އެމްޑީޕީގެ ޓިކެޓް ހޯއްދަވަން އެ ޕާޓީގެ ޕްރައިމަރީގައި ވާދަކުރައްވަން ނިމްމެވިކަން ކުރީގެ ނައިބު ރައީސް ފައިސަލް ނަސީމް ރަސްމީކޮށް އިއުލާން ކުރެއްވީ މިއަދު އެވެ. ފައިސަލްގެ ރަނިންމޭޓަކަށް ހަމަޖައްސަވަނީ މާލޭގެ މިހާރުގެ މޭޔަރު އާދަމް އާޒިމް އެވެ.
ފައިސަލްގެ ނިންމެވުމަށް ތާއިދުކުރައްވާކަން އެކްސްގައި ހާމަކުރައްވަމުން މިދިޔަ އެމްޑީޕީ ވެރިކަމުގައި ޕްލޭނިން މިނިސްޓަރުކަން ކުރެއްވި އަސްލަމް ވިދާޅުވީ އެމްޑީޕީގެ ރިޔާސީ ކެންޑިޑޭޓެއްގެ ގޮތުގައި ފައިސަލް، އަދި ރަނިންމޭޓެއްގެ ގޮތުގައި އަޒީމަށް ފުރިހަމައަށް ތާއީދުކުރައްވާކަމަށެވެ.
އެގޮތުން ރާއްޖޭގެ އެކި ކަންކޮޅުތަކުގައި މިހާރު ގާއިމުކުރެވިފައިވާ އުމްރާނީ ވަސީލަތްތަކުގެ ބޭނުން އެންމެ ހަރުދަނާ ގޮތުގައި ހިފައި، އެމްޑީޕީގެ އިގްތިސާދީ ލާމަރުކަޒީ ތަސައްވުރު ހަގީގަތަކަށް ހަދައި، ގައުމުގެ އިގްތިސާދު އަލުން ހަމަމަގަށް އެޅުވުމުގެ ގާބިލުކަން އެބޭފުޅުންގެ ކިބައިގައި ހުރިކަމަށް ގަބޫލުކުރައްވާކަމަށް އަސްލަމް ވިދާޅުވި އެވެ.
ފައިސަލް ނަސީމް މިއަދު ވިދާޅުވީ، ޕްރައިމަރީގައި ވާދަކުރުމުގެ އަޑުތައް އެރިތާ ދުވަސްތަކެއް ވިޔަސް ރަސްމީކޮށް އެކަން އިއުލާން ކުރުން ލަސްވެގެން ދިޔައީ، އެކަމާ ގުޅޭގޮތުން މަޝްވަރާތައް ކޮށް ރާއްޖޭގެ މަސްރަހު އޮތް ގޮތް ދިރާސާ ކުރުމަށް ކަމަށެވެ.
ފައިސަލް ވިދާޅުވީ ޕްރައިމަރީގައި ވާދަކުރައްވަން ނިންމެވީ ކުރީގެ ރައީސް އިބްރާހިމް މުހައްމަދު ސާލިހާ ވަރަށް ބޮޑަށް މަޝްވަރާ ކުރައްވައި އެ މަނިކުފާނުގެ ވަރަށް ބޮޑު އެއްބާރުލުމެއް އޮވެގެން ކަމަށެވެ.
