ޕްރިލިމިނަރީ ބުރުގެ ފުރަތަމަ މެޗު ލެގް އޮންނާނީ އޮކްޓޯބަރު 12 ގަ އެވެ. ރާއްޖެ އާއި ބަންގްލަދޭޝްގެ ފުރަތަމަ ލެގް ކުޅޭނީ މާލޭގަ އެވެ.
ދެވަނަ ލެގް އޮންނާނީ އޮކްޓޯބަރު 17 ގަ އެވެ. އެ މެޗު ކުޅޭނީ ބަންގްލަދޭޝްގަ އެވެ. މި ދެ މެޗަށް މިއަދު ގައުމީ ޓީމުގެ ޕްރެކްޓިސް ފެށިއިރު އޭއެފްސީ ކަޕުގައި ކުޅޭ މާޒިޔާގެ ކުޅުންތެރިން ޕްރެކްޓިހުގައި ބައިވެރިނުވެއެވެ. އެ ކުޅުންތެރިން ޓީމާ ގުޅޭނީ އަންނަ މަހު ފުރަތަމަ ހަފްތާގައި ކުޅޭ އޭއެފްސީ ކަޕުގެ މެޗަށް ފަހުއެވެ.
މިދިޔަ ޖުލައި މަހު އިންޑިއާގައި ނިމިގެން ދިޔަ ސާފް ޗެމްޕިއަންޝިޕްގައި ބަންގްލަދޭޝް އަތުން ރާއްޖެ ވަނީ ބަލިވެފަ އެވެ. އެއީ އެ މުބާރާތުގައި 20 އަހަރަށް ފަހު ބަންގްލަދޭޝް އަތުން ރާއްޖެ ބަލިވި ފުރަތަމަ ފަހަރެވެ. އޭގެ ކުރިން 2021 ވަނަ އަހަރު ލަންކާގައި އޮތް ފޯ ނޭޝަންސް ކަޕުގައިވެސް ރާއްޖެ ބަންގްލަދޭޝް އަތުން ބަލިވިއެވެ. އެކަމަކު އޭގެ ފަހުން މާލޭގައި ކުޅުނު ފްރެންޑްލީ މެޗަކުން ރާއްޖެ ބަންގްލަދޭޝް އަތުން މޮޅުވިއެވެ.
ރާއްޖެ އާއި ބަންގްލަދޭޝްގެ އިތުރުން ޕްރިލިމިނަރީގައި ދެކުނު އޭޝިއާގެ ހަތަރު ގައުމު ހިމެނެ އެވެ. ޕާކިސްތާނުން ކެމްބޯޑިއާއާ ދެކޮޅަށް ނުކުންނަން ޖެހޭއިރު، ބޫޓާން ކުޅޭނީ ހޮންގް ކޮންގާ ދެކޮޅަށެވެ. އަދި ނޭޕާލް ނުކުންނާނީ ލާއޯސްއާ ދެކޮޅަށެވެ.
