އިންފްރާސްޓްރަކްޗަރު މިނިސްޓްރީން ބުނީ މާލެ އުތުރު ފަރާތު ބަނދަރު ބޭނުންކުރުމުގައި ދިމާވާ ދަތިތަކަށް ޙައްލެއް ހޯދައިދިނުމުގެ ގޮތުން، އެ ސަރަޙައްދުގެ ޖެޓީތައް ތަރައްޤީކުރުމުގެ ޢަމަލީ މަސައްކަތް ފެށުމަށް ހަމަޖެހިފައިވާކަަމަށެވެ.
އެހެންކަމުން، މަސްވެރިންގެ ޕާކު ސަރަޙައްދުން ފެށިގެން ނާދީ ގޯޅިއާ ހަމައަށް އަޅާފައިވާ އުޅަނދުފަހަރު މާދަމާރޭ 11:00 ގެ ކުރިން އެ ސަރަޙައްދުން ނެގުމަށް މިނިސްޓްރީން ވަނީ އަންގާފަ އެވެ. އަދި އޭގެ ފަހުން ނުނަގައި ހުންނަ އުޅަނދުފަހަރު، މި މިނިސްޓްރީގެ ފަރާތުން ނަގާނެކަމަށް އިންފްރާސްޓްރަކްޗަރު މިނިސްޓްރީން ވަނީ ބުނެފައެވެ.
މާލޭ އުތުރު ފަރާތު ޖެޓި ސަރަހައްދު ހަދާ ނިމުމުން އޮންނާނެ ގޮތުގެ ކުރެހުންތައް މީގެ ކުރިން ވަނީ ރައީސް ޑރ. މުހައްމަދު މުއިއްޒު ހިއްސާ ކުރައްވާފަ އެވެ. އެ ސަރަހައްދު ތަރައްގީކުރަނީ ރަށްރަށުން އަންނަ ލޯންޗު ފަހަރރު ގާތްކުރެވޭ ގޮތަށެވެ.
ބޮޑުތަކުރުފާނު މަގު ތަރައްގީ ކުރުމުގެ މަޝްރޫއުގެ ދަށުން އެމަގުން މިހާރު ނަހަދާ އޮތް ބައި ހެދުމަށް އެ ސަރަހައްދުގައި ހުރި ވެހިކަލްތައް ނަގަންވެސް އިންފްރާސްޓްރަކްޗަރު މިނިސްޓްރީން ރޭ ވަނީ އަންގައިފަ އެވެ.
މާލެ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ދަށުން، ދެން ހަދަން އޮތީ ސުނާމީ ބިނާއިން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަމައަށް އޮތް ސަރަހައްދެވެ.
އިންފްރާސްޓްރަކްޗަރު މިނިސްޓްރީން އިއްޔެ ކުރި އިއުލާނެއްގައި ބުނީ ބޮޑުތަކުރުފާނު މަގު ހެދުމުގެ މަޝްރޫއުގެ ދަށުން ސުނާމީ ބިނާއިން ފެށިގެން އެމްޕީއެލް އާ ހަމައަށް މަގު ހެދުމުގެ ޢަމަލީ މަސައްކަތް ފެށުމަށް ވަނީ ހަމަޖެހިފައިކަމަށެވެ.
އެހެންކަމުން، ސުނާމީ ބިނާއިން ފެށިގެން އެމްޕީއެލް އާ ހަމައަށް ބޮޑުތަކުރުފާނު މަގުގައި ބަހައްޓާފައިވާ ތަކެއްޗާއި، ސުނާމީ ބިނާ ސަރަޙައްދުގައި އަޅާފައިވާ އުޅަނދުފަހަރު އަންނަ ހޮނިހިރު ދުވަހުގެ ރޭގަނޑު 11:00 ގެ ކުރިން ނެންގެމަށް މިނިސްޓްރީން ވަނީ އަންގާފަ އެވެ.
