އާރުޑީސީ ހިންގިކަމަށް ބުނާ ކޮރަޕްޝަންގެ ތަހުގީގަށް ފުލުހުންގެ މަރުކަޒަށް މާދަމާ ހާޒިރުވާން އެމްޑީޕީގެ ޗެއަރޕާސަން ފައްޔާޒު އިސްމާއިލަށް ވަނީ ޗިޓް ފޮނުވާފައެވެ.
މި މައްސަލައިގެ ތަހުގީގަށް މިދިޔަ ސަރުކާރުގެ އިކޮނޮމިކް މިނިސްޓާރ ފައްޔާޒު އިސްމާއިލް ހާޒިރުވާން ފުލުހުން ވަނީ އަންގާފައެވެ. އެޗިޓްގައިވާ ގޮތުން ފައްޔާޒު ހާޒިރުކުރަނީ އާރުޑީސީގެ ހިޔާނާތުން ހިންގި މުއާމަލާތަކުގެ ތެރެއިން ފައްޔާޒަށް މާލީ މަންފާ ލިބިފައިވާކަމަށް ތުހުމަތުކުރެވޭ މައްސަލާގައި ސުވާލުކުރުމަށެވެ.
ފުލުހަށް ހާޒިރުވާން ފޮނުވި ޗިޓް ހިމަނާ ފައްޔާޒު ކުރެއްވި ޕޯސްޓް ހިމަނާ މޫކޭ އެކްސްގައި ވިދާޅުވީ މަޖާކަމަކީ އާރުޑީސީ ހިންގުމާއި ހަވާލުވެ ހުރީ އޭނާކަމަށްވާއިރު މިހާތަނަށް އަދިވެސް ސުވާލެއް ކޮށްނުލާކަމަށެވެ.
ރޯޑް ޑިވެލޮޕްމަންޓް ކޯޕަރޭޝަން (އާރުޑީސީގެ) 14 މިލިއަން ވުރެ ގިނަ ރުފިޔާގެ ހިޔާނާތުގެ މައްސަލާގައި 3 މީހަކާ ސުވާލުކޮށް ތަހުގީގުކޮށް ނިމުމާކައި ހަމައަށް އައިސްފައިވާކަމަށް މީގެ ހަފްތާއެއްހާ ދުވަސްކުރިން ފުލުހުން ވަނީ ބުނެފައެވެ.
