މި ދިރާސާގައި ރިސާޗަރުން ބޭނުންކޮށްފައިވަނީ 80 އަހަރުގެ އިންސާނެއްގެ ހަށިގަނޑުން ނެގި ޕްރީކާސާ ރެޑް ބްލަޑް ސެލް ނުވަތަ ރަތް ލޭގެ ސެލްތައް އުފެދުމުގެ ކުރީ މަރުހަލާގެ ސެލްތަކެވެ. ލެބޯޓްރީގައި ކުރިއަށްދިޔަ މި މަސައްކަތުގެ ތެރެއިން، ސައިންސްވެރިން ވަނީ މި ސެލްތައް "ނިއުރަލް ސްޓެމް ސެލް" ނުވަތަ ނާރުތަކުގެ ނިޒާމަށް ހާއްސަ ސްޓެމް ސެލްތަކަކަށް ކާމިޔާބުކަމާއެކު ރީޕްރޮގްރާމްކޮށްފައެވެ.
މި ލެބޯޓްރީ މަރުހަލާގެ ތެރޭގައި، އެ ސެލްތަކުގެ "ބަޔޮލޮޖިކަލް މޮލެކިއުލާ ކްލޮކް" ނުވަތަ އުމުރު އަންގައިދޭ މޮލެކިއުލާ ގަޑި ވަނީ އަލުން ރީސެޓްވެފައެވެ. އެގޮތުން، 80 އަހަރުގެ ސެލްތަކުގެ އުމުރު ވަނީ 20 އަހަރަށް ވުރެ ކުޑަ އުމުރެއްގެ ހާލަތަށް ފަހަތަށް ޖެހިފައެވެ.
މި ތާރީޚީ ހޯދުމުގެ ސަބަބުން، ސިކުނޑި އަލުން ޒުވާންކުރުމާ ގުޅޭގޮތުން ކުރެވޭ ދިރާސާތަކަށް ކުރިން ނުލިބޭފަދަ އާދަޔާޚިލާފު ބޮޑެތި ފުރުސަތުތަކެއް ވަނީ ހުޅުވިގެންގޮސްފައެވެ. މިއީ ސިކުނޑީގެ ސެލްތައް އާލާކޮށް، އުމުރުން ދުވަސްވުމާ ގުޅިގެން ސިކުނޑިއަށް އަންނަ ބަދަލުތައް ދެނެގަތުމަށް ލިބުނު މުހިންމު ކުރިއެރުމެކެވެ.
