ރާއްޖޭގެ ފަރާތުން ހެލްތު މިނިސްޓަރު ގީލާ ސޮއިކުރެއްވި، މި ގަރާރަކީ ކުޑަކުދިންނަށް ކުރާ އެކި ބާވަތުގެ އަނިޔާ ހުއްޓުވުމަށާއި ކުޑަކުދިންގެ ހައްގުތައް ރައްކާތެރިކުރުމުގެ ނިޒާމު ވަރުގަދަ ކުރުމުގެ މަގުސަދުގައި އެކުލަވާލާފައިވާ ގަރާރެކެވެ.
މި ގަރާރުގެ މަގުސަދުތަކުގެ ތެރޭގައި ކުޑަކުދިންނަށް އަނިޔާކޮށްގެން ހުށަހަޅާ މައްސަލަތަކަށް އިޖާބަދިނުމަށް ބައިނަލްއަގުވާމީ ފެންވަރުގައި ކުރެވޭ މަސައްކަތްތަކާއި ގައުމީ ފެންވަރުގައި ކުރެވޭ މަސައްކަތްތައް އިތުރަށް ހަރުދަނާކުރުންވެސް ހިމެނެ އެވެ.
އެ ގަރާރުގައި ސޮއިކުރުމަށް ބޭއްވި ރަސްމިއްޔާތުގައި މިނިސްޓަރު ގީލާ ވިދާޅުވީ ކުޑަކުދިންނަށް ކުރާ އަނިޔާ ހުއްޓުވުމުގައި މާނަހުރި ކުރިއެރުމެއް ހޯދުމަށް ދެމެހެއްޓެނިވި މަސައްކަތްތަކެއް ބޭނުންވާ ކަމަށެވެ. ދައުލަތުގެ މުއައްސަސާތަކާއި އާއިލާތަކާއި މަދަނީ ޖަމުއިއްޔާތަކާއި ތަރައްގީގެ ބައިވެރިން އަދި ކުޑަކުދިން ވެސް ހިމެނޭހެން، މުޅި މުޖުތަމައު ބައިވެރިވާ ފުރިހަމަ ނިޒާމެއްގެ ތެރެއިން އެކަމަށް އެހީތެރިކަން ބޭނުންވާ ކަމަށް ގީލާ ވިދާޅުވި އެވެ.
މީގެ އިތުރުން، ދައުލަތުގެ މުއައްސަސާތަކާއި، އާއިލާތަކާއި، މަދަނީ ޖަމުއިއްޔާތަކާއި، ތަރައްގީގެ ބައިވެރިން އަދި ކުޑަކުދިން ވެސް ހިމެނޭހެން، މުޅި މުޖުތަމަޢު ބައިވެރިވާ ފުރިހަމަ ނިޒާމެއްގެ ތެރެއިން މިކަމަށް އެހީތެރިކަން ބޭނުންވާކަމަށް ވެސް މިނިސްޓަރ ފާހަގަކުރެއްވި އެވެ.
ކުޑަކުދިން ރައްކާތެރިކުރުމުގެ ނިޒާމު ހަރުދަނާކުރުމަށާއި އަދި އެކުދިންނަށް ފާގަތި މުސްތަގްބަލެއް ހޯދައިދިނުމަށް މި ސަރުކާރުން ދެއްވާ އަހަންމިއްޔަތުކަން ފާހަގަކުރައްވައި މިނިސްޓަރ ޤީލާ ވަނީ ރައީސުސް ޑރ. މުހައްމަދު މުއިއްޒު އަށް ޝުކުރު އަދާކުރައްވައިފަ އެވެ. އަދި ކުޑަކުދިންގެ ހައްގުތަކާއި، ރައްކާތެރިކަމާއި އަދި ލާބައަށްޓަކައި ކުރެވޭ މަސައްކަތްތަކުގައި ޔުނިސެފާއި އެހެނިހެން ބައިވެރިން ދެއްވާ އެއްބާރުލުން ފާހަގަކޮށް މިނިސްޓަރު ވަނީ އެ ހުރިހާ ފަރާތްތަކަށް ޝުކުރު އަދާކުރައްވައިފަ އެވެ.
މިއަދު ދިވެހިރާއްޖެއިން ސޮއިކުރި ބައިނަލްއަގުވާމީ ގަރާރުގެ ދަށުން ކުރެވޭ މަސައްކަތްތަކަކީ ކުޑަކުދިންގެ ދިރިއުޅުމަށް ދެމެހެއްޓެނިވި އަދި ދާއިމީ ހެޔޮ ބަދަލުތަކެއް ގެނުވައިދޭނެ އަމަލީ މަސައްކަތްތަކަކަށް ހެދުމަށްޓަކައި، ރާއްޖެ އާއި އަދި ބައިނަލްއަގުވާމީ އެކި އިދާރާތަކާއިއެކު ގުޅިގެން މަސައްކަތްކުރުމުގައި ރާއްޖެ ދެމިއޮންނާނެކަމުގެ ޔަގީންކަން މިނިސްޓްރީ އޮފް ހެލްތް، ފެމިލީ އެންޑް ވެލްފެއަރ އިން ވަނީ ދީފަ އެވެ.
