އޭނާގެ ސިފައާއި އަޑު އޭއައި މެދުވެރިކޮށް ބޭނުންކުރުމުގެ ހައްގު ދިނުމާ ދެކޮޅަށް ނެގި މި ވަރުގަދަ ސްޓޭންޑާއެކު، އޭނާ އާއި ފިލްމު އުފައްދާ ސްޓޫޑިއޯތަކާ ދެމެދު ވަނީ ނުތަނަވަސްކަމެއް އުފެދިފައެވެ. މިއީ އާޓިސްޓުންގެ ހައްގުތަކާއި އަމިއްލަ ސިފަ ރައްކާތެރިކުރުމަށް އެޅި ވަރަށް ހަރުދަނާ ފިޔަވަޅެއްގެ ގޮތުގައި ގިނަ ބަޔަކު ދެކެއެވެ.
އޮސްކާ އެވޯޑު ހާސިލުކޮށްފައިވާ އުމުރުން 60 އަހަރުގެ އެކްޓަރު މި ނިންމުން ނިންމާފައި ވަނީ މާވެލް އާއި ސޮނީ ޕިކްޗާސް ގުޅިގެން ތައްޔާރުކުރާ ސީރީޒްގެ މަސައްކަތްތައް ކުރިއަށްދާ ދަނޑިވަޅެއްގައެވެ. އޭނާ ފާހަގަކުރި ގޮތުގައި އެކްޓަރުންގެ ހުއްދައަކާ ނުލައި އެމީހުންގެ ހަށިގަނޑާއި ސިފަ ޑިޖިޓަލްކޮށް ބަދަލުކުރުމަކީ ބަލައިގަނެވޭނެ ކަމެއް ނޫނެވެ. އަދި މިފަދަ ކަންކަމުގެ ސަބަބުން ކުރިއަށް އޮތް ތަނުގައި ސްޓޫޑިއޯތަކާ އެކު މަސައްކަތް ކުރުމާ މެދު އަލުން ވިސްނަން ޖެހިދާނެ ކަމުގެ އިޝާރާތެއް ވެސް އޭނާ ވަނީ ކޮށްފަ އެވެ.
ފިލްމީ ދާއިރާގައި އޭއައިގެ ބޭނުން އިތުރުވަމުން އަންނަ މައްސަލައަކީ ހޮލީވުޑްގައި މިހާރު އެންމެ ބޮޑަށް ބަހުސްކުރެވެމުންދާ އެއް މައުލޫ އެވެ. މިދިޔަ އަހަރުތަކުގައި ހޮލީވުޑްގެ ލިޔުންތެރިންނާއި އެކްޓަރުން ކުރި އިހުތިޖާޖުތަކުގައި ވެސް މައިގަނޑު އެއް ޝަކުވާއަކަށް ވެފައި އޮތީ އޭއައިގެ ސަބަބުން އިންސާނުންގެ ވަޒީފާތަކަށާއި ފަންނުވެރިކަމަށް ކުރިމަތިވާ ނުރައްކަލެވެ. ނިކޮލަސް ކޭޖްގެ މި ނިންމުމަކީ އެ ހަރަކާތްތަކަށް ލިބުނު އިތުރު ބާރެއްގެ ގޮތުގައި ސިފަކުރެވެ އެވެ.
މި މައްސަލައާ ގުޅިގެން ނިކޮލަސް ކޭޖް ބުނީ އޭއައިއަކީ އޭނާއަށް އޮތް ބިރެއް ކަމަށާއި، ކަލާކުރެއްވި ސިފައާއި އިންސާނީ އިހުސާސްތައް ކޮމްޕިއުޓަރު ކޯޑުތަކަކަށް ބަދަލުކޮށްލުމަކީ ބަލައިގަނެވޭނެ ކަމެއް ނޫން ކަމަށެވެ. އަދި އޭނާގެ ހަށިގަނޑާއި އަޑަކީ އޭނާގެ އަމިއްލަ މިލްކެއް ކަމަށާއި، އެއަށް ބަދަލު ގެނައުމުގެ ބާރު އެހެން އެއްވެސް ބަޔަކަށް ދޭން ބޭނުން ނުވާ ކަމަށް އޭނާ ބުންޏެވެ.
ނިކޮލަސް ކޭޖްގެ މި ހިތްވަރުގަދަ ނިންމުމަށް ފިލްމީ ދާއިރާގެ ގިނަ ފަންނާނުންނާއި އޭނާގެ ސަޕޯޓަރުން އަންނަނީ ވަރަށް ބޮޑަށް ސާބަސް ރައްދުކުރަމުންނެވެ. އޭއައި ޓެކްނޮލޮޖީގެ ކުރިއެރުމާއެކު ފަންނުވެރިންގެ އަސްލު މަސައްކަތް ހިމާޔަތްކުރުމަށް މިފަދަ ބޮޑެތި ތަރިން އިސްނަގައިގެން އަޑުއުފުލުމަކީ ސިނަމާގެ މުސްތަގުބަލަށް ވަރަށް މުހިންމު ކަމެއް ކަމަށް މުރާޖައާކުރާ ފަރާތްތަކުން ބުނެ އެވެ.
