ފުލުހުންގެ ތަހުގީގުން ހާމަވެފައިވާ ގޮތުގައި، އިންދުރަނީލް ސެން އާއި އޭނާގެ އިސް ބައިވެރިން ވަނީ ޔޫނެސްކޯގެ ރަސްމީ ހެރިޓޭޖް ޓެގް އަމިއްލަ ފައިދާއަށް ނާޖާއިޒު ގޮތުގައި ބޭނުންކޮށްފަ އެވެ. އަދި އެ ޓެގުގެ ނަމުގައި، އެއްވެސް ހުއްދައެއް ނެތި ވީއައިޕީ ފެސްޓިވަލް ޓުއާ ޕާސްތަކެއް ވަނީ އާންމުންނަށް ވިއްކާފަ އެވެ. މި ޕާސްތައް ވިއްކާފައިވަނީ އާންމު އަގަށްވުރެ މާ ބޮޑު އަގުތަކެއްގަ އެވެ.
މި ޣައިރު ގާނޫނީ ޖަރީމާގެ ތެރެއިން ގިނަ ކޯޓީ ރުޕީސްގެ ފައިސާ ހޯދާފައިވާކަން ފުލުހުން ވަނީ ކަށަވަރުކޮށްދީފައެވެ. މި މައްސަލަ ފަޟީހަތްވުމާ ގުޅިގެން ކޮލްކާތާގެ ފުލުހުން ކުރިއަށްގެންދިޔަ ހާއްސަ އޮޕަރޭޝަނެއްގައި ކުރީގެ ވަޒީރު އިންދުރަނީލް ސެންގެ އިތުރުން މި ސްކޭމް ހިންގުމުގައި ބައިވެރިވި އިސް މީހުން ވަނީ ހައްޔަރުކޮށްފަ އެވެ.
މި މައްސަލައާ ގުޅިގެން ކޮލްކާތާ ފުލުހުން ދަނީ އިތުރު ތަހުގީގުތައް ކުރިއަށްދާ ކަމަށާއި، މި ސްކޭމުގައި ބައިވެރިވި އެންމެންނަށް ގާނޫނީ ފިޔަވަޅު އަޅާނެ ކަމަށް ބުނެފަ އެވެ.
