އޮތޯރިޓީ އާއްމުކުރި އިއުލާނެއްގައި ބުނީ އިރުވައި މޫސުމަކީ ދުނިޔޭގެ އެކި ކަންކޮޅުތަކުން ގިނަ ބާވަތްތަކުގެ މޫސުމީ ދޫނި ރާއްޖެއަށް ހިޖުރަކުރަމުން އަންނަ ދުވަސްވަރުކަމަށެވެ.
ހިޖުރަކުރާ ދޫންޏަކީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނު ގެ ދަށުން ހިމާޔަތްކުރެވިފައިވާ ދިރުންތަކެއްކަމަށާއި އެފަދަ ދޫނި ހިފާ އެތަކެތި ގެންގުޅުމަކީ މަނާކަމެއްކަމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީ ބުނެ އެވެ.
ދިވެހިރާއްޖެއިން ފެންނަ ގިނަ ބާވަތްތަކުގެ ދޫންޏަކީ މިގޮތަށް މޫސުމާ ގުޅިގެން ރާއްޖެއަށް ހިޖުރަކުރާ ބާވަތްތައް ކަމުގައިވާއިރު، މިފަދަ ދިރުންތައް ރައްކާތެރިކުރުމަކީ ރާއްޖޭގެ ދޫނިސޫފާސޫފީގެ ސިންދަފާތާއި ވެށީގެ މުއްސަނދިކަން ރައްކާތެރިރުމަށް އެޅިގެންދާ މުހިއްމު ފިޔަވަޅެއްކަމަށް އެ އޮތޯރިޓީން ބުނެ އެވެ.
އެހެންނަމަވެސް ކޮންމެ އަހަރަކު މިދުވަސްވަރާ ދިމާކޮށް ހިޖުރަކުރާ ގިނަ ބާވަތްތަކެއްގެ ދޫނި މަޅިފަތިޖަހާ ހިފާ، ފިޔަކޮށާ އަދި ކޮށިތަކުގައި ބަންދުކޮށް ގެންގުޅޭކަމަށާއި މިފަދަ ދޫނި ވިޔަފާރި ކުރުމަށާއި އޮޅުދޫނި ގޮތުގައި ހިފާ ގެންގުޅޭކަން ފާހަގަކުރެވިފައިވާކަމަށްވެސް އެ އޮތޯރިޓީން ބުނެ އެވެ.
މި ފަދަ ދޫނިތައް ހިފާ ގެންގުޅޭ އަދި މި ދޫނިތައް ގަނެވިއްކާ، އެތަކެތީގެ ވިޔަފާރިކުރަމުންދާ ފަރާތްތައް ގާނޫނުގެ ދަށުން ޖޫރިމަނާ ކުރާނަކެމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީ ބުނެއެވެ. އަދި ދޫނި ހިފާ ވިޔަފާރި ކުރާ ފަރާތްތަކުގެ މަޢުލޫމާތު އެނގިލައްވާނަމަ ލަސްނުކޮށް އޮތޯރިޓީއަށް (ނަންބަރު: 3335949 ނުވަތަ އީމެލް:[email protected]) އެ މައުލޫމާތު ހިއްސާކުރުމަށް އެ އޮތޯރިޓީން ވަނީ އެދިފަ އެވެ.
ރިޕޯޓްކުރާއިރު ހުށައަޅަން ޖެހޭ މައުލޫމާތުތައް
ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނާއި މި ޤާނޫނުގެ ދަށުން ހެދިފައިވާ ގަވާއިދުތަކާއި ހިމާޔަތްކޮށްފައިވާ ދިރުންތަކާއި ގުޅޭގޮތުން މި އޮތޯރިޓީއިން އަންގާ އެންގުންތަކާއި، ޤާނޫނާއި ގަވާއިދުތައް ތަންފީޒުކުރުމަށް ހުރިހާ ފަރާތްތަކުގެ އެއްބާރުލުންދިނުމަށް އެ އޮތޯރިޓީން ވަނީ އެދިފަ އެވެ.
