މުޅި މުޖުތަމައުގައި އާންމުވަމުންދާ މި ސްކޭމްގައި މަކަރުވެރިން ދަނީ ބެލެނިވެރިންނަށް އަމާޒުކޮށްގެން އޮޅުވާލުމުގެ ބޮޑެތި އަމަލުތަކެއް ހިންގަމުންނެވެ.
ސިންގަޕޫރު ފުލުހުން ނެރުނު އިލްތިމާސްގައިވާ ގޮތުން، މި ސްކޭމް ހިންގާ ފަރާތްތަކުން އެކި މީހުންގެ ވޯޓްސްއެޕް އެކައުންޓްތައް އަތުލައިގަނެއެވެ. އެއަށްފަހު، އެ އެކައުންޓްތައް ބޭނުންކޮށްގެން ދަރިންގެ ގޮތުގައި ހެދިގެން ބެލެނިވެރިންނަށް މެސެޖު ކުރެއެވެ. އަދި ކޯސްތަކަށް ކުއްލިއަކަށް ބޭނުންވާ އިމަޖެންސީ ފަންޑު ނުވަތަ ފައިސާ ފޮނުވައިދިނުމަށް އެދި މެސެޖު ފޮނުވައެވެ.
މި މަކަރުވެރިން ބެލެނިވެރިންނަށް އޮޅުވާލުމަށްޓަކައި ތައުލީމީ އިދާރާތަކުގެ އޮފިޝަލް ލޯގޯތައް ހިމަނައިގެން ތައްޔާރުކޮށްފައިވާ ސައްހަނޫން ކޮންސެންޓް ފޯމުތައްވެސް ބޭނުންކުރެ އެވެ. މިފަދަ ނަކަލު ފޯމުތައް ފޮނުވައިގެން ބެލެނިވެރިންނަށް އޮޅުވާލައި، އެތައް ހާސް ޑޮލަރެއް ޓްރާންސްފަރ ކުރުވައިގެން ފައިސާ ހޯދަމުންދާކަމަށް ފުލުހުން ވަނީ ހާމަކޮށްފަ އެވެ.
އެހެންކަމުން، ވޯޓްސްއެޕް މެދުވެރިކޮށް ކުއްލި މާލީ އެހީތެރިކަމަށް އެދި ދަރިންގެ ނަމުގައި ނުވަތަ އެހެންވެސް މީހެއްގެ ނަމުގައި މެސެޖެއް ލިބުނު ކަމުގައި ވީނަމަވެސް، ފައިސާ ފޮނުވުމުގެ ކުރިން ސީދާ އެ މީހަކަށް ގުޅައިގެން އެއީ ތެދެއްކަން ކަށަވަރުކުރުމަށް ފުލުހުން ވަނީ އިލްތިމާސްކޮށްފަ އެވެ.
