ޔޫއޭއީން މިއަދު ވަނީ މިއީ ޓެރަރިސްޓް ހަމަލާއެއް ދިނުމުގެ ނިޔަތުގައި ކޯ-ޕައިލެޓް ހިންގި އަމަލެއް ކަމަށް ބުނެފަ އެވެ. ކޯ-ޕައިލެޓަކީ އުމާންގެ ރައްޔިތެއް ކަމަށްވާ އުމުރުން 29 އަހަރުގެ ހަމާމް އަލް-ހައްމާމީ ކިޔާ މީހެކެވެ.

އޭނާއަކީ ހައްދުފަހަނައެޅި ފިކުރުތަކަށް ތާއީދުކުރާ މީހެއް ކަމަށް ބެލެވޭތީ އުމާންގެ އިދާރާތަކުން ކުރިން ވަނީ އޭނާއަށް ޕައިލެޓްކަން ދިނުން މަނާކޮށްފައި ކަމަށް ވެސް ވަނީ ބުނެފަ އެވެ. އެހެންވެ، ފްލައިދުބާއީގެ ވަޒީފާއަށް އޭނާ ނެގި ގޮތުގެ ތަހުގީގު ވެސް މިހާރު ދަނީ ހިންގަމުންނެވެ.

ޔޫއޭއީގެ އެޓާނީ ޖެނެރަލް ވިދާޅުވީ، މި ހާދިސާގެ ފަހަތުގައިވާ އަސްލު މަގުސަދާއި، އެހެން އެއްވެސް ޖަމާއަތަކާ އޭނާއާ ގުޅުން އޮތްތޯ ބެލުމަށްޓަކައި ސަރަހައްދީ ސެކިއުރިޓީ އިދާރާތަކާ ގުޅިގެން ފުޅާ ދާއިރާއެއްގައި ތަހުގީގު ކުރިއަށްދާ ކަމަށެވެ.

މިދިޔަ ބުދަ ދުވަހު މި ހާދިސާ ހިނގީ 174 ފަސިންޖަރުންނާއި އަށް ކުރޫންނާއެކު ދުބާއީން އިޒްރޭލުގެ ތެލް އަވީވްއަށް ދަތުރު ކުރި ފްލައިދުބާއީގެ ބޯޓެއްގަ އެވެ. 

ފްލައިޓް ޓްރެކިން ޑޭޓާތަކުން ދައްކާ ގޮތުގައި، ބޯޓުން ފުރަތަމަ 7700 ގެ އިމަޖެންސީ ކޯޑު ފޮނުވުމަށް ފަހު، އޭގެ ހަތް މިނެޓު ފަހުން ވަނީ ހައިޖެކްކުރުން ނުވަތަ ގަވާއިދާ ޚިލާފު އަމަލެއް ހިނގާކަން އަންގައިދޭ 7500 ގެ ކޯޑު ފޮނުވާފަ އެވެ. އަދި ގާތްގަނޑަކަށް 29 ސިކުންތުގެ ތެރޭގައި ބޯޓު ވަނީ 14،000 ފޫޓު ތިރިކޮށްފަ އެވެ.

އޭގެ ފަހުން އިޒުރާއީލުން ވަނީ ބޯޓުގެ މިސްރާބު ބަދަލުކޮށް ސައުދީ އަރަބިއްޔާއަށް ޖައްސަން ޖެހުނީ ހައިޖެކްކޮށްގެން ނޫން ކަމަށާއި، އެއީ ސަލާމަތީ ނުރައްކަލެއް އޮތް ކަމެއް ނޫން ކަމަށް ބުނެފަ އެވެ.

މި ހަމަލާއާ ގުޅިގެން ބޯޓު ކޮންޓްރޯލުން ނެއްޓި، ކުޑަ ވަގުތުކޮޅެއްގެ ތެރޭގައި ގާތްގަނޑަކަށް 17,000 ފޫޓު (5,180 މީޓަރު) ތިރިއަށް ވެއްޓުނެވެ. ނަމަވެސް، ބޯޓުގައި ތިބި އިތުރު ދެ ޕައިލެޓުން ވަނީ ބޯޓުގެ ކޮންޓްރޯލް އަލުން އަތުލާފަ އެވެ.

މި ހާދިސާއާ ގުޅިގެން ފްލައިޓްގެ މިސްރާބު ބަދަލުކޮށް، ސައުދީ އަރަބިއްޔާގެ ހުޅަނގު އުތުރުގައި އޮންނަ ތަބޫކްގެ ޕްރިންސް ސުލްތާން ބިން އަބްދުލްއަޒީޒް އިންޓަނޭޝަނަލް އެއާޕޯޓަށް ވަނީ ކުއްލި ހާލަތުގައި ޖައްސާފަ އެވެ.

އެ މައްސަލައާ ގުޅޭ ގޮތުން ޔުނައިޓެޑް އަރަބް އެމިރޭޓްސްއިން ވަނީ، އެ ހަމަލާއަކީ ބޯޓު ވައްޓާލަން ކޯޕައިލެޓް ދިން ހަމަލާއެއް ކަމަށާއި އެއީ ޓެރަރިޒަމްގެ އަމަލެއް ކަމަށް ބުނެފަ އެވެ.