ads
އޯޓް މިލްކު ޕެކެޓުތަކެއް މީހަކު ބަލަނީ
އޯޓް މިލްކުން ފަންގަލް ވިހަ ފެނިއްޖެ
ބާޒާރުގައި ވިއްކާ މަޝްހޫރު ޕްލާންޓް-ބޭސްޑް ކާބޯތަކެއްޗާއި އޯޓް މިލްކް ފަދަ ބުއިންތައް ޓެސްޓުކުރުމުން، ޓެސްޓުކުރި ހުރިހާ އުފެއްދުމަކުން ފަންގަލް ވިހަ ނުވަތަ މައިކޯޓޮކްސިން ފެނިފައިވާ ކަމަށް އާ ދިރާސާއަކުން ދައްކައިފިއެވެ.
Advertisement

އިޓަލީގެ ޔުނިވާސިޓީ އޮފް ޕާމާއާއި އިނގިރޭސިވިލާތުގެ ކްރޭންފީލްޑް ޔުނިވާސިޓީގެ ސައިންސްވެރިން ގުޅިގެން ކުރިއަށްގެންދިޔަ މި ދިރާސާގައި ޖުމްލަ 212 އުފެއްދުމެއް ތަހުލީލުކޮށްފައިވާއިރު، އޭގެ 100 ޕަސަންޓުން ވިހަ މާއްދާތައް ވަނީ ފެނިފައެވެ. މި ނަތީޖާ ހާމަކޮށްފައިވަނީ ދަނޑުވެރިކަމުގެ ބާވަތްތައް ހެއްދުމާއި ރައްކާކުރުމުގެ ތެރޭގައި ފަންގަސް އުފެދި، އޭގެން އުފައްދާ ކާބޯތަކެއްޗަށް ވިހަ މާއްދާތައް ވާސިލުވާ މިންވަރު ދެނެގަތުމަށް ކުރި ދިރާސާ ފުޑް ކޮންޓްރޯލް ޖާނަލްގައި ޝާއިއުކުރުމަށްފަހުއެވެ.

މި ދިރާސާގައި އިނގިރޭސިވިލާތުގެ ބޮޑެތި ފިހާރަތަކުން ނެގި 120 ޕްލާންޓް-ބޭސްޑް ބުއިމަކާއި އެއްގަމު މަހުގެ ބަދަލުގައި ބޭނުންކުރާ 92 އުފެއްދުމެއް ވަނީ ޓެސްޓުކޮށްފައެވެ. މީގެ ތެރޭގައި އޯޓް މިލްކް، އާމަންޑް މިލްކް، އަދި ސޯއީ މިލްކްގެ އިތުރުން ވީގަން ބާގާއާއި ސޮސެޖް ފަދަ ބާވަތްތައް ހިމެނެއެވެ. ސައިންސްވެރިން ވަނީ މި އުފެއްދުންތަކުގައި ތަފާތު 19 ވައްތަރެއްގެ މައިކޯޓޮކްސިން ހުރިތޯ ބަލާފައެވެ. ތަހުލީލުތަކުން ދެއްކި ގޮތުގައި ޓެސްޓުކުރި ކޮންމެ އުފެއްދުމެއްގައި މަދުވެގެން އެއް ވައްތަރެއްގެ ފަންގަލް ވިހަ ހުރިއިރު، ގިނަ އުފެއްދުންތަކުގައި އެއް ވައްތަރަށްވުރެ ގިނަ ވިހަ މާއްދާތައް އެކުލެވިގެންވެއެވެ.

ޔޫރަޕިއަން ޔޫނިއަންގެ ހޮރައިޒަން ޔޫރަޕް ފަންޝީލްޑް4މެޑް މަޝްރޫއުގެ ދަށުން ކުރިއަށްގެންދިޔަ މި ދިރާސާގެ ނަމަކީ "މައިކޯޓޮކްސިން ކޮންޓެމިނޭޝަން އިން ޕްލާންޓް-ބޭސްޑް ބެވަރޭޖަސް އެންޑް މީޓް އޯލްޓަނޭޓިވްސް: އަ ސާވޭ އޮފް ދަ ޔޫކޭ މާކެޓް" އެވެ. 

ރަކޭލް ޓޮރީޖޯސް، އޮކްޓޭވިއަން އޮގަސްޓިން މިހަލާޗޭ، އަންދްރެއާ ޕެޓްރިއާކާ، އޭންޖެލް މެޑީނާ، އަދި ކިއާރާ ޑޯލްއަސްޓާ ހިމެނޭ ދިރާސާ ޓީމުން ފާހަގަކުރި ގޮތުގައި، އޯޓްސް ފަދަ ގޮވާމުގެ ބާވަތްތަކާއި ތޮޅީގެ ބާވަތްތައް ދަނޑުގައި ހެދެމުންދާއިރު ނުވަތަ ގުދަންކޮށްފައި ހުންނައިރު ފަންގަސް އަށަގަތުމަކީ އާންމު ކަމެކެވެ. އަދި މި ބާވަތްތައް ބޭނުންކޮށްގެން އޯޓް މިލްކް ފަދަ ބުއިންތައް އުފައްދުމުގެ މަރުހަލާގައި ފެން އެއްކޮށް ލުއިކުރި ނަމަވެސް، އޭގައި ހުންނަ ވިހަ މާއްދާތައް އެއްކޮށް ފިލައިގެން ނުދާކަން ދިރާސާއިން ވަނީ ކަށަވަރުވެފައެވެ.

