ހަބަރު ލިބޭގޮތުގައި އަލިފާނުގެ ހާދިސާ ހިނގަން މެދުވެރިވީ ބޯޓު އުޑުމަތީގައި ވަނިކޮށް، ފަސިންޖަރުންގެ ސީޓުތަކުގެ މަތީގައިވާ ސާމާނު ބަހައްޓާ ގޮޅިއެއްގެ ތެރޭގައި އޮތް ޕަވަރުބޭންކެއްގައި ރޯވެގެންނެވެ. ރޯވިކަން އެނގުމާއެކު، ބޯޓުގެ ކެބިން ކްރޫއިން ވަނީ އަވަސް ފިޔަވަޅުތަކެއް އަޅައި، ބޯޓުގައި ހުރި އަލިފާން ނިއްވާ އެއްޗެހި ބޭނުންކޮށްގެން އަލިފާންގަނޑު މުޅިން ނިއްވާލާފައެވެ.
މި ހާދިސާއާ ގުޅިގެން ބޯޓު ވަނީ ކުއްލި ހާލަތުގައި ހައިދަރުއާބާދަށް މިސްރާބު ބަދަލުކޮށް، އެ އެއާޕޯޓުގައި ރައްކާތެރިކަމާއެކު ޖައްސާފައެވެ. ބޯޓު ކުއްލި ހާލަތުގައި ޖެއްސިއިރު، އެ ބޯޓުން ދަތުރުކުރި 180 ފަސިންޖަރުންގެ ތެރެއިން އެއްވެސް މީހަކަށް އަނިޔާއެއް ލިބިފައެއް ނުވެއެވެ.
ދަތުރުމަތީގައި ނުރައްކާތެރި ހާދިސާއެއް ހިނގި ނަމަވެސް، ކެބިން ކްރޫއިން ދެއްކި ހުށިޔާރުކަމާއި އަވަސް އަމަލުތަކުގެ ސަބަބުން ބޮޑު ނުރައްކަލަކުން ބޯޓާއި އެންމެހައި ފަސިންޖަރުން ވަނީ ރައްކާތެރިކަމާއެކު ސަލާމަތްވެފަ އެވެ.
