"ޖާމާ ޕީޑިއޭޓްރިކްސް" (JAMA Pediatrics) މަޖައްލާގައި ޝާއިއުކޮށްފައިވާ މި ދިރާސާއަކީ ދުނިޔޭގެ 64 ގައުމަކުން 2.8 މިލިއަން ކުދިންގެ މައުލޫމާތު އެއްކޮށްގެން ކުރިއަށްގެންގޮސްފައިވާ ވަރަށް ފުޅާ ދިރާސާއެކެވެ.
މި ދިރާސާގެ ނަތީޖާއިން ދައްކާ ގޮތުގައި، އިސްކުރީންތަކަށް ކުދިން އާދަޔާ ހިލާފަށް ގިނައިން ހުށަހެޅުމަކީ އެކުދިންގެ ތައުލީމީ ފެންވަރަށާއި، ނަފްސާނީ އަދި އިހުސާސީ ދުޅަހެޔޮކަމަށް ބޮޑެތި ނޭދެވޭ އަސަރުތަކެއް ކުރާ ކަމެކެވެ. މީގެ އިތުރުން، ކުދިންގެ ބަސްމޮށުންތެރިކަމާއި ބަސް އުނގެނުމުގެ ގާބިލުކަން ކުރިއަރައިދިއުމަށްވެސް މީގެ ސަބަބުން ބޮޑެތި ހުރަސްތަކެއް ކުރިމަތިވެ އެވެ.
ދިރާސާވެރިން ފާހަގަކުރި ގޮތުގައި، ގިނަ ވަގުތު އިސްކުރީން ބޭނުންކުރުމުގެ ސަބަބުން ކުދިންނަށް ކުރާ ނޭދެވޭ އަސަރުގެ މިންވަރު، ދުވަސްނުފުރާ ވިހެއުމުން ނުވަތަ ބެލެނިވެރިންގެ ފަރާތުން ކުދިންނަށް ކުރިމަތިވާ ނޭދެވޭ އަމަލުތަކުގެ ސަބަބުން ކުރާ ނޭދެވޭ އަސަރާ އެއްވަރެވެ. މިއީ ކުދިންގެ ތަރައްގީއަށް ބަލާއިރު ނުހަނު ކަންބޮޑުވާންޖެހޭ ކަމެއްގެ ގޮތުގައި ދިރާސާވެރިން ވަނީ ސިފަކޮށްފަ އެވެ.
ދުނިޔޭގެ އެކި ކަންކޮޅުތަކުން އެއްކުރެވުނު މަޢުލޫމާތުތަކަށް ބަލައި ހެދި މި ބޮޑު ދިރާސާއިން ސާފުވަނީ، ކުދިން އިސްކުރީން ބޭނުންކުރާ މިންވަރު ކޮންޓްރޯލްނުކުރެވިއްޖެނަމަ، އެކުދިންގެ މުސްތަގުބަލަށާއި އުނގެނުމުގެ ދާއިރާއަށް ދިގުމުއްދަތުގެ ބޮޑެތި ގެއްލުންތަކެއް ލިބެމުންދާނެ ކަމެވެ.
