ރިޔާސީ އިންތިޚާބުގެ ދެވަނަ ބުރަށްފަހު ނޫސްވެރިންނާއި ބައްދަލުކޮށް އިންތިޚާބުގެ ކަންކަން ކުރިއަށްދިޔަގޮތާއި ގުޅޭގޮތުން ވާހަކަދައްކަވަމުން ޔޫރަޕިއަން ޔޫނިއަންގެ ޗީފް އޮބްޒާވަރ، ނާޗޯ ސަންޗޭޒް އަމޯރ ވިދާޅުވީ ރިޔާސީ އިންތިޚާބު އޮތް ދުވަހު ކަންހިނގާފައިވަނީ ވަރަށް އަމާންއޮމާންކޮށް ކަމަށެވެ. އެހެންކަމުން އިންތިހާބާއި މެދު ރައްޔިތުންގެ މެދުގައި އޮތް އިތުބާރު ބޮޑުވެފައިވާކަމަށެވެ.
އޭނާ ވިދާޅުވީ އިންތިހާބުގެ ދެބުރުގެ ދެމެދުގައި ލިބުނު ކުޑަ މުއްދަތުގެ ތެރޭގައި ރިޔާސީ އިންތިހާބަށް ތައްޔާރުވަމުން ކުރިމަތިވީ ނިޒާމާއި ގުޅޭ ވޯޓަށްވެސް އިލެކްޝަންސް ކޮމިޝަނުން ތައްޔާރުވިކަން ފާހަގަކުރައްވާ ނާޗޯޒް ވިދާޅުވީ އެކަމުގެ އަސަރު ރިޔާސީ އިންތިޚާބަށް ކުރިޔަނުދީ ކޮމިޝަނުން މަސައްކަތް ކުރައްވާފައިވަނީ ވަރަށް ފުރިހަމައަށްކަމަށެވެ.
ނަމަވެސް، މި އިންތިހާބުގެ ދެވަނަ ބުރުގައި ވާދަކުރެއްވި ދެ ކެންޑިޑޭޓުން ސޯޝަލް މީޑިއާ އާއި މީޑިއާ އަދި އެހެން ޕްލެޓްފޯމުތައް ވެސް މެދުވެރިކޮށް، އެންޓި-ކެމްޕެއިންގެ ގިނަ ހަރަކާތްތަކެއް ހިނގި ކަން ފާހަގަކުރައްވައި އޮބްޒާވަރުން އެކަމުގެ ކަންބޮޑުވުން ފާޅުކުރެއްވި އެވެ.
ރިޔާސީ އިންތިޚާބު އޮބްޒަރވްކުރުމަށް އީޔޫގެ ފަރާތުން 36 އޮބްޒަރވަރުންވަނީ ޙަރަކާތްތެރިވެފައެވެ. މިދިޔަ ހޮނިހިރު ދުވަހު ވޯޓުލީ 119 މަރުކަޒެއް އީޔޫއިންވަނީ އޮބްޒަރވްކޮށްފައެވެ. އަދި މާލެ ހިމެނޭހެން 14 އަތޮޅަކުން 56 ރަށެއްގައާއި 5 ރިސޯޓެއްގައި ބަހައްޓާފައިވާ ވޯޓު ފޮށިތައްކައިރީވެސް އީޔޫގެ އޮބްޒަރވަރުން ހަރަކާތްތެރިވެފައިވެއެވެ.
ހޮނިހިރު ދުވަހު ބޭއްވި ރިޔާސީ އިންތިޚާބުގެ ދެވަނަ ބުރު ކާމިޔާބު ކުރެއްވީ ޕީޕީއެމް، ޕީއެންސީގެ ކެންޑިޑޭޓް ޑރ. މުހައްމަދު މުއިއްޒަށް 54 ޕަސެންޓް ވޯޓު ލިބިލެއްވިއިރު ރައީސް ސޯލިހަށް ލިބިވަޑައިގަތީ 46 ޕަސެންޓެވެ.