މި ހޯދުންތަކާ ގުޅޭގޮތުން ދިރާސާ ޓީމުން ބުނެފައިވަނީ މައިކޯޓޮކްސިންއަކީ ކާބޯތަކެތީގައި ގުދުރަތީ ގޮތުން އުފެދޭ މާއްދާތަކެއް ކަމަށާއި، އެ މާއްދާތައް އެއްކޮށް ނައްތާލުމަކީ ކުރެވޭނެ ކަމެއް ނޫން ކަމަށެވެ. އެހެންކަމުން، މި ދިރާސާގެ ނަތީޖާއާ ގުޅިގެން އާންމުން ބިރުގަނެ، ތަފާތު ބާވަތްތަކުގެ ކާބޯތަކެތި ބޭނުންކުރުން ހުއްޓާލަން ނުޖެހޭ ކަމަށް ސައިންސްވެރިން ބުންޏެވެ. ނަމަވެސް، އާ ބާވަތްތަކުގެ ޕްލާންޓް-ބޭސްޑް ކާބޯތަކެތި ބާޒާރަށް ނެރެމުންދާއިރު، އެފަދަ އުފެއްދުންތަކުގައި ފަންގަލް ވިހަ ހުރި މިންވަރު ބަލައި މޮނިޓާކުރުމަށް ވަކި ހާއްސަ ގަވާއިދުތަކެއް މިހާތަނަށް ހެދިފައި ނެތުމަކީ ބޮޑު ކަންބޮޑުވުމެއް ކަމަށް ދިރާސާވެރިން ފާހަގަކުރިއެވެ.

ޓެސްޓުކުރި އުފެއްދުންތަކުން ފެނުނު މައިކޯޓޮކްސިންގެ މިންވަރަކީ ގޮވާމުގެ ބާވަތްތަކަށް ކަނޑައަޅާފައިވާ ރައްކާތެރި މިންގަނޑުތަކަށްވުރެ ދަށް މިންވަރެއް ކަމަށް ވީނަމަވެސް، ކޮންމެ ދުވަހަކު ގިނަ އަދަދަކަށް މިފަދަ އުފެއްދުންތައް ބޭނުންކުރާ މީހުންގެ ހަށިގަނޑަށް ދިގު މުއްދަތެއްގައި މި ވިހަ ޖަމާވުމުގެ ފުރުސަތު އޮތް ކަމަށް ތަޖުރިބާކާރުން އިންޒާރުދެއެވެ. ދިގު މުއްދަތަކަށް މިފަދަ ވިހައަށް ހުށަހެޅުމަކީ ފުރަމެއަށާއި ދިފާއީ ނިޒާމަށް ގެއްލުންވުމަށް މަގުފަހިވެދާނެ ކަމެއް ކަމަށް ސައިންސްވެރިން ބުނެއެވެ. އެހެންކަމުން، ކާބޯތަކެތި އުފައްދާ ކުންފުނިތަކުން ރޯ މެޓީރިއަލް ބޭނުންކުރުމުގެ ކުރިން ފަންގަލް ވިހައަށް ޓެސްޓުކުރުމަށާއި، ޕްލާންޓް-ބޭސްޑް ކިރާއި މަހުގެ ބާވަތްތައް މޮނިޓާކުރާ ނިޒާމު ހަރުދަނާކުރުމަށް ދިރާސާގައި ވަނީ ގޮވާލާފައެވެ.

ރެފަރެންސް: 

ޓޮރީޖޯސް، އާރު.، މިހަލާޗޭ، އޯ. އޭ.، ޕެޓްރިއާކާ، އޭ.، މެޑީނާ، އޭ.، އަދި ޑޯލްއަސްޓާ، ސީ. (2026). މައިކޯޓޮކްސިން ކޮންޓެމިނޭޝަން އިން ޕްލާންޓް-ބޭސްޑް ބެވަރޭޖަސް އެންޑް މީޓް އޯލްޓަނޭޓިވްސް: އަ ސާވޭ އޮފް ދަ ޔޫކޭ މާކެޓް. ފުޑް ކޮންޓްރޯލް،

100%
ކަމުގޮސްފި
0%
އަޑުއެހިތާ މިހުރީ
0%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް