މި މަހުގެ 1 އިން 2 އަށް ކުރިއަށްދިޔަ މި ކޮންގްރެސްގައި އޭ.އޭ.ސީ.ސީގެ މެމްބަރު 18 ޤައުމެއްގެ އެންމެ މަތީ ކޯޓުތަކުގެ އިސްވެރިން ބައިވެރިވެވަޑައިގެންނެވިއެވެ.
ކޮންގްރެސްގެ ދެވަނަ ދުވަހުގެ ޕްލެނަރީ ސެޝަންގައި އުއްތަމަފަނޑިޔާރު ޢަބްދުލްޣަނީ މުޙައްމަދު ތަޤްރީރު ކުރެއްވީ "ފްރޮމް ކޭސް ބެކްލޮގްސް ޓު ޓައިމްލީ ޖަސްޓިސް: ޑިޖިޓަލް ޓްރާންސްފޯމޭޝަން ފޮރ ސްޓްރެންތަނިންގ ޖުޑީޝަލް ޕާރފޯމަންސް އެންޑް ޕަބްލިކް ޓްރަސްޓް" (މައްސަލަތައް ލަސްނުވެ އަވަސް އިންސާފަށް: ޢަދުލު އިންސާފު ޤާއިމު ކުރުމުގެ ފެންވަރު ރަނގަޅުކޮށް އިތުބާރު އުފެއްދުމުގެ ޑިޖިޓަލް ޓެކްނޮލޮޖީގެ ދައުރު) މި މަޢުޟޫއަށެވެ.
އުއްތަމަފަނޑިޔާރުގެ ތަޤްރީރުގައި، ކޯޓުތަކުގައި ނުނިމިހުރި މައްސަލަތައް ނިންމުމަށް ރާއްޖޭގައި ކުރެވެމުންދާ ޚާއްޞަ މަސައްކަތްތަކަށް އަލިއަޅުއްވާލެއްވިއެވެ. އަދި ޓެކްނޮލޮޖީއާއި އާޓިފިޝަލް އިންޓެލިޖެންސް (އޭ.އައި)ގެ އެހީގައި މައްސަލަތައް ލަސްވާ ސަބަބުތައް ދެނެގަނެ، ޝަރީއަތުގެ މަސައްކަތްތައް އަވަސްކުރެވިދާނެ ގޮތްތަކާ މެދު ވާހަކަފުޅު ދެއްކެވިއެވެ.
ނަމަވެސް، ޓެކްނޮލޮޖީއާއި އޭ.އައި ކިތަންމެ ކުރިއަރައިގެން ދިޔަ ނަމަވެސް، ފަނޑިޔާރުން ކުރައްވާ މަސައްކަތްޕުޅު ނުވަތަ މައްސަލަތަކަށް ގޮތް ނިންމުމުގައި ފަނޑިޔާރުގެ ދައުރު އަލްގޯރިދަމްއަކަށް ދޫކޮށްލުމަކީ ކުރެވޭނެ ކަމެއް ނޫންކަން އުއްތަމަފަނޑިޔާރު ފާހަގަކުރެއްވިއެވެ. އެހެންކަމުން، ޖުޑީޝަރީތަކުން އަމާޒު ހިފަންޖެހޭނީ އޭ.އައި ފަދަ ޓެކްނޮލޮޖީތަކަކީ ޢަދުލު އިންސާފުގެ ނިޒާމަށް އެހީތެރިވެދޭ ވަސީލަތްތަކެއްގެ ގޮތުގައި ބޭނުންކުރުމަށް ކަމަށް ވިދާޅުވިއެވެ.
މީގެއިތުރުން، ރާއްޖޭގެ ޖުޑީޝަރީގައިވެސް މި އުޞޫލުން ބައެއް މަސައްކަތްތައް ކުރެވެމުންދާކަން ފާހަގަކުރައްވައި، ރާއްޖޭގައި ވަށާޖެހޭ ކޭސް މެނޭޖްމަންޓް ސިސްޓަމެއް ބޭނުންކުރުމާ ގުޅޭގޮތުން ގެންގުޅުއްވާ ތަސައްވުރުވެސް އުއްތަމަފަނޑިޔާރު ހިއްސާކުރެއްވިއެވެ.
މި ކޮންގްރެސްގެ ހަވާސާގައި، އެހެން ޤައުމުތަކުގެ އުއްތަމަފަނޑިޔާރުންނާއި ދުސްތޫރީ ކޯޓުތަކުގެ ފަނޑިޔާރުންނާއި ޖުޑީޝަރީތަކުގެ އިސްވެރިންނާއެކު މުހިއްމު މަޝްވަރާތަކެއް ބޭއްވުނެވެ. އަދި ދުސްތޫރީ ކޯޓުތަކުގައި އޭ.އައި ބޭނުންކުރުމާ ބެހޭގޮތުން ބައިވެރިން އެއްބަސްވި ހަމަތަކުގެ މައްޗަށް ބިނާކޮށް "ސަމަރުޤަންދު ޑިކްލަރޭޝަން"ގެ ނަމުގައި ޤަރާރެއް އެކުލަވާލައި ފާސްކޮށްފައިވެއެވެ.
