މިއަދު ހޮޓެލް ޖެންގައި ބޭއްވި ރަސްމިއްޔާތެއްގައި ޓާމް ޝީޓުގައި ސޮއިކުރެއްވީ އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް އެވެ. އަދި ވިޓޯލް ގުރޫޕުގެ ފަރާތުން މި އެއްބަސްވުމުގައި ސޮއި ކުރެއްވީ އެ ކުންފުނީގެ ޑިރެކްޓަރު ޖޭ އެންގްއެވެ.
އެ ރަސްމިއްޔާތުގައި އިކޮނޮމިކް މިނިސްޓަރު މުހައްމަދު ސައީދާއި ފިނޭންސް މިނިސްޓްރީގެ ސްޓޭޓް މިނިސްޓަރު އަހުމަދު މާޒިންވެސް ބައިވެރިވެވަޑައިގަތެވެ.
ޓާމް ޝީޓުގައި ސޮއިކުރެއްވުމަށް ފަހު އެސްޓީއޯގެ އެމްޑީ ޝިމާދު ދެއްކެވި ވާހަކައިގައި ބަންކަރިން މަޝްރޫއުގެ ޓެންޑާ ކާމިޔާބުކުރި ކަމަށްޓަކައި ވިޓޯލްއަށް މަރުހަބާ ވިދާޅުވި އެވެ.
އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް
އެ ރަސްމިއްޔާތުގައި ޖޭ އެންގް ވިދާޅުވީ މި ސަރަހައްދަކީ ބަންކަރިންގެ ޚިދުމަތް ފޯރުކޮށްދޭން އެންމެ ރަނގަޅު ލޮކޭޝަން ކަމަށެވެ.
ވިޓޯލްގެ ބަންކަރިން ވިޔަފާރީގެ ސަޕްލައި ހަބްތައް ސިންގަޕޫރާއި ޔޫއޭއީ އާއި އެމެރިކާގެ އިތުރުން ދުނިޔޭގެ އެހެން ސަރަހައްދުތަކުގައި ހުންނަކަން ފާހަގަކުރައްވައި އޭނާ ވިދާޅުވީ، މިދިޔަ އަހަރު ދުނިޔޭގެ ބަންކަރިން ޑެލިވަރީ މާކެޓުގެ ހަ ޕަސެންޓް ފޯރުކޮށްދީފައި ވަނީ އެ ކުންފުނިން ކަމަށެވެ.
އެ ރަސްމިއްޔާތުގައި ސައީދު ވިދާޅުވީ ވިޓޯލް ފަދަ ކުންފުންޏަކުން، ރާއްޖެއަކީ މި ސަރަހައްދުގެ ބަންކަރިން ޑެސްޓިނޭޝަނަކަށް ވާނެ ވާހަކަ ބުނުމުން އުފާވާ ކަމަށެވެ.
އިކޮނޮމިކް މިނިސްޓަރ މުހައްމަދު ސައީދު
އިހަވަންދިއްޕޮޅުގައި ބަންކަރިންގެ ހިދުމަތް އަންނަ ޖުލައި މަސް ނިމުމުގެ ކުރިން ފެށޭނެ ކަމަށް ސައީދު މީގެ ކުރިން ވަނީ ވިދާޅުވެފަ އެވެ.
އިހަވަންދިއްޕޮޅުގައި ބަންކަރިންގެ ހިދުމަތް އަންނަ ޖުލައި މަސް ނިމުމުގެ ކުރިން ފަށާނެ ކަމަށް މިނިސްޓަރު ވިދާޅުވި ނަމަވެސް މި މަޝްރޫއު އާ ބެހޭ އިތުރު ތަފްސީލެއް ނުދެއްވައެވެ. އަދި އެ މަސައްކަތް ފެށުމަށް ގާއިމް ކުރާ ވަސީލަތްތަކަށް ހިނގާނެ ހަރަދާއި އެކަމުގައި އެ ކުންފުނިން ހޭދަ ކުރާނެ އަދަދަކާއި އެސްޓީއޯއިން ކުރާނެ ހޭދައެއް އަދި ސާފެއްނުވެ އެވެ.
