ސިޓީގެ ކަމާބެހޭ އިދާރާތަކުން ބުނެފައިވަނީ މި ފިޔަވަޅު އަޅާފައިވަނީ އިމާރާތް ކުރުމުގެ ގަވާއިދުތަކާ ހިލާފަށް ހަދާފައިވާ ބައިތަކެއް ނެގުމަށް ދިން ނޯޓިސްތަކަށް އަމަލުކޮށްފައި ނުވާތީ ކަމަށެވެ.
މި ހާދިސާއާ ގުޅިގެން މީޑިއާތަކުގައި އެކި ގޮތްގޮތަށް ވާހަކަ ދެކެވެން ފެށުމުން، އަޖޭ ދޭވްގަންގެ އޮފީހުން ވަނީ މިކަމާ ގުޅޭގޮތުން އަވަސް ބަޔާނެއް ނެރެފައެވެ. އެ ބަޔާނުގައި ބުނެފައިވަނީ ބީއެމްސީން ފިޔަވަޅު އަޅާފައިވާ ތަނަކީ އަޖޭ ދިރިއުޅޭ ގެ ނޫން ކަމަށާއި، އެއީ ވިޔަފާރި އުސޫލުން ކުއްޔަށް ދޫކޮށްފައިވާ އިމާރާތެއް ކަމަށެވެ.
އަޖޭގެ ޓީމުން އިތުރަށް ހާމަކުރި ގޮތުގައި، އެ އިމާރާތުގައި ހުރި ގަވާއިދާ ހިލާފު ބައިތަކަކީ އެތަން ކުއްޔަށް ހިފައިގެން އުޅޭ ފަރާތުން ހަދާފައިވާ ބައިތަކެކެވެ. އަދި އެކަމާ ގުޅޭގޮތުން ބީއެމްސީން ދިން އިރުޝާދުތަކާ އެއްގޮތަށް ކަންކަން އިސްލާހު ކުރުމަށްޓަކައި، ކުއްޔަށް އުޅޭ ފަރާތުން އަމިއްލައަށް އިސްނަގައިގެން ބައެއް ބައިތައް ނަގަން ފަށާފައިވާ ކަމަށް ވެސް އެ ބަޔާނުގައި ބަޔާންކޮށްފައިވެއެވެ.
މި މައްސަލައިގައި އަޖޭ ދޭވްގަންގެ އޮފީހުން ބުނީ، އެ އިމާރާތުގައި ކުރިއަށްދާ މަސައްކަތްތަކަކީ ސަރުކާރުގެ ކަމާބެހޭ އިދާރާތަކުގެ ހުރިހާ ގަވާއިދުތަކާއި މިންގަނޑުތަކާ އެއްގޮތަށް ކުރިއަށްދާ ކަންކަން ކަމަށެވެ. އަދި ބީއެމްސީގެ އެއްވެސް ނިންމުމަކަށް ނުވަތަ ގަވާއިދަކަށް ހިލާފުވުމުގެ އެއްވެސް ވިސްނުމެއް ނެތް ކަމަށް ވެސް އޮފީހުން ބުންޏެވެ.
މުމްބާއީގެ މަހާރާޝްތުރާ ސަރަހައްދުގައި ހުއްދަނެތި ހަދާ އިމާރާތްތަކާ ދެކޮޅަށް ބީއެމްސީން މި ފަހަކަށް އައިސް ވަނީ ހަރުކަށި ފިޔަވަޅުތަކެއް އަޅަން ފަށާފަ އެވެ. މީގެ ކުރިން ވެސް ބޮލީވުޑްގެ ބައެއް މަޝްހޫރު ތަރިންނާއި ޕްރޮޑިއުސަރުންގެ މިފަދަ އިމާރާތްތަކާ ދެކޮޅަށް ބީއެމްސީން ވަނީ ފިޔަވަޅުތައް އަޅައި، ނޯޓިސް ފޮނުވާފަ އެވެ.
