރެކްޓިހަށް ނުކުމެ، ސީޒަން ތެރޭގައި ވެސް މަސައްކަތް ކުރި އެވެ. އެކަމަކު، އޭގެ ކުރީ ސީޒަނުގައި ކްލަބް ވެލެންސިއާ އަށް ކުޅުނު ބައެއް ކުޅުންތެރިންނަށް ނުދީ ހުރި މުސާރަ މައްސަލައިގައި ވެލެންސިއާ އަށް ފީފާ އިން ދީފައިވާ ސަސްޕެންޝަނުގެ ސަބަބުން އެ ޓީމަށް އިއްބެ ރަޖިސްޓްރީ ނުކުރެވުނެވެ.
އެހެންކަމުން މުޅި ސީޒަންގައި އިއްބެ ހުރީ ކްލަބު ފުޓްބޯޅައާ ދުރުގައެވެ. އެހެން ހުރުމަށް ފަހު އިއްބެ ކުޅުނީ ދެވަނަ ޑިވިޝަނުގައެވެ.
