މާލެ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ދަށުން، ދެން ހަދަން އޮތީ ސުނާމީ ބިނާއިން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަމައަށް އޮތް ސަރަހައްދެވެ.
އިންފްރާސްޓްރަކްޗަރު މިނިސްޓްރީން މިއަދު ކުރި އިއުލާނެއްގައި ބުނީ ބޮޑުތަކުރުފާނު މަގު ހެދުމުގެ މަޝްރީއުގެ ދަށުން ސުނާމީ ބިނާއިން ފެށިގެން އެމްޕީއެލް އާ ހަމައަށް މަގު ހެދުމުގެ ޢަމަލީ މަސައްކަތް ފެށުމަށް ވަނީ ހަމަޖެހިފައިކަމަށެވެ.
އެހެންކަމުން، ސުނާމީ ބިނާއިން ފެށިގެން އެމްޕީއެލް އާ ހަމައަށް ބޮޑުތަކުރުފާނު މަގުގައި ބަހައްޓާފައިވާ ތަކެއްޗާއި، ސުނާމީ ބިނާ ސަރަޙައްދުގައި އަޅާފައިވާ އުޅަނދުފަހަރު އަންނަ ހޮނިހިރު ދުވަހުގެ ރޭގަނޑު 11:00 ގެ ކުރިން ނެންގެމަށް މިނިސްޓްތީން ވަނީ އަންގާފަ އެވެ.
އެ ތާރީހުގެ ފަހުން މަގުގައި ނުނަގައި ހުންނަ ތަކެއްޗާއި ސުނާމީ ބިނާ ސަރަޙައްދުގައި އަޅާފައިވާ އުޅަނދުފަހަރުތައް މިނިސްޓްރީގެ ފަރާތުން ނަގާނެ ކަމަށްވެސް އިންފްރާސްޓްރަކްޗަރު މިނިސްޓްރީން ބުނެ އެވެ.
ބޮޑުތަކުރުފާނުމަގު ތަރައްގީ ކުރުމުގެ މަޝްރޫއުގެ ދަށުން ހެންވޭރު ފެރީ ޓާމިނަލުން ފެށިގެން ނޯތު ހާބަރާއި ހަމައަށް އޮތް ސަރަހައްދު ނިންމާ މިހާރު ވަނީ އާއްމުކޮށް ހުޅުވާލާފަ އެވެ.
