މި މައްސަލައަކީ 7 އޮކްޓޫބަރު 2024 ގައި ވެލާނާ އިންޓަނޭޝަނަލް އެއާޕޯޓުން ގއ. ކޫއްޑޫއަށް ފުރަން ގޮސް އުޅެނިކޮށް، ފަސީހުގެ ފަލަމަސްގަނޑުގައި އޮޅާފައިވާ ޓޭޕްގެ ދަށުން 23.5976 ގްރާމްގެ ޑައިމޯފިން އާއި 252.1652 ގްރާމްގެ ކެނެބިސް ފެނުނު މައްސަލައެކެވެ.
ގާޒީ ޢަލީ ނަދީމް ކުރެއްވި ހުކުމުގައި، ފަޞީޙުގެ މައްޗަށް ސާބިތުވެފައިވާ ދެ ދަޢުވާއަކީ:
1- ޑައިމޯފިން ޓްރެފިކްކުރުމުގެ ދައުވާ: އުމުރަށް ޖަލަށް ލުމާއެކު 100,000 ރުފިޔާއިން ޖޫރިމަނާކުރުން. (ބަންދުގެ މުއްދަތު އުނިކުރުމުން ތަންފީޒުކުރަންޖެހެނީ 24 އަހަރާއި 4 މަހާއި 3 ދުވަހުގެ ޖަލު އަދަބެކެވެ.)
2- ކެނެބިސް ޓްރެފިކްކުރުމުގެ ދައުވާ: އުމުރަށް ޖަލަށް ލުމާއެކު 100,000 ރުފިޔާއިން ޖޫރިމަނާކުރުން.
މި ދެ މައްސަލައިގެ ޖުމްލަ 200,000 ރުފިޔާގެ ޖޫރިމަނާ ފައިސާ، ކުރިއަށް އޮތް 12 މަސްދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދެއްކުމަށް ވަނީ އަންގާފައެވެ.
ޝަރީއަތުގެ މަރުޙަލާގައި ދިފާއުން އޭނާއަކީ މަޖުބޫރުކުރުވައިގެން ކުރުވި "ހިއުމަން ޓްރެފިކިންގެ ވިކްޓިމެއް" ކަމަށް ބުނި ނަމަވެސް، އެކަން ސާބިތުކޮށްދެވޭނެ އެއްވެސް ހެއްކެއް ހުށަހެޅިފައި ނުވާތީއާއި ތަހުގީގުގައިވެސް ހަނުހުރެފައިވާތީ، ދައުލަތުގެ ހެކިތަކަށް ބަލައި ކޯޓުން ނިންމީ ކުށް އެކަށީގެންވާ މިންވަރެއްގެ ޝައްކެއްނެތި ސާބިތުވާ ކަމަށެވެ.
