ads
އިސް ވެރިން މިއަދު ބޭއްވި މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީގައި. ފޮޓޯ: މަޖިލިސް
1950 ގައިދީން ބަލަހައްޓަން ތިބީ 540 އޮފިސަރުން: ކަރެކްޝަންސް
ރާއްޖޭގެ ޖަލުތަކުގައި މިވަގުތު 1،950 ގައިދީން ތިބިއިރު، އެ މީހުން ބެލެހެއްޓުމުގައި ހަރަކާތްތެރިވަނީ 540 އޮފިސަރުން ކަމަށާއި މިއާއެކު ޖަލުތައް ބެލެހެއްޓުމަށް ކަނޑައަޅާފައިވާ މިންގަނޑަށް ވުރެ އޮފިސަރުންގެ އަދަދު ވަރަށް ބޮޑަށް ދަށަށް ގޮސްފައިވާ ކަމަށް މޯލްޑިވްސް ކަރެކްޝަނަލް ސާވިސްއިން މިއަދު ހާމަކޮށްފިއެވެ.
Advertisement

ކަރެކްޝަންސްގެ ވަޒީފާއާ ބެހޭ އޮނިގަނޑާ ގުޅޭގޮތުން މައުލޫމާތު ހޯދުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން މިއަދު ބޭއްވި ބައްދަލުވުމުގައި ވާހަކަ ދައްކަވަމުން ކޮމިޝަނަރު އޮފް ޕްރިޒަންސް ހަސަން ޒަރީރު ވިދާޅުވީ، ޖަލުތަކުގައި އޮފިސަރުން ތިބެންޖެހޭ އަސްލު ރޭޝިއޯއަކީ ކޮންމެ 1.75 ގައިދީއަކަށް އޮފިސަރެއް ކަމަށާއި ނަމަވެސް މިހާރުގެ ހާލަތަށް ބަލާއިރު އެ ރޭޝިއޯ ހުރީ ކޮންމެ 4.6 ގައިދީއަކަށް އޮފިސަރެއްގެ ނިސްބަތުން ކަމަށެވެ.

އެންމެ ގިނަ ގައިދީން ބައިތިއްބާފައިވާ މާފުށީ ޖަލުގައި އެކަނި ވެސް 1،140 ގައިދީން ތިބިއިރު، އެ މީހުންގެ ކަންކަން ބަލަހައްޓަން ތިބީ އެންމެ 276 އޮފިސަރުންނެވެ. މީގެ އިތުރުން ދުވާލެއްގެ މައްޗަށް އެވްރެޖުކޮށް 16 ވަރަކަށް ގައިދީން ކޯޓުތަކަށާއި ޑޮކްޓަރީ ފަރުވާއަށް މާލެ ގެންނަންޖެހޭއިރު، މާލެ ގެންނަ ކޮންމެ ގައިދީއަކަށް އޮފިސަރަކު ހަމަޖައްސަން ޖެހުމަކީ ވެސް އޮފިސަރުންގެ ދަތިކަން އިތުރަށް ބޮޑުވާ ސަބަބެކެވެ.

"މިއީ 2023އާ އަޅާބަލާއިރު %54ގެ އިތުރުވުމެއް. އެއާ އެކީގައި އަޅުގަނޑުމެންގެ އޮފިސަރުންގެ ރޭޝިއޯއަށް ބަލާއިރު ވެސް މިވަގުތު ވަރަށް ބޮޑު ލޯޑެއްގައި އޮފިސަރުން މަސައްކަތް ކުރަމުން މިގެންދަނީ. އެނގިވަޑައިގަންނަވާނެ ފަދައިން އަޅުގަނޑުމެންގެ ސެންޓަރަލް ޖަލު މި ހުންނަނީ މާފުށީގައި. ހިންމަފުއްޓާއި ހުޅުމާލެ އާއި މާލޭގައި ވެސް އަަޅުގަނޑުމެންގެ ތަންތަން އެބަހުރި. މިތަންތަން ބެލެހެއްޓުމަށްޓަކައި އަަޅުގަނޑުމެންގެ އޮފިސަރުން މަސައްކަތްކުރައްވަމުން ގެންދޭ،" ހަސަން ޒަރީރު ވިދާޅުވި އެވެ.

ކޮމިޓީގައި ވާހަކަދައްކަވަމުން ކަރެކްޝަންސްގެ އޮފިޝަލުން ފާހަގަކުރެއްވި ގޮތުގައި، ގައިދީންގެ އަދަދު އިތުރުވަމުންދާ މިންވަރަކަށް ބޭސްފަރުވާއަށް ޑޮކްޓަރަށް ދައްކަންޖެހޭ މީހުންގެ އަދަދު ވެސް ދަނީ އިތުރުވަމުންނެވެ. އެގޮތުން ގައިދީންގެ މެދުގައި އެންމެ ގިނައީ ދަތާއި ލޮލުގެ ފަރުވާއަށް އެދޭ މީހުންނެވެ. ނަމަވެސް އެ ދާއިރާތަކަށް ހާއްސަ ޑޮކްޓަރުން މާފުށީގައި ނެތުމުން، އެ މީހުން ޑޮކްޓަރަށް ދެއްކުމަށް ވެސް މާލެ ގެންނަންޖެހެއެވެ.

ޖަލުތަކުގެ ޖާގައާ ގުޅޭގޮތުން ކޮމިޝަނަރު އޮފް ޕްރިޒަންސް ހަސަން ޒަރީރު ވިދާޅުވީ، މީގެ ތިން އަހަރު ކުރިން ޖަލުތަކުގެ ޖުމްލަ ކެޕޭސިޓީއަކީ 1،200 ކަމަށެވެ. އަދި ވޭތުވެދިޔަ ތިން އަހަރުގެ ތެރޭގައި 400 އަށް ވުރެ ގިނަ ޖާގަ ޖަލުތަކުގައި އިތުރުކުރެވިފައިވާ ކަމަށް ވެސް ސީޕީ ވިދާޅުވިއެވެ.

100%
ކަމުގޮސްފި
0%
އަޑުއެހިތާ މިހުރީ
0%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް