މި ސަރުކާރަށް ތިން އަހަރު ފުރުމާ ގުޅިގެން އެމްއޭސީއެލް އިން ނެރުނު ބަޔާނެއްގައި ފާހަގަކޮށްފައިވާ ގޮތުގައި، ގުޅިގެން ކުރެވުނު މަސައްކަތްތަކުގެ ނަތީޖާއެއްގެ ގޮތުން ރާއްޖޭގެ ވައިގެ ދަތުރުފަތުރުގެ އޮނިގަނޑު ވަނީ އިތުރަށް ހަރުދަނާވެފަ އެވެ. ހާއްސަކޮށް، މިދިޔަ އަހަރުގެ މިނިވަން ދުވަހު ހުޅުވި އައު އިންޓަނޭޝަނަލް ޓާމިނަލާ އެކު ދަތުރުވެރިންގެ ތަޖުރިބާ މުއްސަނދިވެ، ބައިނަލްއަގްވާމީ ވައިގެ ދަތުރުފަތުރުގެ ޑިމާންޑާ އެއްވަރަށް ހިދުމަތް ދިނުމުގެ ގާބިލުކަން އިތުރުވެފައިވާ ކަމަށް އެ ކުންފުނިން ބުންޏެވެ. އަދި ކުރީގެ އިންޓަނޭޝަނަލް ޓާމިނަލް، ޑޮމެސްޓިކް ޓާމިނަލެއްގެ ގޮތުގައި ބަދަލުކޮށް ހިދުމަތް ދޭން ފެށުމުން އެތެރޭގެ އުދުހުންތަކަށް ޒަމާނީ ފަސޭހަތަކެއް ލިބިފައިވާކަން ވެސް އެ ކުންފުނިން ފާހަގަކުރި އެވެ.
މީގެ އިތުރުން ސީ-ޓު-އެއާ ކާގޯ އިނީޝިއޭޓިވްގެ ދަށުން 2024 ވަނަ އަހަރު އިމްޕޯޓް އަދި އެކްސްޕޯޓް ކާގޯގެ އޮޕަރޭޝަންތައް ފަށައި، ވައިގެ މަގުން މުދާ އުފުލުމުގެ ފުރުސަތުތައް ވަނީ ފުޅާކޮށްފަ އެވެ. އަދި އައު ފިއުލް ފާމާއި ފިއުލް ހައިޑްރަންޓް ސިސްޓަމާ އެކު ބޯޓުފަހަރަށް ތެޔޮ ފޯރުކޮށްދިނުމާއި ތެޔޮ ރައްކާކުރުމުގެ ނިޒާމު އެތައް ގުނައަކަށް ހަރުދަނާކުރެވިފައިވާ އިރު، އަލަށް ގާއިމުކުރި ފަޔާ ސްޓޭޝަނުގެ ސަބަބުން ކުއްލި ހާލަތްތަކަށް އިޖާބަދިނުމުގެ ގާބިލުކަން ވެސް ވަނީ މަތިވެފަ އެވެ.
އެމްއޭސީއެލް އިން ބުނީ މި ވަސީލަތްތަކުގެ ބޭނުން އެންމެ ފުރިހަމަ ގޮތުގައި ހިފައި، ހިދުމަތްތަކުގެ ފެންވަރު މަތީ ދަރަޖައަކަށް ގެންގޮސް، ދުނިޔޭގެ އޭވިއޭޝަން ދާއިރާގެ ބަދަލުތަކާ ފައިހަމަކުރެވޭނެ ފަދަ އެއާޕޯޓަކަށް ވީއައިއޭ ހެދުމަކީ މައިގަނޑު އަމާޒު ކަމަށެވެ. މިއީ ރާއްޖެއާއި ބޭރު ދުނިޔެ އަދި އެތެރޭގެ ދަތުރުފަތުރު ގުޅުވައިދީ، ގައުމުގެ ދުރު ރާސްތާގެ ފާގަތިކަމަށްޓަކައި އެޅުނު ވަރުގަދަ ބިންގަލެއްގެ ގޮތުގައި ވެސް އެ ކުންފުނިން ސިފަކުރެ އެވެ.