ހުތުބާގައި ބުނީ އިސްލާމް ދީނަކީ ފިތުރަތުގެ ދީނެއް ކަމަށާއި މުސްލިމުން އެ މީހުންގެ އީދު ފާހަގަ ކުރާނީ ﷲ ހުއްދަ ކުރެއްވި އިމުގެ ތެރެއިން ކަމަށެވެ. އަދި އުފާ ފާޅު ކުރުމުގައި ހައްދު ފަހަނަ އަޅައި ނުދިނުމަށް ހުތުބާގައި ގޮވާލި އެވެ.
މިއަދުގެ އީދު ހުތުބާ ގައި މުސްލިމުންގެ މި މަތިވެރި ފިތުރު އީދު ދުވަހު ގައި، ރަމަޟާން މަހުން ދަސްވި ފިލާވަޅުތަކުގެ ފައިދާ ލިބިގަތުމަށް އަޒުމު ކަނޑައެޅުމަށް ގޮވާލެއްވި އެވެ. މަސްދުވަހުގެ ތަމްރީނަކަށް ފަހު، ރޯދައިގެ ތަރުބަވީ މަދަރުސާއިން ނިކުތްއިރު، އީމާންކަން ވަނީ އިތުރުވެ ހެޔޮ ކަންކަން ކުރުމަށް ނަފްސު އާދަވެ ފަސޭހަވެފައި ކަން ފާހަގަކޮށް މި އީމާންކަން، މި ގޮތުގައި ދެމެހެއްޓުމަށް މަސައްކަތް ކުރުމަށް ގޮވާލެއްވި އެވެ.
ކޮންމެ އުންމަތެއްގެ އީދަކީ ވެސް އެ އުންމަތެއް ރަމްޒުކޮށްދޭ އަލަމާތެއް ކަމަށާއި އެންމެ މުހިންމު ކަމެއް ދޭންވީ އިޖުތިމާއީ ގުޅުން ވަރުގަދަ ކުރުމަށް ކަމަށް ޚުތުބާގައި ބުންޏެވެ.
އެގޮތުން، އީދަކީ ގުޅުންތައް އާލާކޮށް ދެމެހެއްޓުމަށް ލިބޭ ރަނުގެ ފުރުސަތެއް ކަމަށް ހުތުބާގައި ބުންޏެވެ. އަދި ބައެއްގެ އިޖުތިމާއީ ފޭރާން ވަރުގަދަ ކުރުމަކީ އެ މުޖުތަމައުއަކަށް ފާގަތިކަމާއި އަމަން އަމާންކަން ގެނުވާ ކަމެއް ކަމަށް ވެސް ހުތުބާގައި ހަނދާން އާކޮށްދިނެވެ.
ޒަކާތުގެ މާތްކަމަށް އަލިއަޅުވާ ހުތުބާގައި ބުނީ، ފިތުރު ޒަކާތައް ރައްކާތެރިވީ ފަދައިން މުދަލު ޒަކާތައް ވެސް ރައްކާތެރި ވާންޖެހޭނެ ކަމަށެވެ. އަދި ﷲ ފަރުޟު ކުރެއްވި ޒަކާތުގެ އިތުރަށް، ގިނަގިނައިން ޞަދަގާތްދީ، މީސްތަކުންނަށް ހެޔޮފޯރުކޮށް ދިނުމަށް ހުތުބާގައި ވަނީ އެންމެހާ ރައްޔިތުންނަށް ނަސޭހަތްތެރި ވެފައެވެ.
މީގެ އިތުރުން ހުތުބާގައި ބުނީ އީދުގެ އެކިއެކި ހަރަކާތްތައް ކުރިއަށް ގެންދާއިރު ފަލަސްތީނު ރައްޔިތުންގެ މަތިން ހަނދާން ނައްތާނުލުމަށާއި، ފަލަސްތީނު ރައްޔިތުން ދަނީ މާތްވެގެންވާ އަލްމަސްޖިލުން އަޤްޞާ އާއި ފަލަސްޠީނުގެ ބަރަކާތްތެރި ފަސްގަނޑުގެ ދިފާއުގައި ޖިހާދު ކުރަމުން ކަމަށެވެ.
މި ހާލަތުގައި ވެސް ފަލަސްތީނު ރައްޔިތުންގެ ކިބައިން ފެނިގެންދިޔައީ މާތްﷲ ގެ މިންވަރުފުޅަށް ރުހިގެންވުމާއި، ނުގުޑާފަދަ ވަރުގަދަ އީމާންކަން ކަމަށާއި މިއީ އެކަންކަމުން އިބުރަތް ލިބިގަންނަންވީ ކަންކަން ކަމަށް ހުތުބާގައި ބުންޏެވެ.
މުސްލިމުންގެ މިސާލަކީ އެއް ހަށިގަނޑެއްގެ މިސާލުކަން ފާހަގަކުރައްވަމުން ހުތުބާގައި ވަނީ ފަލަސްތީނު ރައްޔިތުންނަކީ އަހަރަމެންގެ ހަށިގަނޑުގެ އެއްބައި ކަމަށް ބުނެފަ އެވެ.
