އެމެޒޯން ޕްރައިމް ވީޑިއޯ މެދުވެރިކޮށް ދުނިޔެއަށް ދައްކަން ފެށި މި ސީރީޒަކީ، ސޯޝަލް މީޑިއާގެ ނުފޫޒާއި ސްކޫލް މާހައުލުގައި ދިމާވާ ގޯނާތައް ހިމަނައިގެން، ބަދަލުހިފުމުގެ މި ބިރުވެރި ވާހަކައަށް އާ ދިރުމެއް ގެނެސްދީފައިވާ އުފެއްދުމެކެވެ.
އަށް އެޕިސޯޑުގެ މައްޗަށް އެކުލެވޭ މި މިނީ ސީރީޒްގައި ކެރީ ވައިޓްގެ ލީޑު ރޯލު ކުޅެފައިވަނީ ސަމާ އެޗް ހަވަލްއެވެ. އަދި އޭނާގެ ހަރުކަށި މަންމަ މާގަރެޓްގެ ރޯލުން ފެންނަނީ ފްލެނަގަންގެ ގިނަ އުފެއްދުންތަކުން ފެނިފައިވާ ސަމަންތާ ސްލޮޔަންއެވެ. މި ސީރީޒް ނެރުމާ އެކު، މަޝްހޫރު ފިލްމު ރިވިއު ވެބްސައިޓް ރޮޓެން ޓޮމާޓޯސްގައި 85 ޕަސަންޓުގެ މަތީ ރޭޓިންއެއް ލިބިފައިވާއިރު، މިއީ ފަހަކަށް އައިސް ސްޓީވަން ކިންގްގެ ވާހަކައަކަށް ހެދި އެންމެ ފުރިހަމަ އެއް އުފެއްދުން ކަމަށް ރިވިއުތަކުގައި ވަނީ ބުނެފައެވެ.
މި ވާހަކައަކީ އަހަރު 1974 ގައި ސްޓީވަން ކިންގް ނެރުނު ފުރަތަމަ ވާހަކަ ކަމަށްވާއިރު، 1976 ވަނަ އަހަރު ބްރަޔަން ޑި ޕަލްމާ ޑައިރެކްޓްކުރި ފިލްމަކީ ސިނަމާގެ ތާރީހުގައި ވެސް ފާހަގަކޮށްލެވޭ ކްލެސިކް ފިލްމެކެވެ. ނަމަވެސް ފްލެނަގަންގެ މި އާ ސީރީޒްގައި، ސޯޝަލް މީޑިއާ އާއި އިންޓަނެޓް މެދުވެރިކޮށް ކުރާ ގޯނާތަކާއި، ވިހަ ގުޅުންތަކުގެ ތެރޭގައި ޒުވާނުން ތަހައްމަލުކުރާ ވޭން ވަރަށް ފުންކޮށް ދައްކުވައިދެއެވެ. އަދި އަމިއްލަ ސިކުނޑިން ތަކެތި ހަރަކާތްތެރިކުރުމުގެ ހާއްސަ ބާރު ކެރީއަށް ލިބިގެންދާ ގޮތް ވެސް ވަނީ ސައިންސް ފިކްޝަން ގޮތްގަނޑެއްގައި ވަރަށް ތަފާތުކޮށް ގެނެސްދީފަ އެވެ.
ފިލްމު ދިރާސާކުރާ ފަރާތްތަކުން ފާހަގަކޮށްފައިވާ ގޮތުގައި، މައިކް ފްލެނަގަން ވަނީ މުޅި ވާހަކައިގެ މާހައުލު ޒަމާނާ ގުޅޭ ގޮތަށް ބަދަލުކޮށްފައެވެ. ސީރީޒާ ގުޅޭ ގޮތުން ކްރިޓިކުންގެ ބުނެފައިވަނީ، "މައިކް ފްލެނަގަން ވަނީ ދުވަސްވީ ކްލެސިކް ވާހަކައަކަށް ޒަމާނީ އަސަރުތަކެއް ގެނެސްދީފައިވާ،" ކަމަށެވެ. އަދި މި އުފެއްދުމުގައި ހަރަކާތްތެރިވި ހުރިހާ ތަރިންގެ ހުނަރު ވަރަށް ފުރިހަމައަށް ދައްކާލާފައިވާ ކަމަށް ވެސް ރިވިއުތަކުގައި ވަނީ ބުނެފަ އެވެ.
މީގެ ކުރިން 'ދަ ހޯންޓިން އޮފް ހިލް ހައުސް' އަދި 'މިޑްނައިޓް މާސް' ފަދަ ކާމިޔާބު ސީރީޒްތައް ގެނެސްދިން ފްލެނަގަން ހާމަކުރި ގޮތުގައި، އޭނާ ބޭނުންވަނީ 'ކެރީ' ސީރީޒް ތިން ސީޒަނަށް ދެމިގެންދާ ގޮތަށް ކުރިއަށް ގެންދާށެވެ. މީގެ ކުރީގެ ފިލްމުތަކާ ހިލާފަށް މި ފަހަރުގެ ސީރީޒްގެ ނިމުމުގައި ކެރީ މަރުނުވެ ދިރިހުންނަ ގޮތަށް ނިންމާފައިވުމަކީ، ކުރިއަށް އޮތް ތަނުގައި މި ވާހަކައިގެ އިތުރު ބައިތަކެއް ފެނިގެންދާނެ ކަމުގެ ހެއްކެއް ކަމަށް ހަބަރުތައް ބުނެއެވެ. މި އާ ބަދަލުތަކަށް ވާހަކައިގެ އަސްލު ލިޔުންތެރިޔާ ސްޓީވަން ކިންގް ވެސް ވަނީ ތައުރީފުކޮށްފަ އެވެ.
