އާދިއްތަދުވަހުގެ ރޭ 8:48 ހާއިރު ހިނގި އެކްސިޑެންޓާ ގުޅޭ ގޮތުން ސުބަންގް ޖަޔާ ސިޓީގެ ޕޮލިސް ޗީފް، އެސިސްޓަންޓް ކޮމިޝަނަރު ވަން އަޒްލާން ވަން މާމަތު މީޑިއާއަށް މައުލޫމާތު ދެއްވި ގޮތުގައި، އެކްސިޑެންޓް ހިނގީ ރައިޑް ޝެއަރިންގެ ދަށުން ޓެކްސީގެ ހިދުމަތްދޭ 37 އަހަރުގެ މެލޭޝިޔާ ފިރިހެނަކު ދުއްވި ޕެރޯޑުއާ އެޓީވާ ބްރޭންޑްގެ ކާރެއް އެހެން ކާރެއްގައި ޖެހިގެންނެވެ. 

މި ހާދިސާގައި އިމޫލީ ނިޔާވީ ކާރު ތެރޭގައި ތާށިވެ، ބޮޑެތި އަނިޔާތަކެއް ލިބިގެންނެވެ. މެޑިކަލް ޓީމުތަކަށް އެ ސަރަހައްދަށް ދެވުނުއިރުވެސް އެ ދަރިވަރު ވަނީ ނިޔާވެފައި ކަމަށާއި، ނިޔާވި ދަރިވަރުގެ ހަށިގަނޑު ޕޯސްޓްމޯޓަމް ހެދުމަށް ސަރުދަންގް ހޮސްޕިޓަލަށް ގެންގޮސްފައި ކަމަށް މެލޭގެ ނޫސްތަކުން ބުނެ އެވެ. 

މި އެކްސިޑެންޓްގައި އަނެއް ދަރިވަރަށް ކުދިކުދި އަނިޔާތަކެއްވި ނަމަވެސް، ސީރިއަސް އަނިޔާއެއް ނެތް ކަމަށް މެލޭޝިއާ މީޑިއާއިން ރިޕޯޓްކުރެ އެވެ. މި އެކްސިޑެންޓު ހިނގީ ގްރެބް އެޕްލިކޭޝަން ބޭނުންކޮށްގެން ކާރެއްގައި ގެއަށް ދިޔަ މަގުމަތީގަ އެވެ.

މެލޭޝިއަކީ ގިނަ އަދަދެއްގެ ދިވެހިން ތައުލީމު ހާސިލުކުރުމަށް ގޮސް އުޅޭ ގައުމެކެވެ.