މި ހާދިސާ ހިނގާފައިވަނީ ރާވަލްޕިންޑީގައި ހުންނަ އޭނާގެ ގޭގައެވެ.
ފުލުހުން ބުނީ މި ހާދިސާއާ ގުޅިގެން ރާބިއާގެ ފިރިމީހާ ވަގުތުން ހައްޔަރުކޮށްފައިވާ ކަމަށެވެ. އަދި އޭނާ މަރާލުމަށް ބޭނުންކުރި ކަމަށް ބެލެވޭ ހަތިޔާރު ވެސް ފުލުހުންގެ ބެލުމުގެ ދަށަށް ގެނެސްފައިވާ ކަމަށް އެ ގައުމުގެ ފުލުހުންގެ އިދާރާއިން މައުލޫމާތު ދެއެވެ.
މި މައްސަލައިގެ ފުރިހަމަ ތަހުގީގެއް ކުރުމަށްޓަކައި ހާދިސާ ހިނގި ސަރަހައްދަށް ފޮރެންސިކް ޓީމުތައް ގޮސް، ބޭނުންވާ މުހިންމު ހެކިތައް އެއްކުރުމުގެ މަސައްކަތް ވަނީ ފަށާފައެވެ. ފުލުހުން އަންނަނީ މި ހާދިސާ ހިނގަން މެދުވެރިވި ސަބަބު ދެނެގަތުމަށް ފުޅާ ދާއިރާއެއްގައި ބަލަމުންނެވެ.
ޕާކިސްތާނުގެ މަޝްހޫރު ޓީވީ އެންކަރު ރާބިއާ އަހުސަން
ރާބިއާ އަހުސަން މަރާލި ހާދިސާ ކުށްވެރިކުރައްވައި ޕާކިސްތާނުގެ ފަސްޓް ލޭޑީ އާސިފާ ބުއްޓޫ ޒަރުދާރީ ވިދާޅުވީ، މި މައްސަލައިގައި އިންސާފު ގާއިމުކުރުމަށްޓަކައި ދެފުށް ފެންނަ އަދި އިތުބާރު ހުރި ތަހުގީގެއް ހިންގަން ޖެހޭ ކަމަށެވެ. އަދި މި ޖަރީމާ ހިންގި ފަރާތްތައް ގާނޫނުގެ ކުރިމައްޗަށް ގެނެސް ޒިންމާދާރުކުރުވަން ޖެހޭނެ ކަމަށް އެކަމަނާ ފާހަގަކުރެއްވިއެވެ.
މި ހާދިސާއާ ގުޅިގެން ޕާކިސްތާނުގެ މީޑިއާ ދާއިރާގެ ގިނަ ބަޔަކު އަންނަނީ ކަންބޮޑުވުން ފާޅުކޮށް، އިންސާފު ހޯދައިދިނުމަށް ގޮވާލަމުންނެވެ. ކަމާބެހޭ އިދާރާތަކުން ބުނެފައިވަނީ ތަހުގީގު ކުރިއަށްދާ ވަރަކަށް އިތުރު މައުލޫމާތު ހާމަކުރަމުން ގެންދާނެ ކަމަށެވެ.
