މޫސަ އެނބުރި އަންނަ ފިލްމަކީ އޭނާގެ އެންމެ މަޝްހޫރު ފިލްމު "ފަތިސް ހަނދުވަރު" ވެސް ޑައިރެކްޓުކުރި އީސާ ޝަރީފުގެ އާ ފިލްމު "ކީއްވެ" އެވެ. މި ފިލްމުގައި މޫސައާ އެކު ބަތަލާގެ ރޯލުން ފެނިގެންދާނީ ކުޅަދާނަ އެކްޓަރު ޝީލާ ނަޖީބެވެ. މިއީ ގިނަ ދުވަސްތަކަކަށް ފަހު މި ތަރިން އެކުގައި ސްކްރީނުން ފެންނާނެ ފަހަރެވެ.
ނުވަދިހައިގެ އަހަރުތަކުގައި ދިވެހި ސިނަމާގެ އެންމެ އުދަރެހުގައި ފިޔަޖެހި މޫސަ ވަނީ ގިނަ ބަޔަކު ބަލައިގަތް މޮޅު ފިލްމުތަކެއް ކުޅެފަ އެވެ. އޭގެ ތެރޭގައި ހައްގު، ނާއުއްމީދު، ގިނިހިލަ، ދެރިޔާ އަދި ދަންމަޅި ފަދަ ފިލްމުތައް ފާހަގަކޮށްލެވެ އެވެ. އަދި ދާދި ފަހުން 2024 ވަނަ އަހަރު ނެރުނު "ލަސްވިޔަސް" ގައި އޭނާ ވަނީ ސަޕޯޓިން ރޯލަކުން ފެނިފަ އެވެ.
މޫސަގެ އާ ފިލްމާ ގުޅޭގޮތުން ސޯޝަލް މީޑިއާގައި ހިޔާލުފާޅުކުރި އާންމުންގެ މީހަކު ބުނީ "މިއީ ހަމަ ހީވެސް ނުކުރާ ކަމެއް، ފަތިސް ހަނދުވަރުގެ ޖިނާ އަލުން ސްކްރީނަށް އައުމަކީ ވަރަށް ބޮޑު އުފަލެއް. އީސާ ޝަރީފާއި މޫސަ އެއްވީމަ ފިލްމު ވަރަށް މޮޅުވާނެ" ކަމަށެވެ.
ސަޕޯޓަރުންގެ މި ހިޔާލުތަކުން އެނގޭ ގޮތުގައި މޫސަ ފިލްމީ ދާއިރާއާ ދުރުގައި ގިނަ އަހަރުތަކެއް ވަންދެން ހުރި ނަމަވެސް، އޭނާއަށް އޮތް ތަރުހީބަކަށް ބަދަލެއް ނާދެ އެވެ. އަދި "ކީއްވެ" ވެގެންދާނީ ގިނަ ބަޔަކު ޝައުގުވެރިކަމާއެކު އިންތިޒާރުކުރާނެ ފިލްމަކަށެވެ.
