ސްޓެލްކޯއިން އައްޑޫ ސިޓީގައި ކަރަންޓުގެ ހިދުމަތް ރަސްމީކޮށް ފެށުމަށްޓަކައި މިއަދު އައްޑޫ ސިޓީ ހިތަދޫގައި ހާއްސަ ދިދަ ނެގުމުގެ ރަސްމިއްޔާތެއް ވަނީ ބާއްވާފައެވެ.
މި ރަސްމިއްޔާތުގައި ޤައުމީ ދިދަ ނަންގަވައިދެއްވީ ސްޓެލްކޯގެ މެނޭޖިން ޑިރެކްޓަރު ޑރ. އަލީ އަޒުވަރު އެވެ. އަދި ސްޓެލްކޯގެ ދިދަ ނަންގަވައިދެއްވީ ޑެޕިއުޓީ މެނޭޖިން ޑިރެކްޓަރ އާއިޝަތު މުޒްނާއެވެ.
މި ރަސްމިއްޔާތުގައި ވާހަކަފުޅު ދައްކަވަމުން މެނޭޖިން ޑިރެކްޓަރު ޑރ. އަލީ އަޒުވަރު ވަނީ މީގެ 17 އަހަރު ކުރިން ސްޓެލްކޯއިން އައްޑޫ ސިޓީގައި ކަރަންޓުގެ ހިދުމަތް ދެމުން އައިކަން ފާހަގަކުރައްވާފައެވެ. އަދި އައްޑޫ ސިޓީގެ ކަރަންޓުގެ ހިދުމަތް އަލުން އަނބުރާ ސްޓެލްކޯއާ ހަވާލުކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވި ނިންމެވުމަކީ އައްޑޫގެ ރައްޔިތުންނަށް އިތުބާރުހުރި، ދެމެހެއްޓެނިވި ހިދުމަތެއް ކަށަވަރުކޮށްދެއްވުމަށް އެޅުއްވި މުހިންމު ފިޔަވަޅެއްކަމަަށް އަޒުވަރު ވިދާޅުވި އެވެ.
ސްޓެލްކޯއިން އައްޑޫ ސިޓީގެ ކަރަންޓް ހިދުމަތާއި ހަވާލުވެފައި މިވަނީ ފެނަކަ އުވާލާ އެ ކުންފުނިން ކުރަމުން އައި ކަރަންޓްގެ މަސައްކަތްތައް ސްޓެލްކޯއަށް ހަވާލުކުރަން މިމަހުގެ 7 ވަނަ ދުވަބު ނިންމެވުމާއި ގުޅިގެންނެވެ. އެ ނިންމުމާއި އެކު ރާއްޖޭގެ ހުރިހާ ރަށެއްގައިވެސް ކަރަންޓްގެ ހިދުމަތް ދޭނީ ސްޓެލްކޯއިން ކަމަށެވެ.
