ޒަމާން ބަދަލުވެއްޖެ އެވެ. ޖަވާބުދާރީ ކުރުން އިތުރުކޮށް ގޯސް މަގުން ހިނގުމަށް އޮތް ފުރުސަތެއް ނަމަ ބަންދު ކުރަން ޖެހޭ ކަމަށް ބުނެ ގޮވާލާ ގޮވާލުމުގެ އަޑު މަޑު ވެއްޖެ އެވެ. ނަމަވެސް ހިތާމައަކީ އެ ފުރުސަތު ސީދާ ރައްޔިތުންނަށް ވެސް އަދި މެމްބަރުންނަށް ވެސް ނުދިނުމެވެ.
ސިޔާސީ ޕާޓީ ހަދައިގެން ހިންގާތާ މިހާރު އެތައް އަހަރެއްވެގެން ދިޔައިރު ވެސް ޕާޓީތަކުގެ އިސް މީހުންނަކަށް އެ މީހުން ޖަވާބުދާރީ ކުރެވޭނެ ފަސޭހަ މަގެއް ޕާޓީގެ އަސާސީ ގަވާއިދުގައި ހިމަނާލަން ނުކެރުނެވެ. އެންމެ ކުޑަ މިނުން އިންތިހާބީ ހާދިމުގެ މައްޗަށް ރިކޯލް ވޯޓު ނެގޭނެ ފުރުސަތު ވެސް އާންމު މެމްބަރުންނަށް ދޭން ބޭނުން ނުވި އެވެ.
ޑިމޮކްރެސީގެ އެންމެ އަސާސީ އެއް ސިފައަކީ ވީހާ ވެސް ގިނަ ބަޔަކު ބައިވެރިކޮށްގެން ކަންކަން ކުރުމެވެ. ސިޔާސަތު އެކުލަވާލުމާއި ގޮތް ނިންމުމުގައި ވެސް ބައިވެރި ކުރުމެވެ. ޖަވާބުދާރީ ކުރެވޭނެ އެންމެ ފަސޭހަ ގޮތަކަށް މަގުތައް ކޮށާފައި ބޭއްވުމެވެ. ނަމަވެސް އެ ސިފަތަކާއި ގޮތްތަކަށް ފުރުސަތު އޮތް ޕާޓީއެއް ނެތް ކަހަލަ އެވެ. ނަމަވެސް ސިޔާސީ ޕާޓީއަކީ ޑިމޮކްރެޓިކް އުސޫލުން ހިންގާ ތަންތަން ކަމަށް ބުނެ ރަށު ތެރޭގައި ދަނީ ވާހަކަ ދައްކަމުންނެވެ. ނަމަވެސް ސުވާލަކީ އެ ފުރުސަތު ދީގެން ޕާޓީތައް ހިންގަން ބޭނުން ނުވެގެން އުޅެނީ ކީއްވެތޯ އެވެ.
ގައުމެއް ވިޔަސް ޕާޓީއެއް ވިޔަސް އެ ތަނެއް ހިންގުމަށް އެކަށައަޅާ އޮނިގަނޑުތަކުގައި ގޮތް ނިންމުމުގެ ފުރުސަތު ވީހާ ވެސް މަދު ބަޔަކަށް ލިބޭ ގޮތައް ކަނޑައެޅުމަކީ ޒަމާނުންސުރެ ކޮށް އުޅޭ ކަމެކެވެ. ސަބަބެއް ކަމަށް އެންމެ ފުރަތަމަ ދެއްކި ބަހަނާއަކީ އެންމެން އެއް ތަނަކަށް އެކުވެ ކަންކަން ކުރުމަށް ހުރި ދަތިތަކުގެ ވާހަކަ އާއި އެއްވުންތަކަށް އައިސް އުޅުމަކީ ނުހަދަނު އުނދަގޫކަމެއް ކަމަށެވެ. އެއީ އެ ޒަމާނަށް ތެދެއް ނަމަވެސް މިހާރު މިވަނީ ޒަމާން ބަދަލުވެ ތަހުޒީބުވެފަ އެވެ.
އެމްޑީޕީގެ ކޮންގްރެސްގެ މިއަދު ހެނދުނު ކުރިއަށް ދިޔަ ދަންފަޅީގެ ތެރެއިން - ފޮޓޯ/ އެމްޑީޕީ
ދަތުރުފަތުރާއި މުއާސަލާތީ ވަސީލަތްތަކާއި ޓެކްނޮލޮޖީ މިހާރު ވަނީ އެހެން ލެވަލަކަށް ތަރައްގީވެފަ އެވެ. އެންމެން އެތަނަކަށް އެއްނުވެ ވެސް ގިނަ މީހުން ބައިވެރިކޮށްގެން ކަންކަން ކުރެވޭނެ މިންވަރަށް ދުނިޔޭގެ ކަންކަން ތަރައްގީވެއްޖެ އެވެ. ނަމަވެސް މަދު ބަޔަކު ބޭނުންކޮށްގެން ޕާޓީތަކާއި ގައުމުތަކުގައި ވެސް ކަންކަން ނިންމަން ކަނޑައަޅާފައިވާ ހަމަތައް ބަދަލު ކުރާކަން ނުފޫޒު ގަދަ މީހުން ބޭނުމެއް ނުވެ އެވެ. އެހެން ކަމުން މެމްބަރުންގެ ހަގީގީ ބާރު އެ މީހުންގެ އަތްމަތީގައި ވީހާ ގިނަ ވަގުތައް ބާއްވާކަން އެ މީހުން ހިތެއް ނޭދެ އެވެ. ނަމަވެސް ދައްކަނީ "ސޭޓުންގެ" ޒަމާން މާޒިވެފައިވާ ވާހަކަ އެވެ. ނަމަވެސް ފެންނަނީ އެ މީހުންގެ ޒަމާނުގައި ކަންކަން ކުރި ގޮތައް ކަންކަން ކުރަމުން އަންނަ ތަނެވެ.
