ރައްޔިތުން މަޖިލީހުން އާއްމުކުރި މާލީ ބަޔާނުގައިވާ ގޮތުން ރައީސް މުހައްމަދު މުއިއްޒުގެ އެއްބަނޑު ކޮއްކޯފުޅު ފާތިމަތު ސައުދާއަށް 2.4 މިލިއަން ރުފިޔާގެ ލޯނެއް ދިނީ ކޮން ފަރާތަކުން ކަމެއް ހާމަކޮށްފަ އެއް ނުވެ. އެހެންނަމަވެސް އެ ލޯން ދީފައިވަނީ މިއަހަރުގެ ޖެނުއަރީ މަހުގެ ފުރަތަމަ ދުވަހުކަމަށް ވަނީ ބުނެފަ އެވެ. އަދި އެލޯން ދައްކަން ވަކި މުއްދަތެއް އެމީހާ ދީފައި ނުވާއިރު މިއަހަރުގެ މޭމަހުގެ ނިޔަަލަށް އެލޯނަށް އެއްވެސް ފައިސާއެއް ދައްކާފައި ނުވާކަމަށް މެމްބަރު ސައުދާގެ މާލީ ބަޔާނުގައި ވެއެވެ.
އަމިއްލަ ފަރާތަކުން ސައުދާއަށް 2.4 މިލިއަން ރުފިޔާގެ ލޯނެއް ދިން ނަމަވެސް މެމްބަރުގެ ބޭންކު އެކުންޓްތަކުގައި ހުރިި ފައިސާގެ ޖުމްލަ އަދަދު އަރަނީ 13،500 ރުފިޔާއަށެވެ. އެގޮތުން ސައުދާގެ ބީއެމްއެލްގެ ރުފިޔާ އެކައުންޓްގައި ހުރީ 11،604 ރުފިޔާ 99 ލާރިއެވެ. ބީއެމްއެލްގެ ސައުދާގެ ޑޮލަރު އެކައުންޓްގައި ހުރީ 118.65 ޑޮލަރެވެ. އަދި އިސްލާމިކް ބޭންކުގެ ރުފިޔާ އެކައުންޓްގައި ހުރީ 93 ރުފިޔާ 45 ލާރި އެވެ.
ސައުދާގެ މާލީ ބަޔާނުގައި ވާގޮތުން އަމިއްލަ ފަރާތަކުން ލޯނެއްގެ ގޮތުގައި 2.4 މިލިއަން ދިން ނަމަވެސް މެމްބަރުގެ މިލްކިއްޔާތުގައި އެއްވެސް މުދަލެެއް ނެތެވެ. މިދިޔަ އެއްއަހަރު ދުވަހުގެ ތެރޭގައި ސައުދާއަށް އާްދަނީގެ ގޮތުގައި ލިބިފައިވަނީ 990،000.00 ރުފިޔާއެވެ. އެއީ މަޖިލީހުގެ މުސާރައާއި އިނާޔަތްތަކުގެ ގޮތުގައި ލިބުނު ފައިސާކަމަށް ސައުދާގެ މާލީ ބަޔާނުގައި ވެއެވެ.