މަދު ބައެއްގެ އަތްމަތީގައި ބާރުތައް ބާއްވައިގެން އާންމު މެމްބަރުން މުގޯލި އަޅުވަން މަޖުބޫރުވާ ހާލަތުގައި މެމްބަރުން ބައިތިއްބުމަކީ މައްސަލައެއްގެ ގޮތުގައި ނުދެކެ އެވެ. އެކަމުގެ ނަތީޖާއަކީ ޕާޓިގެ ތެރޭގެ އިންތިހާބެއް ނެތް ނަމަ މެމްބަރުންނަކީ އެއްވެސް ބޭނުމެއް ނެތް ބަޔަކަށް ހަދާލައިގެން މަގުމަތިކޮށްލަ އެވެ.
ސިޔާސީ ޕާޓީގެ ހިންގުން ޒިންމާދާރު ކުރެވި، ޑިމޮކްރެޓިކް އުސޫލުތައް ފުރިހަމައަށް ތަންފީޒުވުމަކީ ހަމައެކަނި ޕާޓީއަށް ލިބޭ ކުރިއެރުމެއް ނޫނެވެ. ސިޔާސީ ޕާޓީތަކަކީ ސަރުކާރު އެކުލަވާލާ އަދި ގައުމުގެ މުހިންމު ސިޔާސަތުތައް ކަނޑައަޅާ އިދާރާތަކަށް ވުމުން، ޕާޓީތަކުގެ ހިންގުން ރަނގަޅުވުމުގެ ފައިދާ ސީދާ ގޮތުންނާއި ނުސީދާ ގޮތުން މުޅި ގައުމަށް މުޖުތަމައުއަށް ކުރާނެ އެވެ. ގައުމުގެ ހަމަޖެހުމާއި، ތަރައްގީ ބިނާވެފައިވަނީ ޒިންމާދާރު ސިޔާސީ ޕާޓީތަކެއްގެ އަމަލާއި ބަހުގެ މައްޗަށެވެ.
ޕީއެންސީގެ މަގާމުތަކާ ހަވާލުވި ބޭފުޅުންނަށް މަގާމުގެ އިގުރާރު ލައިދެއްވަމުން ދިޔައިރު، ރައީސް މުއިއްޒު ސްޓޭޖްގައި ހުއްޓިވަޑައިގެން - ފޮޓޯ/ ޕީއެންސީ
ތެދެކެވެ. ސިޔާސީ ޕާޓީތަކުގެ ލީޑާޝިޕް ރިކޯލް ކުރެވޭނެ ގޮތެއް އޮތުމަކީ ޕާޓީގެ އެތެރޭގެ ޑިމޮކްރަސީ ވަރުގަދަވެ، އިހުލާސްތެރިކަމާއެކު ގައުމާއި ރައްޔިތުންނަށް ހިދުމަތްކުރާނެ ލީޑަރުން އުފެދުމަށް މަގުފަހިވާނެ ކަމެކެވެ. މިއީ ރާއްޖޭގެ ސިޔާސީ ނިޒާމު އިސްލާހުކުރުމަށްޓަކައި ގެންނަންޖެހޭ ކޮންމެހެން ބޭނުންތެރި ބަދަލެކެވެ.
މި ބަދަލަށް ގޮވާލާ އެދޭ ރާއްޖެ ޓީމުން މިހާރުވަނީ "ސިޔާސީ ޕާޓީތައް ރިފޯމް ކުރަން" އިސްލާހީ ހަރަކާތަކަށް ގޮވާލާފަ އެވެ. "ސިޔާސީ ޕާޓީތަކުގެ ރިފޯމަށް" ގާނޫނު އަސާސީގައި ހިމެނުމަށް ގޮވާލާ ކަންކަމުގެ ތެރޭގައި:
ހުށައެޅުން
ނަތީޖާ
ސިޔާސީ ޕާޓީތަކަކީ ރައްޔިތުންގެ މިނިވަންކަމާއި ހައްގުތައް ރައްކާތެރިކޮށްދޭ، ގައުމީ ފިކުރު އިސްކުރާ ތަންތަނަށް ހަދަންޖެހެ އެވެ. ޕާޓީގެ އެންމެ މަތީ ބާރަކީ އާންމު މެންބަރުންކަން ކަށަވަރުކޮށް، ލީޑަޝިޕް ޖަވާބުދާރީ ކުރުވޭނެ ހަރުދަނާ ނިޒާމެއް ގާއިމުކުރުމަކީ ރާއްޖޭގެ ޑިމޮކްރަސީ ހަރުދަނާކުރުމަށްޓަކައި މިއަދު އަޅަންޖެހިފައިވާ އެންމެ މުހިންމު ފިޔަވަޅެވެ. މިއީ ރައްޔިތުންގެ ކަންބޮޑުވުންތަކަށް ޖަވާބުދާރީވުމަށާއި، ގައުމީ މައްސަލަތަކުގައި ސިޔާސީ ޕާޓީގެ ދުރުވިސްނުން ހާމަކުރުމަށްޓަކައި މުހިންމު ކަމެކެވެ.
